സന്ദർശകർക്കായി വാതിൽ തുറന്നിട്ട ചെങ്കടലിലെ സിൻഡല ദ്വീപ്
ജിദ്ദ: ചെങ്കടലിൽ സൗദി അറേബ്യ നെയ്തുകൂട്ടുന്ന ടൂറിസം സങ്കൽപങ്ങൾ യാഥാർഥ്യമാവുന്നു. ആഡംബര സമുദ്ര വിനോദസഞ്ചാരത്തിനുള്ള ആഗോള ലക്ഷ്യസ്ഥാനമായ ‘സിൻഡല ദ്വീപ്’ സഞ്ചാരികൾക്കും സന്ദർശകർക്കുമായി വാതിൽ തുറന്നിട്ടതായി നിയോം ഡയറക്ടർ ബോർഡ് അറിയിച്ചു. ക്ഷണിക്കപ്പെട്ട അതിഥികളുടെ ആദ്യ സംഘത്തെ ദ്വീപ് വരവേറ്റു. സന്ദർശകരെ സ്വീകരിക്കുന്ന നിയോം പദ്ധതിയിലെ ലക്ഷ്യസ്ഥാനമായി മാറി സിൻഡല.
സമുദ്ര വിനോദസഞ്ചാരം ത്വരിതപ്പെടുത്തുന്നതിൽ നിയോം പദ്ധതികൾ കൈവരിച്ച പുരോഗതിയുടെ തെളിവാണ് ഈ ദ്വീപ് നിർമാണം. 2022 ഡിസംബറിൽ കിരീടാവകാശിയും നിയോം ഡയറക്ടർ ബോർഡ് ചെയർമാനുമായ അമീർ മുഹമ്മദ് ബിൻ സൽമാനാണ് സിൻഡല ദ്വീപിന്‍റെ വിനോദസഞ്ചാര വികസന പദ്ധതി പ്രഖ്യാപിച്ചത്. സൗദി ടൂറിസം മേഖലയുടെ വളർച്ചയിലേക്കുള്ള ഒരു സുപ്രധാന ചുവടുവെപ്പാണ് സിൻഡല.
നിയോമിന്റെ നേതൃത്വത്തിൽ നാല് തദ്ദേശീയ നിർമാണ കമ്പനികളും അവയ്ക്ക് കീഴിലുള്ള 60-ഓളം ഉപ കരാറുകാരുടെയും 30,000 തൊഴിലാളികളുടെയും രണ്ടുവർഷത്തെ അശ്രാന്തമായ പ്രയത്നങ്ങൾക്കൊടുവിലണ് സിൻഡല ദ്വീപ് യാഥാർഥ്യമാകുന്നത്. ദ്വീപ് സന്ദർശിക്കാൻ ക്ഷണിക്കപ്പെട്ട അതിഥികളുടെ ആദ്യ ബാച്ചിനെ സിൻഡല സ്വീകരിച്ചു.
സൗദിയുടെ വടക്കുപടിഞ്ഞാറ് ഭാഗത്തായി നിയോം തീരത്തുനിന്ന് അഞ്ച് കിലോമീറ്റർ അകലെ ചെങ്കടലിലെ ‘ടർക്കോയ്സ്’ ജലഭാഗത്തിന്‍റെ ഹൃദയഭാഗത്താണ് സിൻഡല സ്ഥിതി ചെയ്യുന്നത്.
ഈ സവിശേഷ ലക്ഷ്യസ്ഥാനം 84,000 ചതുരശ്ര മീറ്റർ വിസ്തൃതിയിൽ വ്യാപിച്ചുകിടക്കുന്നു. യൂറോപ്പ്, സൗദി, ജി.സി.സി രാജ്യങ്ങൾ എന്നിവിടങ്ങളിൽനിന്നുള്ള ബോട്ട്, കപ്പൽ എന്നിവക്ക് എളുപ്പവും സുഗമവുമായ പ്രവേശനത്തിന് അനുയോജ്യമായ, ചെങ്കടലിന്‍റെ കവാടമെന്ന് വിശേഷിപ്പിക്കാൻ പറ്റുന്ന സ്ഥലത്താണ് സിൻഡല സ്ഥിതി ചെയ്യുന്നത്.
മെഡിറ്ററേനിയൻ തീരത്തെ ഏറ്റവും പ്രധാനപ്പെട്ട സ്ഥലങ്ങളിൽനിന്ന് 17 മണിക്കൂർ കപ്പൽ യാത്രാദൂരമാണ് ഇവിടേക്കുള്ളത്. സാങ്കേതികവിദ്യയും വാസ്തുവിദ്യാ മികവും കൊണ്ട് നൂതനമായ രൂപകൽപനക്കൊപ്പം പ്രകൃതിസൗന്ദര്യം കൂടി ചേർന്ന് സിൻഡല ദ്വീപ് ഏറ്റവും മനോഹരവും സൗകര്യപ്രദവും മികവുറ്റതുമായ വിനോദസഞ്ചാര കേന്ദ്രമായി മാറുന്നു.
റസ്റ്റാറന്‍റുകൾ, ഹോട്ടലുകൾ, അന്താരാഷ്ട്ര സ്ഥാപനങ്ങൾ എന്നിവ ദ്വീപിലുണ്ട്. 3,500 ഓളം തൊഴിലവസരങ്ങളാണ് ഈ ദ്വീപിൽ പ്രതീക്ഷിക്കുന്നത്. 2028-ഓടെ പ്രതിദിനം 2400 സന്ദർശകരെ സ്വീകരിക്കും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.