തിരുവനന്തപുരം: സുപ്രീംകോടതി അഭിഭാഷകനും കെ.എം.സി.സി ഡൽഹി ഘടകം പ്രസിഡന്റുമായ അഡ്വ. ഹാരിസ് ബീരാൻ മുസ്‍ലിം ലീഗിന്‍റെ രാജ്യസഭ സ്ഥാനാർഥി. തിരുവനന്തപുരത്ത് ചേർന്ന ലീഗ് ഉന്നതാധികാര സമിതി യോഗത്തിന്‍റെ തീരുമാനം രാഷ്ട്രീയ ഉപദേശകസമിതി ചെയർമാൻ പാണക്കാട് സാദിഖലി ശിഹാബ് തങ്ങളാണ് പ്രഖ്യാപിച്ചത്.
മുൻ അഡീഷണൽ അഡ്വക്കേറ്റ് ജനറൽ വി.കെ. ബീരാന്‍റെ മകനായ അഡ്വ. ഹാരിസ് ബീരാൻ ലോയേഴ്സ് ഫോറം ദേശീയ കൺവീനറാണ്.
ഭരണഘടനയെ സംരക്ഷിക്കാനുള്ള ദൗത്യമാണ് നമ്മൾ പാർലമെന്‍റിൽ നടത്തേണ്ടതെന്ന് ഹാരിസ് ബീരാൻ വാർത്താസമ്മേളനത്തിൽ വ്യക്തമാക്കി. ആ ദൗത്യവുമായി മുന്നോട്ടു പോകാനാണ് പാർട്ടി നിർദേശം. കേരളത്തിൽ ഓഫിസ് തുറന്ന് എം.പി എന്ന നിലയിൽ പ്രവർത്തനം ഏകോപിപ്പിക്കും. കഴിഞ്ഞ 25 വർഷമായി ഡൽഹി കേന്ദ്രീകരിച്ച് പ്രവർത്തിക്കുന്നതാവാം സ്ഥാനാർഥിയാക്കാനുള്ള തീരുമാനത്തിന് പിന്നിലെന്നും ഹാരിസ് ബീരാൻ പറഞ്ഞു.
എൻ.ഡി.എ സർക്കാറാണ് അധികാരത്തിൽ വരുകയെങ്കിൽ അഡ്വ. ഹാരിസ് ബീരാന് രാജ്യസഭയിലേക്ക് അവസരം നൽകുമെന്ന് ലീഗ് നേരത്തേ സൂചന നൽകിയ സാഹചര്യത്തിലാണ് അദ്ദേഹത്തെ പരിഗണിച്ചത്. ലീഗിന്റേത് ഉൾപ്പെടെ പല സുപ്രധാന കേസുകളും സുപ്രീംകോടതിയിൽ കൈകാര്യം ചെയ്യുന്നത് ഇദ്ദേഹമാണ്. നിയമജ്ഞനായ എം.പിക്ക് കൂടുതൽ പ്രസക്തിയുണ്ടെന്ന വിലയിരുത്തലാണ് ഹാരിസ് ബീരാന് അവസരം നൽകുന്നതിലേക്ക് എത്തിച്ചത്.
രാജ്യസഭയിലേക്ക് യൂത്ത് ലീഗ് ദേശീയ ജനറൽ സെക്രട്ടറി അഡ്വ. ഫൈസൽ ബാബുവിനെ മത്സരിപ്പിക്കണമെന്ന് ശക്തമായ ആവശ്യം നേരത്തെ ഉയർന്നിരുന്നു. ലീഗ് സംസ്ഥാന ജന. സെക്രട്ടറി പി.എം.എ സലാമിന്റെ പേരും സജീവ ചർച്ചയിലുണ്ടായിരുന്നു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.