അപൂർവതകളും വിവാദങ്ങളും എന്നും ഒപ്പമുണ്ടായിരുന്ന രാഷ്​ട്രീയത്തിലെ ഒറ്റയാൻ

നയം, വിനയം, അഭിനയം എന്നിവ വശമില്ലാത്ത രാഷ്​ട്രീയക്കാരൻ എന്ന്​ ആർ. ബാലകൃഷ്​ണപിള്ളയെ വിശേഷിപ്പിച്ചത്​ രാഷ്​ട്രീയ നിരീക്ഷകനായ ആർ. ജയശങ്കർ ആണ്​. എന്നാൽ, ബാലകൃഷ്​ണപിള്ളയുടെ ആത്​മകഥയുടെ അവതാരികയിൽ എഴുതിയ ഈ വിശേഷണത്തിൽ മാത്രം ഒതുങ്ങുന്നതായിരുന്നില്ല അദ്ദേഹത്തിന്‍റെ ജീവിതം. കേരള രാഷ്​ട്രീയത്തിൽ എന്നും നിറഞ്ഞുനിന്ന തലയെടുപ്പുള്ള നേതാവ്​, മുന്നണി രാഷ്​ട്രീയത്തിന്‍റെ അമരക്കാരൻ, കലഹങ്ങളെയും വിവാദങ്ങളെയും ചങ്കുറപ്പോടെ നേരിട്ട ഒറ്റയാൻ എന്നിങ്ങനെ വിശേഷണങ്ങൾക്ക്​ അനവധിയാണ്​ ബാലകൃഷ്​ണപിള്ള സ്വന്തമാക്കിയത്​.

അപൂർവതകളും വിവാദങ്ങളും രാഷ്​ട്രീയത്തിൽ ബാലകൃഷ്​ണപിള്ളയുടെ സഹയാത്രികരായിരുന്നു. ഇരുമുന്നണികളുടെയും രൂപീകരണ സമയത്ത്​ അവർക്കൊപ്പമുണ്ടാകാൻ കഴിഞ്ഞ അപൂർവത മറ്റൊരു നേതാവിനും അവകാശപ്പെടാനാകില്ല. ഒരു ഘട്ടത്തിൽ യു.ഡി.എഫുമായി ഇടഞ്ഞ്​ ബി.ജെ.പിയുമായി സഖ്യമുണ്ടാക്കാൻ പോലും തയാറായത്​ അപൂർവതയുടെ മറ്റൊരു ചരിത്രം സൃഷ്​ടിക്കുമായിരുന്നു. സഭാ ചരിത്രത്തിലെ ഏറ്റവും പ്രായം കുറഞ്ഞ അംഗം, അഴിമതി കേസിൽ ശിക്ഷിക്കപ്പെടുന്ന കേരളത്തിലെ ആദ്യത്തെ മന്ത്രി, കൂറുമാറ്റ നിരോധന നിയമപ്രകാരം ശിക്ഷിക്കപ്പെട്ട ആദ്യ നിയമസഭാ സാമാജികൻ, ഒരേ സമയം മന്ത്രിയും പഞ്ചായത്ത് പ്രസിഡൻറ് സ്ഥാനവും വഹിച്ചിരുന്നയാൾ തുടങ്ങിയ അപൂർവതകൾ ബാലകൃഷ്​ണപിള്ള സ്വന്തമാക്കി. വിവാദമായ 'പഞ്ചാബ് മോഡൽ പ്രസംഗ'ത്തിന്‍റെ പേരിൽ മന്ത്രിസഭയിൽ നിന്ന് രാജിവെക്കേണ്ടി വന്നതും അപൂർവതയുടെ മറ്റൊരു ഏട്​.

 രാഷ്​ട്രീയത്തിലേക്ക്​ തിരികെ കൊണ്ടുവന്നത്​ ഗൗരിയമ്മയുടെ പ്രസംഗം

1947ൽ വാളകം ഹൈസ്​കൂളിൽ നാലാം ഫോറത്തിൽ പഠിക്കുമ്പോൾ അന്നത്തെ കമ്മ്യുണിസ്​റ്റ്​ പാർട്ടിയുടെ വിദ്യാർഥി വിഭാഗമായ സ്​റ്റുഡൻറ്​സ്​ ഫെഡറേഷ​െൻറ അംഗത്വമെടുത്തായിരുന്നു രാഷ്​ട്രീയ രംഗത്തേക്കുള്ള വരവ്​. കൈപിടിച്ചു കയറ്റിയതാക​ട്ടെ പിൽക്കാലത്ത്​ കേരളത്തി​െൻറ മുഖ്യമന്ത്രിയായ പി.കെ. വാസുദേവൻ നായരും. 21 വയസ്സുവരെ കമ്മ്യുണിസ്​റ്റുകാരനായിരു​െന്നന്നും 1957​ൽ ഇ.എം.എസ്​ മന്ത്രിസഭ അധികാരത്തിലേറിയപ്പോൾ മുതൽ കമ്മ്യുണിസ്​റ്റുകൾ ജനാധിപത്യവിരുദ്ധരും അക്രമികളും സുഖലോലുപരുമായതോടെ താൻ പാർട്ടി വിടുകയായിരുന്നെന്നും തുറന്നുപറയാൻ പിള്ള ഒരുമടിയും കാണിച്ചിരുന്നില്ല.

രാഷ്​ട്രീയം മതിയാക്കി അച്ഛൻ മാനേജറായ വാളകം സ്​കൂളിൽ ഹെഡ്​മാസ്​റ്ററായി ഒതുങ്ങിക്കൂടിയ കാലത്ത്​ അന്ന്​ മന്ത്രിയായിരുന്ന ഗൗരിയമ്മ നടത്തിയ ഒരു പ്രസംഗമാണ്​ പിള്ളയെ രാഷ്​ട്രീയത്തിലേക്ക്​ തിരികെ കൊണ്ടുവന്നത്. പിള്ളയുടെ കുടുംബമായ കീഴൂട്ടിൽ ഒരു കുഞ്ഞ്​ മരിച്ചാൽ സംസ്​കരിക്കണമെങ്കിൽ കമ്യൂണിസ്റ്റ്​ പാർട്ടിയുടെ അനുവാദം വേണമെന്നായിരുന്നു ഗൗരിയമ്മ പ്രസംഗിച്ചത്​. തങ്ങളുടെ സ്വത്തിനുമേൽ കമ്മ്യൂണിസ്​റ്റ്​ പാർട്ടി അധികാരം സ്​ഥാപിച്ചിരിക്കുന്നു എന്ന ആ വാക്കുകളിലെ ധാർഷ്​ട്യമാണ്​ തന്നെ രാഷ്​ട്രീയത്തിലേക്ക്​ തിരികെ കൊണ്ടുവന്നതെന്ന്​ ബാലകൃഷ്​ണപിള്ള ആത്​മകഥയിൽ പറയുന്നുണ്ട്​. പിൽക്കാലത്ത്​ യു.ഡി.എഫ്​ മന്ത്രിസഭയിൽ ആ ഗൗരിയമ്മയുമൊത്ത്​ ഇരിക്കാനും പിള്ളക്ക്​ മടിയുണ്ടായില്ല.

1957​ലെ തെരഞ്ഞെടുപ്പിൽ കമ്മ്യുണിസ്​റ്റ്​ പാർട്ടിക്കുവേണ്ടി പ്രവർത്തിച്ച പിള്ള തൊട്ടടുത്ത വർഷം കോൺഗ്രസുകാരനാകാൻ മടി കാട്ടിയില്ല. 21 അംഗ കെ.പി.സി.സി നിർവാഹക സമിതിയിലെ ഏറ്റവും പ്രായം കുറഞ്ഞ അംഗമായിരുന്നു. ഒപ്പം എ.ഐ.സി.സി അംഗവുമായി. 60ൽ കോൺഗ്രസുകാരനായി പത്തനാപുരത്ത്​ മത്സരത്തിനിറങ്ങുമ്പോൾ 25 വയസ്സ്​ തികയുന്നതേ ഉണ്ടായിരുന്നുള്ളു. കന്നിയങ്കത്തിൽ സ്വന്തം അധ്യാപകനായിരുന്ന എൻ. രാജഗോപാലൻ നായരെ പരാജയപ്പെടുത്തി.

1964ൽ കേരള കോൺഗ്രസ്​ രൂപീകരിക്കുന്നതിൽ പ്രധാനി ബാലകൃഷ്​ണ പിള്ളയായിരുന്നു. പാർട്ടിയുടെ സ്​ഥാപക ജനറൽ സെക്രട്ടറിയായതും മറ്റാരുമല്ല. 1965ൽ പത്തനാപുരം വിട്ട്​ കൊട്ടാരക്കരയിൽ ചന്ദ്രശേഖരൻ നായരെ തോൽപ്പിച്ചെങ്കിലും ആർക്കും ഭൂരിപക്ഷം തെളിയിക്കാൻ കഴിയാത്തതിനാൽ സഭ കൂടിയില്ല. 1967ൽ ചന്ദ്രശേഖരൻ നായരോട്​ കൊട്ടാരക്കരയിൽ ജീവിതത്തിലെ ആദ്യ തോൽവി അറിഞ്ഞു. 70 ലും തോൽവി തന്നെ. 1971ൽ മാവേലിക്കരയിൽ നിന്ന്​ പാർലമെൻറിലേക്ക്​ തെരഞ്ഞെടുക്കപ്പെട്ടു. അടിയന്തിരാവസ്​ഥക്കാലത്ത്​ ഏതാനും മാസങ്ങൾ ജയിലിലുമായി.

മന്ത്രിസഭയിൽ ചേരാൻ കേരള കോൺഗ്രസ്​ തീരുമാനിച്ചതോടെ എം.പി സ്​ഥാനം രാജിവെക്കാതെ തന്നെ അച്യുതമേനോൻ മന്ത്രിസഭയിൽ ഗതാഗത മ​ന്ത്രിയായി. എന്നാൽ, അടിയന്തിരാവസ്​ഥ കാരണം തെരഞ്ഞെടുപ്പിന്​ സാഹചര്യമില്ലാതിരുന്നതിനാലും മന്ത്രിസഭയുടെ കാലാവധി ദീർഘിപ്പിച്ചതിനാലും നിയമസഭാംഗത്വം നേടാൻ കഴിയാതെ 1976 ജൂൺ 25ന് മന്ത്രി സ്​ഥാനം രാജിവെച്ച്​ പാർലമെൻറിലേക്ക്​ മടങ്ങി.

യു.ഡി.എഫ്​ രൂപീകരണത്തിൽ ലീഗും മാണിയും ഉണ്ടായിരുന്നില്ല

1977ൽ സി.പി.എമ്മിന്‍റെ സഹായത്തോടെ കൊട്ടാരക്കരയിൽ നിന്ന്​ ജയിച്ചു. 1980ൽ ഇടതുമുന്നണി രൂപംകൊണ്ടപ്പോൾ സി.പി.എം, സി.പി.ഐ, ആർ.എസ്​.പി, അഖിലേന്ത്യ ലീഗ്​, കോൺഗ്രസ്​ (എ) പാർട്ടിക​ളോ​ടൊപ്പം പിള്ളയും ചേർന്നു. ആദ്യ നായനാർ മന്ത്രിസഭയിൽ വൈദ്യുത മന്ത്രിയായി. രണ്ടു വർഷം പൂർത്തിയാവും മുമ്പ്​ എ കോൺഗ്രസും കേരള കോൺഗ്രസും മുന്നണി വിട്ട​പ്പോൾ മന്ത്രിസഭ വീണു. ഈ ഘട്ടത്തിലായിരുന്നു യു.ഡി.എഫ്​ രൂപീകരിച്ചത്​. യു.ഡി.എഫ്​ രൂപീകരണ യോഗത്തിൽ കെ. കരുണാകരനൊപ്പം താൻ പ​​​ങ്കെടുക്കുമ്പോൾ എ.കെ ആൻറണിയോ കെ.എം മാണിയോ മുസ്​ലിം ലീഗോ ഉണ്ടായിരുന്നില്ലെന്ന്​ പിള്ളയുടെ ആത്​മകഥയിലുണ്ട്​.

ആറാം നിയമസഭയിൽ ഇരു മുന്നണികളും ഭരിച്ചപ്പോഴും പിള്ള മന്ത്രിയായിരുന്നു. 82 മുതൽ 87 വരെ ഏഴാം നിയമസഭയിൽ പിള്ള കരുണാകരൻ മന്ത്രിസഭയിൽ വൈദ്യുതി മന്ത്രിയായി. വിവാദമായ 'പഞ്ചാബ്​ ​മോഡൽ' പ്രസംഗം അപ്പോഴായിരുന്നു. ഒമ്പതാം നിയമസഭയിൽ കരുണാകരനും എ.കെ. ആൻറണിക്കും കീഴിൽ മന്ത്രിയായി. ആൻറണി വീണ്ടും മുഖ്യമന്ത്രിയായ പതിനൊന്നാം നിയമസഭയിൽ മകൻ ​ഗണേഷ്​ കുമാറും ബാലകൃഷ്​ണപിള്ളയും ഗതാഗത മന്ത്രിമാരായിരുന്നു. രണ്ടു വർഷം മന്ത്രിയായിരുന്ന ഗണേഷിനെ രാജിവെപ്പിച്ച്​ പിള്ള മന്ത്രിയായതും ഏറെ ചർച്ചയായ വിഷയമാണ്​. പിന്നെ പിള്ള മന്ത്രി ആയതുമില്ല. 87ൽ സി.പി.ഐയിലെ ഇ. രാജേന്ദ്രനെയും 91ലും 96ലും സി.പി.എമ്മിലെ ജോർജ്​ മാത്യുവിനെയും 2001ൽ സി.പി.എമ്മിന്‍റെ രവീന്ദ്രൻ നായരെയും പിള്ള തോൽപ്പിച്ചു. 2006ലെ തെരഞ്ഞെടുപ്പിൽ കൊട്ടാരക്കര മണ്ഡലത്തിൽ പുതുമുഖമായ പി. ആയിഷ പോറ്റി എന്ന പുതുമുഖത്തോട്​ തോൽവി വഴങ്ങിയതോടെ പിള്ള തെരഞ്ഞെടുപ്പ്​ രാഷ്​ട്രീയത്തോട്​ സലാം പറഞ്ഞു.

2011ൽ പാർട്ടി സ്​ഥാനാർർഥി ഡോ. എൻ.എൻ. മുരളി കൊട്ടാരക്കരയിൽ ആയിഷ പോറ്റിയോടെ തോറ്റത്​ നിരാശയായെങ്കിലും ഗണേഷ്​ കുമാർ പത്തനാപുരത്തുനിന്ന്​ ജയിച്ചത്​ ആശ്വാസമായി. കാബിനറ്റ്​ പദവിയിൽ മുന്നാക്ക വികസന കോർപറേഷൻ ചെയർമാനായി പിള്ളയെ നിയമിച്ചത്​ സി.പി.എമ്മും വി.എസ്​ അച്യുതാനന്ദനും എതിർത്തിരുന്നു. ബാർ കോഴ കേസിന്‍റെ കാലത്ത്​ ബാറുടമ ബിജു രമേശുമായി നടത്തിയ ഫോൺ സന്ദേശം ചോർന്നതിനെ തുടർന്ന്​ ആ പദവി രാജിവെച്ചു. 2015ൽ പിള്ള യു.ഡി.എഫ്​ വിടുകയും ചെയ്​തു. 2016ൽ പിള്ളയുടെ പാർട്ടി ഇടതു മുന്നണിക്കൊപ്പമായിരുന്നു. അ​തോടെ ഒരിക്കൽ എതിർത്ത മുന്നാക്ക വികസന കോർപറേഷൻ ചെയർമാൻ പദവി അവർ പിള്ളക്ക്​ കാബിനറ്റ്​ റാ​ങ്കോടെ നൽകുകയും ചെയ്​തു.

ജയിൽവാസമൊരുക്കിയ രണ്ടുകേസുകൾ

കുറഞ്ഞകാലത്തേക്ക്​ ആണെങ്കിലും ബാലകൃഷ്​ണപിള്ളയെ ജയിലിൽ കിടത്തിയ കേസുകളാണ്​ ഗ്രാഫൈറ്റ്​ കേസും ഇടമലയാർ കേസും. വൈദ്യുതി മന്ത്രിയായിരിക്കെ കർണാടകയിലെ ഗ്രാഫൈറ്റ്​ കമ്പനിക്ക്​ വൈദ്യുതി മറിച്ചുവിറ്റ്​ കമ്പനിക്ക്​ വൻ ലാഭമുണ്ടാക്കാൻ അവസരമൊരുക്കുകയും സംസ്​ഥാന സർക്കാറിന്​ ഭീമമായ നഷ്​ടം വരുത്തിവെക്കുകയും ചെയ്​തുവെന്ന കേസിലായിരുന്നു 2001ൽ ജയിലിൽ കിടന്നത്​. ഏതാനും നാളുകൾക്കു ശേഷം ജയിൽമോചിതനായി.

കാൽനൂറ്റാണ്ട്​ നീണ്ട നിയമയുദ്ധത്തിനൊടുവിൽ 2011ൽ ഇടമലയാർ കേസിൽ വീണ്ടും ജയിലിലായി. ഒരു വർഷത്തേക്കാണ്​ ശിക്ഷിക്കപ്പെട്ടതെങ്കിലും 69 ദിവസം മാത്രമേ ജയിലിൽ കിടന്നുള്ളു. 251 ദിവസത്തിൽ 75 ദിവസം പരോളിലും 87ദിവസം ആശുപത്രിയിലുമായിരുന്നു. തന്നെ ജയിലിലാക്കിയ ഇടതുമുന്നണിയിൽ അവസാന കാലത്ത്​ കാബിനറ്റ്​ പദവിയിൽ മുന്നാക്ക ക്ഷേമ കമീഷൻ ചെയർമാനായി തിരിച്ചുകയറിയത്​ പിള്ളയുടെ മധുരപ്രതികാരം കൂടിയായി.