സമസ്ത കേരള സുന്നി മഹല്ല് ഫെഡറേഷനും മദ്റസ മാനേജ്മെന്റ് അസോസിയേഷനും സംഘടിപ്പിച്ച പ്രക്ഷോഭ പ്രഖ്യാപന സമ്മേളനത്തിൽ അഡ്വ. ഹാരിസ് ബീരാൻ എം.പി സംസാരിക്കുന്നു
കോഴിക്കോട്: പൗരത്വ നിയമത്തെക്കാൾ ഭീകര നിയമമായി വഖഫ് ഭേദഗതി നിയമം മാറുമെന്ന് ഹാരിസ് ബീരാൻ എം.പി. വഖഫ്-മദ്റസ വിരുദ്ധ നീക്കത്തിനും വർഗീയ ധ്രുവീകരണത്തിനുമെതിരെ സമസ്ത കേരള സുന്നി മഹല്ല് ഫെഡറേഷനും മദ്റസ മാനേജ്മെന്റ് അസോസിയേഷനും സംയുക്തമായി നടത്തിയ പ്രക്ഷോഭ പ്രഖ്യാപന സമ്മേളനത്തിൽ സംസാരിക്കുകയായിരുന്നു അദ്ദേഹം. പിൻവാതിലിലൂടെ കോടികൾ മൂല്യമുള്ള വഖഫ് സ്വത്തുക്കൾ തട്ടിയെടുക്കാനാണ് കേന്ദ്ര സർക്കാർ ലക്ഷ്യമിടുന്നത്. സമൂഹത്തിൽ സ്പർധയുണ്ടാക്കാനുള്ള മാന്ത്രിക നിയമമാണിത്. ഒരു വിഭാഗം മതവിശ്വാസികളെ ലക്ഷ്യമിട്ടുള്ളതായതിനാൽ ഇത് ഭരണഘടന വിരുദ്ധമാണ്. ഇത് മുസ്‍ലിം വിഷയം മാത്രമല്ല. ചിലർ ഇതിനെ മുസ്‍ലിം വിഷയമാക്കുകയാണ്.
വാമൊഴിയായുള്ള സമർപ്പണം വഖഫാണ്. എന്നാൽ, പുതിയ നിയമത്തിൽ പറയുന്നത്; വാമൊഴി പോര, ആധാരം വേണമെന്നാണ്. അങ്ങനെ വരുമ്പോൾ ഉത്തർപ്രദേശിലടക്കമുള്ള കുറേ വർഷങ്ങൾ പഴക്കമുള്ള രേഖകളില്ലാത്ത വഖഫ് സ്വത്തുക്കൾ മുഴുവൻ സർക്കാറിന്റെ കൈകളിലാകും -അദ്ദേഹം കൂട്ടിച്ചേർത്തു.
സുന്നി മഹല്ല് ഫെഡറേഷൻ സംസ്ഥാന ട്രഷറർ പാണക്കാട് അബ്ബാസലി ശിഹാബ് തങ്ങൾ സമരപ്രഖ്യാപനം നിർവഹിച്ചു. നവംബർ 14ന് ജില്ല കമ്മിറ്റികളുടെ ആഭിമുഖ്യത്തിൽ കേന്ദ്ര ഭരണസ്ഥാപനങ്ങളിലേക്ക് മാർച്ചും ധർണയും നവംബർ 30ന് രാജ്ഭവൻ മാർച്ചും തുടർന്ന് ആവശ്യമെങ്കിൽ പാർലമെന്റിലേക്ക് മാർച്ചും നടത്തുമെന്ന് അദ്ദേഹം പറഞ്ഞു.
സമസ്ത കേരള ഇസ്‍ലാം മത വിദ്യാഭ്യാസ ബോർഡ് ജനറൽ സെക്രട്ടറി എം.ടി. അബ്ദുല്ല മുസ്‍ലിയാർ അധ്യക്ഷതവഹിച്ചു. യു.ഡി.എഫ് കൺവീനർ എം.എം. ഹസൻ മുഖ്യാതിഥിയായി. മുഹമ്മദ് കോയ തങ്ങൾ ജമലുല്ലൈലി, എം.കെ. രാഘവൻ എം.പി, ഡോ. എം.കെ. മുനീർ എം.എൽ.എ, കെ.പി.സി.സി ജനറൽ സെക്രട്ടറി അഡ്വ. നൗഷാദ് അലി, ഡി.സി.സി പ്രസിഡന്റ് അഡ്വ. കെ. പ്രവീൺ കുമാർ, പുത്തനഴി മൊയ്തീൻ ഫൈസി, അബ്ദുസമദ് പൂക്കോട്ടൂർ, നാസർ ഫൈസി കൂടത്തായി എന്നിവർ സംസാരിച്ചു. യു. മുഹമ്മദ് ഷാഫി ഹാജി സ്വാഗതവും മലയമ്മ അബൂബക്കർ ഫൈസി നന്ദിയും പറഞ്ഞു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.