ഭിന്നശേഷി സ്​കോളർഷിപ്​ ഇനി തദ്ദേശ സ്ഥാപനങ്ങളുടെ അനിവാര്യ ചുമതലയല്ല

തൃശൂർ: ഭിന്നശേഷിക്കാർക്ക്​ വികസന ഫണ്ടിൽനിന്ന്​ നൽകുന്ന സ്​കോളർഷിപ്പും ബത്തയും നൽകണമോ വേണ്ടയോ എന്ന്​ ഇനി തദ്ദേശ സ്ഥാപനങ്ങൾക്ക്​ തീരുമാനിക്കാം. 14ാം പഞ്ചവത്സര പദ്ധതിയിലെ വാർഷിക പദ്ധതികൾ തയാറാക്കാനുള്ള മാർഗരേഖയിലാണ്​ ഇക്കാര്യം വ്യക്തമാക്കുന്നത്​. കഴിഞ്ഞ പഞ്ചവത്സര പദ്ധതി വരെ പഞ്ചായത്തുകളുടെ അനിവാര്യ ചുമതലയായിരുന്നു ഇത്​. ചൊവ്വാഴ്ച ഇറങ്ങിയ വാർഷിക പദ്ധതി മാർഗരേഖയിലെ ഈ നിർദേശത്തിനെതിരെ വകുപ്പിൽനിന്നുതന്നെ പ്രതിഷേധം ഉയർന്നിട്ടുണ്ട്​.

സബ്​സിഡി മാർഗരേഖ അനുസരിച്ച്​ ഭിന്നശേഷി സ്​കോളർഷിപ്​ ഏറ്റെടുക്കാമെന്നും ഇതിനാവശ്യമായ തുക ഗ്രാമ-​​ബ്ലോക്ക്​- ജില്ല പഞ്ചായത്തുകൾ വഹിക്കണമെന്നും മാർഗരേഖ പറയുന്നു. ഈ തുക 60:30:10 എന്ന അനുപാതത്തിൽ യഥാക്രമം വകയിരുത്താം. നേരത്തേ 50:25:25 അനുപാതത്തിലായിരുന്നു തദ്ദേശസ്ഥാപനങ്ങൾ നൽകിയിരുന്നത്​. ഈ തുക കണ്ടെത്താൻ കഴിയാത്ത തദ്ദേശ സ്ഥാപനങ്ങൾ മറ്റ്​ തലങ്ങളി​ലെ തദ്ദേശ സ്ഥാപനങ്ങളുടെ വിഹിതം ഉപയോഗിക്കാം.

ഭിന്നശേഷിക്കാർക്കായുള്ള സ്​കോളർഷിപ്പും ബത്തയും നൽകാനാവശ്യമായ വിഹിതം കണ്ടെത്താൻ നിർബന്ധമായും നീക്കിവെക്കേണ്ട അഞ്ച്​ ശതമാനം തുക ഉപയോഗിക്കാൻ പാടില്ലെന്ന കർശന നിർദേശവും മാർഗരേഖയിലുണ്ട്​. ഭിന്നശേഷിയുള്ളവർക്കായി പ്രത്യേക തൊഴിൽ പരിശീലന കേന്ദ്രങ്ങൾ ​ഏറ്റെടുക്കേണ്ടത്​ ​ബ്ലോക്ക്​ പഞ്ചായത്തുകളാണ്​. ഭിന്നശേഷി സൗഹൃദമായ കെട്ടിടങ്ങളാണ്​ നിർ​മിക്കേണ്ടത്​. നിലവിലുള്ള കെട്ടിടങ്ങൾ ഭിന്നശേഷി സൗഹൃദമാക്കുകയും വേണം. ഭിന്നശേഷിക്കാർക്കായുള്ള ക്ഷേമപരിപാടികളും പുനരധിവാസ വികസന പരിപാടികളും ഏറ്റെടുക്കാം. കുട്ടികൾ, ഭിന്നശേഷിയുള്ളവർ, ട്രാൻസ്​ജെൻഡേഴ്​സ്​ എന്നിവർക്കായി പ്രത്യേക പദ്ധതി തയാറാക്കി വാർഷിക പദ്ധതിയുടെ ഭാഗമാക്കണമെന്നും നിർദേശിക്കുന്നു.

15ാം ധനകമീഷൻ ഗ്രാമീണ തദ്ദേശ സ്ഥാപനങ്ങൾക്ക്​ 1198​.54 കോടി രൂപയാണ്​ അനുവദിച്ചിട്ടുള്ളത്​. സാമ്പത്തിക വികസനത്തിനും സാമൂഹിക നീതിക്കും വേണ്ടിയുള്ള പദ്ധതിയാണ്​ തയാറാക്കേണ്ടത്​. ഏപ്രിൽ 27ന്​ മുമ്പ്​ 12 അംഗങ്ങളുള്ള ആസൂത്രണ സമിതിയും വർക്കിങ്​ ഗ്രൂപ്പുകളും പുനഃസംഘടിപ്പിക്കണം. കരട്​ പ്രോജക്ട്​ നിർ​ദേശങ്ങൾ മേയ്​ ഏഴിന്​ മുമ്പ്​ തയാറാക്കാനും ഗ്രാമസഭ യോഗങ്ങൾ മേയ്​ 16നും 27നും ഇടയിൽ ചേരണമെന്നും മാർഗരേഖയിൽ നിർദേശിക്കുന്നു.