ചന്ദ്രനിൽ സൂര്യപ്രകാശം ഏൽക്കുന്നിടത്തും ജലസാന്നിധ്യം; സോഫിയയുടെ കണ്ടുപിടുത്തം നിർണായകമാകും

പാരീസ്​: ചന്ദ്ര​നിൽ സൂര്യപ്രകാശം ഏൽക്കുന്ന ഭാഗത്ത്​ ജല സാന്നിധ്യം കണ്ടെത്തിയതായി നാസ. നാസയുടെ സ്​​ട്രാറ്റോസ്​ഫെറിക്​ ഒബ്​സർവേറ്ററി ഫോർ ഇൻഫ്രാറെഡ് ​(സോഫിയ) എന്ന നിരീക്ഷണ സംവിധാനത്തി​​േൻറതാണ്​ നിർണായക കണ്ടുപിടുത്തം.

ഭൂമിയിൽനിന്ന്​ ദൃശ്യമാകുന്ന ക്ലാവിയസ്​ എന്ന ഗർത്തത്തിലാണ്​ ജല സാന്നിധ്യം കണ്ടെത്തിയത്​. ചന്ദ്രനിലെ തെക്കൻ അർധ ഗോളത്തിലെ ഏറ്റവും വലിയ ഗർത്തങ്ങളിൽ ഒന്നാണ്​ ക്ലാവിയസ്​. ഇതോടെ ചന്ദ്രനിലെ മിക്ക ഭാഗത്തും ജലം ഉണ്ടാകാമെന്ന നിഗമനത്തിലാണ്​ ശാസ്​ത്രജ്ഞർ. വിസ്​തൃതമായതും തണുത്തതും നിഴലുള്ളിടത്തും മാത്രമല്ല, മറ്റിടങ്ങളിലും ജലം ഉണ്ടാകാമെന്നും നാസ പറയുന്നു. ചന്ദ്രനിൽ സോഫിയ കണ്ടെത്തിയതിനേക്കാൾ 100 മടങ്ങ്​ ജലം സഹാറ മരുഭൂമിയിൽ ഉണ്ടെന്നും നാസ പറയുന്നു.

ഭൂമിയോട്​ ഏറ്റവും അടുത്ത്​ കിടക്കുന്ന ചന്ദ്രനിൽ ജലത്തി​െൻറ സാന്നിധ്യം ഉണ്ടെന്ന്​ നിരവധി കണ്ടെത്തലുകൾ സൂചിപ്പിച്ചിരുന്നു. മുമ്പ്​ കരുതിയിരുന്നതിനേക്കാൾ കൂടുതൽ ജലം ചന്ദ്രോപരിതലത്തിൽ ഉണ്ടാകാമെന്നും ഐസി​െൻറ സാന്നിധ്യമുണ്ടാകാമെന്നും നേച്ചർ അസ്​ട്രോണമിയിൽ പ്രസിദ്ധീകരിച്ച പുതിയ രണ്ടു പഠനത്തിൽ പറയുന്നു.

40,000 ചതുര​ശ്ര കിലോമീറ്ററിൽ അധികം ചന്ദ്രോപരിതലത്തിൽ ഐസ്​ രൂപത്തിൽ ജലസാന്നിധ്യം ഉണ്ടാകാമെന്ന്​ കൊ​ളറാഡോ സർവകലാശാലയിലെ പോൾ ഹെയ്​നി​െൻറ നേതൃത്വത്തിലുള്ള സംഘം അറിയിച്ചു. മുമ്പത്തെ കണക്കുകളേക്കാൾ 20 ശതമാനം കൂടുതൽ വിസ്​തീർണ്ണം ഇതിനുണ്ടാകാമെന്നും അവർ കൂട്ടിച്ചേർത്തു.

കൂടുതൽ പഠനങ്ങളിലൂടെ ചന്ദ്രനിൽ എവിടെയാണ്​ വെള്ളം സംഭരിച്ചുവെച്ചിരിക്കുന്നതെന്ന്​ കണ്ടുപിടിക്കാൻ സാധിക്കുമെന്ന്​ ഹവായ്​ ഇൻസ്​റ്റിറ്റ്യൂട്ട്​ ഒാഫ്​ ജിയോഫിസിക്​സ്​ ആൻഡ പ്ലാനറ്റോളജിയിലെ ശാസ്​ത്രജ്ഞനായ കാസി ഹോന്നിബാൾ പറഞ്ഞു. ചന്ദ്രനിലെ ചില സ്​ഥലങ്ങളിൽ ജലം ധാരാളമായുണ്ടെന്ന്​ കണ്ടെത്തിയാൽ അവ വിഭവങ്ങളായി ഉപയോഗിക്കാനാകും. കുടിവെള്ളം, ശ്വസന ഒാക്​സിജൻ, റോക്കറ്റ്​ ഇന്ധനം തുടങ്ങിയവയായി ഉപയോഗിക്കാനാകും -ഹോന്നിബാൾ കൂട്ടിച്ചേർത്തു.