കസേരയിൽ ചുരുണ്ടുറങ്ങും പേരൻ
പെട്ടെന്ന് ഉറക്കമുണർന്ന്
തേനൂർന്ന വായോടെ
അക്ഷരംപെറുക്കിയെടുത്ത് ചിരിച്ച്
‘‘സർപ്പശുദ്ധി വരുത്തിയപോലൊരു മുത്തശ്ശി’’
എന്ന്
എന്റെ
കവിളിൽ നുള്ളിക്കൊണ്ടു പറഞ്ഞു.
ഉറക്കമുണർന്ന്
നുണക്കുഴിയിൽ
ഞാനവനെ
തിരഞ്ഞുകൊണ്ടിരിക്കുന്നു.
മരിച്ചു പോയവരെല്ലാം ജീവിച്ചിരിക്കുന്നവരുടെ
കൺപോളകളിലിരുന്ന് ധ്യാനിക്കുന്നത്
മിന്നൽപോലെ വെളിപ്പെട്ടു.
പൊടുന്നനെ
നാളുകളായ്
വരാതിരുന്ന
പതിവു ഭിക്ഷക്കാരി
മുറ്റത്തു വന്നു നിന്നു ചിരിച്ചു
കിണ്ണം നിറയെ ചോറു കൊടുത്തു.
എനിക്കും
അവർക്കും
കണ്ണു നിറഞ്ഞു.
മുന്നേ
മരിച്ചുപോയവർ
കൺപോളയിലിരുന്ന് ചിരിച്ചു.
പുനർജന്മമെന്നാൽ
വീണ്ടും
കാണൽ തന്നെ!
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.