മെൽബൺ: പുതുമുറത്തമ്പുരാക്കന്മാർ വില്ലുകുലച്ച മെൽബൺ പാർക്കിൽ കാർലോസ് അൽകാരസിനെ വീഴ്ത്തി അലക്സാണ്ടർ സ്വരേവിന്റെ സെമി ഫൈനൽ പ്രവേശനം. ആസ്ട്രേലിയൻ ഓപണിലെ അത്യാവേശകരമായ പുരുഷ സിംഗ്ൾസ് ക്വാർട്ടർ ഫൈനൽ പോരാട്ടത്തിൽ 6-1 6-3 6-7 (2-7) 6-4നായിരുന്നു സ്വരേവിന്റെ ജയം.
ആദ്യ രണ്ട് സെറ്റും അനായാസം സ്വന്തമാക്കിയ സ്വരേവിനെതിരെ അൽകാരസിന്റെ തിരിച്ചുവരവ് കണ്ട മൂന്നാം സെറ്റ് കളി മാറ്റുമെന്ന് തോന്നിച്ചെങ്കിലും സ്പാനിഷ് താരത്തെ വാഴാൻ വിടാതെ പിടിച്ചാണ് ജർമനിക്കാരൻ അവസാന നാലിൽ ടിക്കറ്റുറപ്പിച്ചത്. നേരത്തെ, സമാന പ്രകടനവുമായി പോളണ്ടിന്റെ ഒമ്പതാം സീഡ് ഹ്യൂബർട്ട് ഹർകാസിനെ അഞ്ചു സെറ്റ് നീണ്ട മത്സരത്തിൽ മറികടന്ന റഷ്യക്കാരൻ ഡാനിൽ മെദ്‍വദെവാകും സ്വരേവിന്റെ എതിരാളി. 2021ൽ യു.എസ് ഓപൺ കിരീട ജേതാവായ സ്വരേവിന് ഇനിയുള്ള രണ്ട് വമ്പൻ പോരുകൾ ജയിക്കാനായാൽ രണ്ടാം ഗ്രാൻഡ് സ്ലാം നേട്ടം സ്വന്തമാക്കാം.
നാളെ ആദ്യ സെമിയിൽ നൊവാക് ദ്യോകോവിച്ചും നാലാം സീഡ് ജാനിക് സിനറും തമ്മിലാണ് മത്സരം. വനിത സിംഗ്ൾസ് സെമി ഇന്ന് നടക്കും. യു.എസിന്റെ കോകോ ഗോഫ് നിലവിലെ ചാമ്പ്യൻ ബെലറൂസുകാരി അരീന സെബാലങ്കയെയും യുക്രെയ്ൻകാരി ഡയാന യാസ്ട്രെംസ്ക ചൈനയുടെ ക്വിൻവെൻ ജെങ്ങിനെയും നേരിടും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.