ആറ്റിങ്ങൽ: പട്ടാപ്പകൽ നടുറോഡിൽ മധ്യവയസ്കനെ കുത്തി പരിക്കേൽപിച്ച കേസിൽ പ്രതി അറസ്റ്റിൽ. കടയ്ക്കാവൂർ പഴഞ്ചിറ കാട്ടുവിള വീട്ടിൽ ചപ്രകുമാർ എന്ന കുമാർ ആണ് (45) പിടിയിലായത്. ഞായറാഴ്ച രാവിലെ 10ന് നിലയ്ക്കാമുക്ക് ജങ്ഷനിലാണ് സംഭവം. കടയ്ക്കാവൂർ ശാസ്താം നടക്ക് സമീപം പിറക്കരി പുത്തൻവീട്ടിൽ സുനിൽകുമാറിനെയാണ് (53) ആക്രമിച്ചത്.
പുതുവർഷത്തിൽ മദ്യം വാങ്ങാൻ പണം ആവശ്യപ്പെട്ടത് കൊടുക്കാത്തതിനുള്ള വിരോധത്തിലാണ് സുനിൽകുമാറിനെ പ്രതി ആക്രമിച്ചത്. നിലയ്ക്കാമുക്ക് ജങ്ഷനിൽ ഇടിക്കട്ടകൊണ്ട് ഇടിക്കുകയും കത്തികൊണ്ട് കുത്തിപ്പരിക്കേൽപിക്കുകയും ആയിരുന്നു. സാരമായി പരിക്കേറ്റ സുനിൽകുമാറിനെ നാട്ടുകാർ ചിറയിൻകീഴ് താലൂക്കാശുപത്രിയിലെത്തിച്ചു.
ആക്രമണത്തിനു ശേഷം പ്രതിയായ കുമാർ ആയുധം കാട്ടി നാട്ടുകാരെ ഭീഷണിപ്പെടുത്തി വാഹനത്തിൽ രക്ഷപ്പെടാൻ ശ്രമിക്കുന്നതിനിടെയാണ് പൊലീസ് സംഘം പിടികൂടിയത്. കടയ്ക്കാവൂർ ചിറയിൻകീഴ് തുടങ്ങിയ സ്റ്റേഷനുകളിൽ പ്രതിക്കെതിരെ നിരവധി ക്രിമിനൽ കേസുകൾ നിലവിലുണ്ട്. തിരുവനന്തപുരം റൂറൽ എസ്.പി ശിൽപ ഐ.പി.എസ്, വർക്കല ഡിവൈ.എസ്.പി പി. നിയാസ് എന്നിവരുടെ നിർദേശപ്രകാരം കടയ്ക്കാവൂർ എസ്.എച്ച്.ഒ സജിൻ ലൂയിസ്, സബ് ഇൻസ്പെക്ടർ ദീപു എസ്.എസ്, എ.എസ്.ഐ രാജീവ്, സി.പി.ഒ മാരായ ശ്രീഹരി, സുജിൽ, അനിൽകുമാർ എന്നിവരടങ്ങുന്ന സംഘമാണ് പ്രതിയെ സാഹസികമായി പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.