വിധി -ഗഫൂർ അറയ്ക്കൽ എഴുതിയ കവിത

പൂർണചന്ദ്രനെ

കസ്റ്റഡിയിലെടുത്ത് ചോദ്യംചെയ്തപ്പോൾ

വിളറിവെളുത്ത അവൻ

വേഗം തന്നെ കുറ്റം സമ്മതിച്ചു.

കാലമിത്ര കഴിഞ്ഞിട്ടും,

കലങ്ങുന്ന കിടങ്ങായ

മുറിവുകളിലൂടെ കണ്ണീരൊഴുക്കുന്ന

ഭൂമിയാണ് ഇര.

എന്നാൽ

കൂരിരുട്ടി​ന്റെ

ഇരുണ്ട ഭൂഖണ്ഡത്തിലാണ്

എല്ലാം നടന്നതെന്നും

അതിനാൽ

തന്നെ കൂട്ടിക്കൊടുപ്പുകാരനാക്കരുതെന്നും

സൂര്യൻ

ഒരു ഘടികാരയന്ത്രംപോലെ

കൃത്യസമയത്ത്

മൊഴി കൊടുത്തു.

ഭൂമിയിലെ

സകല പച്ചിലകളും

നേതി നേതി എന്ന് നിലവിളിച്ചിട്ടും

കണ്ണുകെട്ടാത്ത

ന്യായത്തി​ന്റെ അധിപൻ

ഒറ്റവരിയിൽ വിധി പറഞ്ഞു.

‘‘പ്രധാന കർമസാക്ഷിയായ

സൂര്യൻ

കൂറ് മാറിയതിനാൽ

പ്രതിയെ

നിരുപാധികം വെറുതെവിടുന്നു.’’

ഗഫൂർ അറയ്ക്കൽ

മാധ്യമം ആഴ്​ചപ്പതിപ്പി​ന്റെ അടുത്ത സുഹൃത്തായിരുന്ന കവിയും നോവലിസ്​റ്റും തിരക്കഥാകൃത്തുമായിരുന്ന ഗഫൂർ അറയ്​ക്കൽ ആഗസ്​റ്റ്​ 17ന്​ വിടവാങ്ങി. ‘രാത്രിഞ്ചരനായ ബ്രാഞ്ച്​ സെക്രട്ടറി’, ‘ഒരു ഭൂതത്തി​ന്റെ ഭാവിജീവിതം’ തുടങ്ങിയ കൃതികളുടെ രചയിതാവാണ്​. ‘ലൂക്കാ ചുപ്പി’ എന്ന സിനിമയുടെ തിരക്കഥയും ‘എന്ന് നിന്റെ മൊയ്തീൻ’ സിനിമയിലെ സംഭാഷണങ്ങളും എഴുതിയത് അദ്ദേഹമാണ്​. ആഗസ്​റ്റ്​ 17ന്​ ഗഫൂർ അറയ്​ക്കലി​ന്റെ നോവൽ ‘ദ കോയ’യുടെ പ്രകാശനം നിശ്ചയിച്ചിരുന്നു. ദീർഘകാലമായി രോഗത്തോട്​ പോരാടിയാണ്​ അദ്ദേഹം എഴുത്തിൽ സജീവമായി തുടർന്നത്​. ആഴ്​ചപ്പതിപ്പിൽ പ്രസിദ്ധീകരിച്ച, ​അദ്ദേഹത്തി​ന്റെ ‘കോഴിക്കോടൻ ഹലുവ’ക്ക്​ (2020) വലിയ സ്വീകരണമാണ്​ ലഭിച്ചത്​. ഇൗ കഥ ഇംഗ്ലീഷിലേക്ക്​ മൊഴിമാറ്റപ്പെട്ടു. ഗഫൂർ അറയ്​ക്കലി​ന്റെ വിടവാങ്ങലിൽ ആഴ്​ചപ്പതിപ്പും ​ദുഃഖിക്കുന്നു.