ഡോക്ടർക്ക് നേരെയുണ്ടായ ആക്രമണത്തിൽ പ്രതിഷേധിച്ചു

തിരുവല്ല: താലൂക്ക് ആശുപത്രിയിൽ ഡോക്ടർക്ക് നേരെയുണ്ടായ ആക്രമണത്തിൽ ജീവനക്കാർ പ്രതിഷേധിച്ചു. ഡോ. വി.എസ്. ബെറ്റിക്കുനേരെ ശനിയാഴ്ച രാത്രി നടന്ന ആക്രമണത്തിനെതിരായ പ്രതിഷേധ മാർച്ച് സൂപ്രണ്ട് ഡോ. ജി. അജയമോഹൻ ഉദ്ഘാടനം ചെയ്തു. ഡോ. ദീപ പി.മോഹൻ , ഡോ. ഗീതാലക്ഷ്മി, ഡോ. മാണി ഫിലിപ്, എം.എ. ഷാനവാസ്, അശോകൻ തുടങ്ങിയവർ നേതൃത്വം നൽകി. മീന്തലക്കര സ്വദേശി അച്ചുവാണ് ഡോക്ടറെ ആക്രമിച്ചത്. വാഹനാപകടത്തിൽ കാലിന് പരിക്കേറ്റ് ചികിത്സക്കെത്തിയ അച്ചു പരിശോധനക്കിടെ ഡോക്ടറുടെ മുഖത്ത് അടിക്കുകയായിരുന്നു. അറസ്​റ്റ്​ ചെയ്ത പ്രതിയെ റിമാൻഡ്​ ചെയ്തിരുന്നു.