മുംബൈ: മുന്‍ കേരള ഹൈകോടതി ചീഫ് ജസ്റ്റിസ് മഞ്ജുള ചെല്ലൂര്‍ ബോംബെ ഹൈകോടതി ചീഫ് ജസ്റ്റിസായി ഉടന്‍ ചുമതലയേല്‍ക്കും. ഈ മാസം അവസാനത്തോടെ അവര്‍ ബോംബെ ഹൈകോടതിയില്‍ എത്തും. നിലവില്‍ കല്‍ക്കട്ട ഹൈകോടതി ചീഫ് ജസ്റ്റിസാണിവര്‍. കല്‍ക്കട്ട ഹൈകോടതിയുടെ ആദ്യ വനിതാ ചീഫ് ജസ്റ്റിസായ മഞ്ജുള ചെല്ലൂര്‍ ബോംബെ ഹൈകോടതിയുടെ രണ്ടാമത്തെ വനിതാ ചീഫ് ജസ്റ്റിസാകും. 1994ല്‍ ചുമതലയേറ്റ ജസ്റ്റിസ് സുജാതാ മനോഹറാണ് ബോംബെ ഹൈകോടതിയുടെ ആദ്യ വനിതാ ചീഫ് ജസ്റ്റിസ്. കര്‍ണാടക ഹൈകോടതിയിലെ ആദ്യ വനിതാ ജഡ്ജിയെന്ന വിശേഷണവും അവര്‍ക്കുണ്ട്. ബെല്ലാരിയില്‍ അഭിഭാഷകയായി തുടങ്ങിയ മഞ്ജുള ചെല്ലൂര്‍ 2000ത്തിലാണ് ഹൈകോടതി ജഡ്ജിയാകുന്നത്. 2011 നവംബറില്‍ ആക്ടിങ് ചീഫ് ജസ്റ്റിസായാണ് കേരള ഹൈകോടതിയില്‍ എത്തുന്നത്. 2014 ആഗസ്റ്റ് ആറിനാണ് കല്‍ക്കട്ട ഹൈകോടതി ചീഫ് ജസ്റ്റിസായത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.