അറസ്റ്റിലായ പ്രതികൾ അമൽരാജ്, മണിലാൽ, ബിജു,
സുനിൽ
ഓച്ചിറ: ഹോണ്‍ അടിച്ചതിലുള്ള വിരോധത്തില്‍ കാര്‍ യാത്രക്കാരെ ആക്രമിച്ച നാല് പ്രതികള്‍ പിടിയില്‍. പുതുപ്പള്ളി പ്രയാര്‍ വടക്കുമുറിയില്‍ കാക്കാട്ടുശ്ശേരി വീട്ടില്‍ മണിലാല്‍ (50), പുതുപ്പള്ളി പ്രയാര്‍ വടക്കുമുറിയില്‍ ആതിര വീട്ടില്‍ അമല്‍ (27), പ്രയാര്‍ വടക്കുമുറിയില്‍ ഗോപുരം വീട്ടില്‍ ബിജു (47), പ്രയാര്‍ വടക്കുമുറിയില്‍ വേലശ്ശരിയില്‍ വീട്ടില്‍ സുനില്‍ (44) എന്നിവരാണ് ഓച്ചിറ പൊലീസിന്റെ പിടിയിലായത്.
മങ്ങാട് സ്വദേശികളായ കൃഷ്ണൻകുട്ടിയും കുടുംബവും സഞ്ചരിച്ച കാര്‍ ഹോണ്‍ മുഴക്കി ഓവര്‍ടേക്ക് ചെയ്തതിലുള്ള വിരോധത്തില്‍ കാര്‍ പ്രതികൾ തടഞ്ഞുനിര്‍ത്തുകയും കുടുംബത്തെ ആക്രമിക്കുകയുമായിരുന്നു. കൃഷ്ണൻകുട്ടിയെ രക്ഷിക്കാന്‍ ശ്രമിക്കുന്നതിനിടെ ഭാര്യ ശ്രീദേവിക്ക് ദേഹോപദ്രവം ഏല്‍ക്കുകയും കഴുത്തില്‍ കിടന്ന മൂന്നര പവനോളം വരുന്ന സ്വര്‍ണമാല നഷ്ടപ്പെടുകയും ചെയ്തു.
തുടര്‍ന്ന് ഓച്ചിറ പൊലീസിന് ലഭിച്ച പരാതിയില്‍ കേസ് രജിസ്റ്റര്‍ ചെയ്ത് പ്രതികളെ പിടികൂടുകയായിരുന്നു. ഓച്ചിറ പൊലീസ് ഇന്‍സ്‌പെക്ടര്‍ നിസാമുദ്ദീന്റെ നേതൃത്വത്തില്‍ എസ്.ഐ നിയാസ്, എ.എസ്.ഐ അഷറഫ്, സി.പി.ഒമാരായ കനീഷ്, പ്രവീണ്‍ എന്നിവരടങ്ങിയ സംഘമാണ് ഇവരെ പിടികൂടിയത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.