പിണങ്ങിപ്പോയ കാമുകിയെ മർദ്ദിച്ച്​ വായിൽ ഡീസൽ ഒഴിച്ച യുവാവ്​ പിടിയിൽ

കോട്ടയം: പിണങ്ങിപ്പിരിഞ്ഞ കാമുകിയെ തട്ടിക്കൊണ്ടുപോയി മർദ്ദിച്ച്​ അവശയാക്കി വായിൽ നിർബന്ധിച്ച്​ ഡീസൽ ഒഴിച്ച യുവാവ്​ പിടിയിലായി. ഓട്ടോഡ്രൈവറായ കടുവാക്കുളം മടമ്പുകാട് തൊണ്ടിപ്പറമ്പിൽ ജിതിൻ സുരേഷിനെയാണ്​ (24) കോട്ടയം ഈസ്റ്റ് പൊലീസ് പിടികൂടിയത്​.

ഓട്ടോയിൽ കയറ്റിക്കൊണ്ടുപോയി മർദിച്ചശേഷം വായിൽ ഡീസലൊഴിക്കുകയായിരുന്നു. വ്യാഴാഴ്ച വൈകീട്ട് നാലുമണിയോടെ പൂവന്തുരുത്തിലായിരുന്നു സംഭവം. പൂവന്തുരുത്ത് സ്വദേശിനിയായ 19കാരിയും ജിതിനും കുറേ കാലമായി അടുപ്പത്തിലായിരുന്നു. യുവാവിന്‍റെ സ്വഭാവ വൈകൃതത്തെ തുടർന്ന്​ പിന്നീട്​ പെൺകുട്ടി ബന്ധത്തിൽ നിന്ന്​ പിൻമാറി. പൂവന്തുരുത്തിൽ റോഡ്​ സൈഡിൽ സുഹൃത്തുമായി സംസാരിച്ചുനിൽക്കുന്നതിനിടെ ഓട്ടോയുമായി അടുത്തെത്തിയ യുവാവ് പെൺകുട്ടിയെ ബലമായി ഓട്ടോയിൽ കയറ്റി ഓടിച്ചുപോവുകയായിരുന്നു.

നാട്ടകം പാറേച്ചാൽ ബൈപ്പാസിലെ വിജനമായ സ്​ഥലത്ത്​ ഓ​ട്ടോ നിർത്തി. ജിതിൻ യുവതിയെ വലിച്ചിറക്കി മർദ്ദിച്ച് വസ്ത്രങ്ങൾ വലിച്ചുകീറി. വാഹനത്തിൽ കുപ്പിയിൽ സൂക്ഷിച്ചിരുന്ന ഡീസൽ എടുത്തി വായിൽ കുത്തിപ്പിടിച്ച്​ ഒഴിക്കുകയായിരുന്നു. ഡീസൽകുപ്പി തട്ടിത്തെറിപ്പിച്ച യുവതി ബഹളമുണ്ടാക്കിയതോടെ നാട്ടുകാർ ശ്രദ്ധിക്കുന്നതുകണ്ട പ്രതി പെൺകുട്ടിയെ വീണ്ടും ഓട്ടോയിൽ കയറ്റിക്കൊണ്ടുപോയി വീടിനുസമീപം ഇറക്കിവിട്ടു. രാത്രിയോടെ യുവതിയെ കോട്ടയം ജനറൽ ആശുപത്രിയിൽ പ്രവേശിപ്പിച്ചു. കഴിഞ്ഞ ദിവസം പുലർച്ചെ അറസ്റ്റ്​ ചെയ്​ത യുവാവിനെ റിമാൻഡ്​ ചെയ്​തു.