കാട്ടാനകൾ വീട് തകർത്തു; കിടന്നുറങ്ങുകയായിരുന്ന നാലുപേർക്ക് പരിക്ക്​

ഗൂഡല്ലൂർ: പുളിയംപാറ കോഴികൊല്ലി ആദിവാസി കോളനിയിൽ കാട്ടാനക്കൂട്ടം വീട് തകർത്തു. കിടന്നുറങ്ങുകയായിരുന്ന ഗൃഹനാഥനും ഭാര്യക്കും രണ്ട്​ മക്കൾക്കും പരിക്കേറ്റു. ഇവരെ ഊട്ടി ജില്ലാ ആശുപത്രിയിൽ പ്രവേശിപ്പിച്ചു. ആനകളുടെ ഇടിയിൽ തകർന്ന ചുമരി​െൻറ അവശിഷ്ടം ദേഹത്തേക്ക് വീണ്​ പരിക്കേൽക്കുകയായിരുന്നു.

ബുധനാഴ്ച പുലർച്ചെയാണ് സംഭവം. സ്ഥലത്തെത്തിയ വനപാലകരെ ആദിവാസികളടക്കമുള്ള നാട്ടുകാർ ഉപരോധിച്ചു. പതിവുപോലെ നടപടികൾ സ്ഥീകരിക്കുമെന്ന് ഉറപ്പ് നൽകിയതല്ലാതെ കൂടുതലൊന്നും പറഞ്ഞില്ല. അതേസമയം, ഉപ്പും, മധുരവും അരിയും തിന്ന് രുചിയറിഞ്ഞ കാട്ടാനകൾ വീടുകൾക്ക് നേരെ ആക്രമണം നടത്തുന്നത് നിസാരവത്കരിക്കരുതെന്നാണ്​ മുന്നറിയിപ്പ്​. പ്രതിരോധ മാർഗങ്ങൾ സ്വീകരിക്കാൻ ബന്ധപ്പെട്ട വകുപ്പിന് സർക്കാർ നിർദ്ദേശം നൽകണമെന്ന ആവശ്യവും ഉയർന്നു.