കോട്ടയം: ഡി.വൈ.എഫ്.ഐ ജില്ല കമ്മിറ്റിയിലേക്ക് ആദ്യമായി ട്രാൻസ്ജെൻഡർ വനിത. ചങ്ങനാശ്ശേരി സ്വദേശിനി ലയ മരിയ ജെയ്സനാണ് കഴിഞ്ഞ ദിവസം പാമ്പാടിയിൽ നടന്ന ജില്ല സമ്മേളനത്തിൽ ജില്ല കമ്മിറ്റിയിലേക്ക് തെരഞ്ഞെടുക്കപ്പെട്ടത്.
നിലവിൽ തിരുവനന്തപുരത്ത് സോഷ്യൽ വെൽഫെയർ ബോർഡിൽ പ്രോജക്റ്റ് അസിസ്റ്റന്‍റാണ് 30കാരിയായ ലയ. തുരുത്തി മേഖല കമ്മിറ്റിയിലും ചങ്ങനാശ്ശേരി ബ്ലോക്ക് കമ്മിറ്റിയിലും അംഗമായിരുന്നു. ചങ്ങനാശ്ശേരി എസ്.ബി കോളജിൽനിന്ന് ഇക്കണോമിക്സിൽ ബിരുദം പൂർത്തിയാക്കി.
2016ൽ തന്‍റെ സ്വത്വം വെളിപ്പെടുത്തിയ ശേഷമാണ് പാർട്ടി പ്രവർത്തനം ആരംഭിക്കുന്നത്. 2019ൽ അംഗത്വം എടുത്തു. ഇനിയും ലഭിക്കാത്ത അവകാശങ്ങൾ നേടിയെടുക്കാൻ തന്‍റെ അംഗത്വം കരുത്തുനൽകുമെന്ന് ലയ പറഞ്ഞു. ട്രാൻസ്ജെൻഡർ സമൂഹത്തിന്‍റെ ശബ്ദമാകാനും അവർക്കുവേണ്ടി കൂടുതൽ കാര്യങ്ങൾ ചെയ്യാനും സഹായിക്കും.
പാർട്ടിയിൽ ഇതുവരെ വിവേചനം അനുഭവിച്ചിട്ടില്ല. പുരോഗമന പ്രസ്ഥാനങ്ങളും സർക്കാർ സംവിധാനങ്ങളും ട്രാൻസ്ജെൻഡർ സമൂഹത്തെ ചേർത്തുപിടിക്കുന്നുണ്ടെങ്കിലും പൊതുസമൂഹത്തിന്‍റെ കാഴ്ചപ്പാട് ഇനിയും മാറിയിട്ടില്ലെന്നും ലയ അഭിപ്രായപ്പെട്ടു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.