‘ച​ങ്ങ​ല'​യു​ടെ രാ​ഷ്ട്രീ​യം’ -പി.​കെ. പാ​റ​ക്ക​ട​വ് എഴുതുന്നു

വ​ട​ക്കേ മ​ല​ബാ​റി​ലെ മു​സ്‌​ലിം സാ​മൂ​ഹി​ക ജീ​വി​തം വി​ശ​ദ​മാ​യി, വി​പു​ല​മാ​യി അ​ട​യാ​ള​പ്പെ​ടു​ത്തി​യ ആ​ദ്യ കൃ​തി യ​ു.​എ. ഖാ​ദ​റി​ന്റെ ‘ച​ങ്ങ​ല’​യാ​ണെ​ന്ന്​ ക​ഥാ​കൃ​ത്തു​കൂ​ടി​യാ​യ ലേ​ഖ​ക​ൻ വാ​ദി​ക്കു​ന്നു. 

വ​ട​ക്കേ മ​ല​ബാ​റിെ​ന്റ മു​സ്‌​ലിം സാ​മൂ​ഹി​ക ജീ​വി​ത​ത്തി​ന്റെ ആ​ദ്യ​ത്തെ ച​രി​ത്ര​രേ​ഖ എ​ന്ന് വി​ശേ​ഷി​പ്പി​ക്കാ​വു​ന്ന, യു.​എ. ഖാ​ദ​റി​ന്റെ ‘ച​ങ്ങ​ല’ എ​ന്ന നോ​വ​ൽ പ്ര​സി​ദ്ധീ​ക​രി​ച്ചി​ട്ട് അ​ര നൂ​റ്റാ​ണ്ടി​ലേ​റെ​യാ​യി. വ​ട​ക്കേ മ​ല​ബാ​റി​ലെ മു​സ്‌​ലിം സാ​മൂ​ഹി​കജീ​വി​തം ഇ​ത്ര വി​ശ​ദ​മാ​യി, ഇ​ത്ര വി​പു​ല​മാ​യി അ​ട​യാ​ള​പ്പെ​ടു​ത്തി​യ മ​റ്റൊ​രു കൃ​തി ച​ങ്ങ​ല​യെ​പ്പോ​ലെ മ​ല​യാ​ള സാ​ഹി​ത്യം അ​ക്കാ​ലംവ​രെ ക​ണ്ടി​രു​ന്നി​ല്ല.

‘ച​ങ്ങ​ല​ക്കു’ ശേ​ഷം വ​ന്ന ച​ങ്ങ​ല​യോ​ളം ആ​ഴ​മി​ല്ലാ​ത്ത മു​സ്‌​ലിം സാ​മൂ​ഹി​കജീ​വി​തം പ​ശ്ചാ​ത്ത​ല​മാ​യി എ​ഴു​തി​യ കൃ​തി​ക​ൾ ആ​ഘോ​ഷി​ക്ക​പ്പെ​ട്ട​പ്പോ​ഴും യു.​എ. ഖാ​ദ​റി​ന്റെ ഏ​റെ പ​ഠ​നാ​ർ​ഹ​മാ​യ ഈ ​കൃ​തി​യെ​ക്കു​റി​ച്ച് മൗ​നം​പാ​ലി​ക്കു​ക​യാ​ണ് വ​ലി​യ എ​ഴു​ത്തു​കാ​രും നി​രൂ​പ​ക​രു​മൊ​ക്കെ ചെ​യ്ത​ത്. ഖാ​ദ​ർ​ത​ന്നെ മു​മ്പ് ‘മാ​ധ്യ​മം വാ​ർ​ഷി​ക​പ്പ​തി​പ്പി’​ന്റെ ഒ​രു അ​ഭി​മു​ഖ​ത്തി​ൽ പ​റ​യു​ന്നു​ണ്ട്. ‘‘ ‘ച​ങ്ങ​ല’ അ​ച്ച​ടി​ച്ചു​വ​ന്ന പ്ര​സി​ദ്ധീ​ക​ര​ണ​ത്തി​ൽ​ത​ന്നെ ഈ ​നോ​വ​ൽ വ​രു​ന്ന​കാ​ല​ത്ത് ഇ​ത് വ​രാ​തി​രി​ക്കാ​ൻ​വേ​ണ്ടി പ​ല ശ്ര​മ​വും ന​ട​ന്നു... എ​ൻ.​കെ. ദാ​മോ​ദ​ര​ന്റെ ആ​മു​ഖ​ത്തോ​ടെ അ​ത് പു​സ്ത​ക​മാ​യ​ത് എ​ൻ.​ബി.​എ​സ് വ​ഴി​യാ​യി​രു​ന്നു. അ​ക്കാ​ല​ത്ത് ഇ​ത് പു​സ്ത​ക​മാ​യ​പ്പോ​ൾ എം.​ആ​ർ. ച​ന്ദ്ര​ശേ​ഖ​ര​ൻ പ​റ​ഞ്ഞ​ത് ഇ​ത് മു​സ്‍ലിം​ക​ളു​ടെ ‘ഇ​ന്ദു​ലേ​ഖ’​യാ​ണെ​ന്നാ​ണ്. എ​ങ്കി​ലും, അ​ത് മു​ഖ്യ​ധാ​ര​യി​ലെ​ത്തി​യി​ല്ല. പി​ന്നീ​ട് മ​റ്റു ചി​ല​ർ അ​തേ ജീ​വി​തപ​ശ്ചാ​ത്ത​ലംവെ​ച്ച് നോ​വ​ൽ എ​ഴു​തി​യ​പ്പോ​ൾ ആ​ഘോ​ഷി​ക്ക​പ്പെ​ടു​ക​യും ചെ​യ്തു.’’

‘ച​ങ്ങ​ല’​യി​ൽ ഉ​പ്പു കു​റു​ക്ക​ലും ബ്രി​ട്ടീ​ഷു​കാ​ർ​ക്കെ​തി​രാ​യ സ​മ​ര​വു​മു​ണ്ട്. ജ​ന്മി-​കു​ടി​യാ​ൻ വ്യ​വ​സ്ഥ​യു​ടെ ത​ക​ർ​ച്ച​യും മ​ഹാ​യു​ദ്ധ​ത്തി​ന്റെ അ​ല​യൊ​ലി​ക​ളു​മു​ണ്ട്. സു​ന്നി-​മു​ജാ​ഹി​ദ് ത​ർ​ക്ക​ങ്ങ​ളും അ​തി​നു​മു​മ്പ് നോ​വ​ലു​ക​ളി​ൽ വ​ന്നി​ട്ടി​ല്ല. ഇ​തി​നെ​ക്കാ​ളു​പ​രി ‘ച​ങ്ങ​ല’​യി​ലു​ള്ള ആ​ഴ​ത്തി​ലു​ള്ള രാ​ഷ്ട്രീ​യ​വും യു.​എ. ഖാ​ദ​ർ എ​ന്ന എ​ഴു​ത്തു​കാ​ര​ന്റെ നി​ല​പാ​ടു​ക​ളും കാ​ണാ​തെ പോ​വ​രു​ത്.

തി​ത്താ​യി ബ​ഡു​വ​നെ ചാ​ട്ട​വാ​ർ​കൊ​ണ്ട് അ​ടി​ക്കു​ന്ന​ത് ക​ണ്ട് കു​തി​ര​പ്പ​ന്തി​യി​ൽ​നി​ന്ന് ഹൈ​ദ​റി​​െന്റ ശ​ബ്ദം ഉ​യ​രു​ന്ന​ത് കേ​ൾ​ക്കു​ക. ‘‘ഹം​ക്കേ, നി​ന​ക്ക് ത​ല്ലാ​ൻ വേ​റെ ആ​രും ല്ല​ടാ?’’ സ​ർ​വ​പ്ര​താ​പ​ങ്ങ​ളോ​ടും​കൂ​ടി ജീ​വി​ക്കു​ന്ന കു​ഞ്ഞാ​മു അ​ധി​കാ​രി​ക്കെ​തി​രെ ഉ​യ​രു​ന്ന ആ​ദ്യ​ത്തെ പ്ര​തി​ഷേ​ധ ശ​ബ്ദം. കോ​ലോ​ത്തു ത​റ​വാ​ടും മേ​ലെ​പ്പാ​ട​ത്തു ത​റ​വാ​ടും അ​വി​ടെ വാ​ഴു​ന്ന കു​ഞ്ഞാ​മു അ​ധി​കാ​രി​യും അ​ന്ത്രു ഹാ​ജി​യും മാ​ത്ര​മ​ല്ല, ‘ച​ങ്ങ​ല’​യി​ൽ മി​ഴി​വോ​ടെ വ​രു​ന്ന​ത്. അ​ടി​മ​ക​ളാ​യി ക​ഴി​യു​ന്ന ഒ​രു ജ​ന​ത​യു​ടെ ചി​ത്ര​വും മു​സ്‌​ലിം സ്ത്രീ​ക​ളു​ടെ അ​ക​ത്ത​ള​ങ്ങ​ളി​ലെ സ​ഹ​ന​ത്തി​ന്റെ ചി​ത്ര​വും നോ​വ​ലി​സ്റ്റ് വ​ര​ച്ചി​ടു​ന്നു​ണ്ട്.

ഇ​യ്യ്ണ്ണി, ഉ​പ്പുകു​റു​ക്ക​ൽ സ​മ​ര​ത്തി​നി​ട​യി​ൽ കു​ഞ്ഞാ​മു അ​ധി​കാ​രി​യു​ടെ മു​ഖ​ത്ത് നോ​ക്കി ‘‘​വെ​ള്ള​ക്കാ​ര​ന്റെ ച​ങ്ങ​ല​ക്കി​ട്ട നാ​യെ’’ എ​ന്ന് വി​ളി​ക്കു​ന്ന ഒ​രു രം​ഗ​മു​ണ്ട്. പ​ണ്ട് അ​ധി​കാ​രി​യു​ടെ കാ​ലു തി​രു​മ്മി കൊ​ടു​ക്കു​ന്ന അ​തേ ഇ​യ്യ്‌​ണ്ണി, മു​ഹ​മ്മ​ദ്‌ അ​ബ്ദു​റ​ഹ്മാ​ന്റെ​യും കെ. ​കേ​ള​പ്പ​ന്റെ​യും നേ​തൃ​ത്വ​ത്തി​ൽ ന​ട​ക്കു​ന്ന ഉ​പ്പുകു​റു​ക്ക​ൽ സ​ത്യ​ഗ്ര​ഹ​ത്തി​ൽ പ​ങ്കെ​ടു​ക്കു​മ്പോ​ൾ ഉ​ണ്ടാ​കു​ന്ന ധൈ​ര്യം (മൂ​ടാ​ടി​യി​ലെ നാ​യ​രും കോ​ഴി​ക്കോ​ട്ടെ സാ​ഹി​ബും എ​ന്ന് നോ​വ​ലി​ൽ).

ഒ​രുകാ​ല​ത്ത് കു​തി​ര​ച്ചാ​ണ​ക​ത്തി​ൽ മു​ങ്ങി​ക്കു​ളി​ച്ച ഹൈ​ദ​ർ, കോ​ല​ത്തു ത​റ​വാ​ട് വി​ല​യ്ക്ക് വാ​ങ്ങു​ന്ന​ത് കാ​ണാം. മാ​റ്റ​ത്തി​ന്റെ ഒ​രു ച​രി​ത്രം​കൂ​ടി​യാ​ണ് ‘ച​ങ്ങ​ല’. എ​ന്നും ഒ​ന്നും ഒ​രു​പോ​ലെ​യാ​യി​രി​ക്കി​ല്ല എ​ന്ന ക​വി​വ​ച​നം ന​മ്മെ ബോ​ധ്യ​പ്പെ​ടു​ത്തു​ന്ന എ​ഴു​ത്തു​കാ​ര​ൻ. മു​ട്ട​യി​ൽ വി​രി​ഞ്ഞ പ​യ്യ​ന്മാ​ർ​ക്കെ​ല്ലാം ധി​ക്കാ​ര​ത്തി​ന്റെ കാ​ലം​വ​രു​മെ​ന്നും വ​ര​ണ​മെ​ന്നും സ്വ​പ്നം ക​ണ്ട എ​ഴു​ത്തു​കാ​ര​ൻ​കൂ​ടി​യാ​യി​രു​ന്നു യു.​എ. ഖാ​ദ​റെ​ന്ന് ‘ച​ങ്ങ​ല’ ബോ​ധ്യ​പ്പെ​ടു​ത്തു​ന്നു.

ബ്രി​ട്ടീ​ഷു​കാ​ര​ന്റെ മൂ​ട് താ​ങ്ങി​യാ​യ, ക​ണ്ട ചാ​ത്ത​നും പോ​ത്ത​നും സ്വാ​ത​ന്ത്ര്യം ല​ഭി​ച്ചാ​ൽ അ​ധി​കാ​ര​ത്തി​ൽ വ​രു​മെ​ന്ന് പ​ര​സ്യ​മാ​യി പ​റ​ഞ്ഞ കു​ഞ്ഞാ​മു അ​ധി​കാ​രി​ത​ന്നെ​യാ​യി​രു​ന്നു സ്വാ​ത​ന്ത്ര്യ​ദി​നം ആ​ഘോ​ഷി​ക്കാ​നു​ള്ള ക​മ്മി​റ്റി​യു​ടെ അ​ധ്യ​ക്ഷ​നും. ഇ​ന്നും സ്വാ​ത​ന്ത്ര്യ​സ​മ​ര​ത്തെ ഒ​റ്റി​ക്കൊ​ടു​ത്ത സ​വ​ർ​ക്ക​ർ​മാ​ർ ആ​ഘോ​ഷി​ക്ക​പ്പെ​ടു​ന്ന കാ​ല​ത്ത് ‘ച​ങ്ങ​ല’​യി​ൽ അ​രനൂ​റ്റാ​ണ്ടു​ മു​മ്പ് എ​ഴു​തി​യ കാ​ര്യ​ങ്ങ​ൾ പ്ര​സ​ക്ത​മാ​ണെ​ന്ന് നാ​മ​റി​യു​ന്നു.

ഏ​റ്റ​വും ഒ​ടു​വി​ൽ ഭീ​ക​രബ​ന്ധം ആ​രോ​പി​ച്ച് ജ​യി​ലി​ൽ അ​ക​പ്പെ​ട്ട് ക​സ്റ്റ​ഡി​യി​ൽ മ​രി​ച്ച സ്റ്റാ​ൻ സ്വാ​മി​യു​ടെ ക​ഥ ന​മ്മു​ടെ മു​ന്നി​ലു​ണ്ട്. സ്റ്റാ​ൻ സ്വാ​മി​യു​ടെ ക​മ്പ്യൂ​ട്ട​റി​ൽ ഹാ​ക്ക​ർ രേ​ഖ​ക​ൾ സ്ഥാ​പി​ച്ചാ​യി​രു​ന്നു അ​ദ്ദേ​ഹ​ത്തെ രാ​ജ്യ​ദ്രോ​ഹി​യാ​ക്കി ജാ​മ്യം​പോ​ലും ല​ഭി​ക്കാ​തെ ത​ട​വ​റ​യി​ലാ​ക്കി​യ​ത് എ​ന്ന സ​ത്യം പു​റ​ത്തു​വ​ന്നി​രി​ക്കു​ന്നു.

‘ച​ങ്ങ​ല’​യി​ലെ കോ​ലോ​ത്തു കു​ഞ്ഞാ​മു അ​ധി​കാ​രി​യു​ടെ വ​ലി​യ ഹി​മാ​ല​യ​ൻ രൂ​പ​ങ്ങ​ളാ​ണോ ഇ​പ്പോ​ഴും സിം​ഹാ​സ​ന​ത്തി​ൽ?

കു​ഞ്ഞാ​മു അ​ധി​കാ​രി​ക്ക് എ​തി​രു നി​ൽ​ക്കു​ന്ന​വ​രെ​ല്ലാം അ​ന്ന് രാ​ജ്യ​ദ്രോ​ഹി​ക​ൾ ആ​യി​രു​ന്നു. ഇ​ന്ന​ത്തെ ഇ​ന്ത്യ​ന​വ​സ്ഥ​യി​ൽ അ​രനൂ​റ്റാ​ണ്ടി​ന് മു​മ്പേ വ​ന്ന ‘ച​ങ്ങ​ല’ ഒ​രു രാ​ഷ്ട്രീ​യ വാ​യ​ന ആ​വ​ശ്യ​പ്പെ​ടു​ന്നു​ണ്ട്.