പാരിസ്: ബാഴ്സ വിട്ടെത്തിയ ലയണൽ മെസ്സിക്ക് പി.എസ്.ജിയിൽ ജയത്തോടെ അരങ്ങേറ്റം. ഇരട്ട ഗോളുമായി എംബാപ്പെ നിറഞ്ഞാടിയ മത്സരത്തിൽ റീംസിനെതിരെ ഏകപക്ഷീയമായ രണ്ടു ഗോളുകൾക്കായിരുന്നു ജയം. ഗാലറി നിറഞ്ഞൊഴുകിയ കാണികകളെ ആവേശത്തേരിലേറ്റി 66ാം മിനിറ്റിൽ നെയ്മറുടെ പകരക്കാരനായാണ് മെസ്സി ഇറങ്ങിയത്. ബാഴ്സക്കു ശേഷം ആദ്യമായാണ് മെസ്സി മറ്റൊരു ക്ലബിനായി ബൂട്ടുകെട്ടുന്നത്.
ഇറങ്ങിയ നിമിഷം മുതൽ ആർത്തുവിളിച്ച് കാണികൾ നൽകിയ പിന്തുണ കാലിലാവാഹിച്ച പ്രകടനവുമായി മെസ്സി മൈതാനം നിറഞ്ഞ ദിനത്തിൽ ഉടനീളം പി.എസ്.ജിക്ക് തന്നെയായിരുന്നു മുൻതൂക്കം. താരം പുതിയ നിരക്കൊപ്പം പരിശീലനം ആരംഭിച്ചിട്ടുണ്ടെന്നും രണ്ടാഴ്ചക്കകം പൂർണ ഫോമിലേക്ക് തിരികെയെത്തുമെന്നും കോച്ച് മോറീസ്യോ പൊച്ചെറ്റിനോ പറഞ്ഞു.
ക്ലബിനൊപ്പം അവസാനത്തേതെന്ന് മാധ്യമങ്ങൾ വിശേഷിപ്പിച്ച മത്സരത്തിൽ ഇരട്ട ഗോൾ നേടിയാണ് എംബാപ്പെ കരുത്തു തെളിയിച്ചത്. 16 കോടി യൂറോ (1,391 കോടി രൂപ) ആണ് റയൽ താരത്തിന് മുന്നിൽവെച്ച ഓഫർ. എംബാപ്പെ ഇത് സ്വീകരിച്ചതായാണ് സൂചന. പി.എസ്.ജിക്കായി 175 കളികളിൽ ഇറങ്ങിയ താരം ഇതുവരെ 135 ഗോളുകൾ നേടിയിട്ടുണ്ട്.
നാലു കളികളിൽ നാലും ജയിച്ച് പി.എസ്.ജി തന്നെയാണ് ലിഗ് വണ്ണിൽ ഒന്നാം സ്ഥാനത്ത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.