വാഷിങ്ടൺ: വംശവെറി വാണ ട്രംപ് യുഗത്തിന് അറുതി കുറിച്ച് അമേരിക്കയുടെ പ്രസിഡന്റായി ജോ ബൈഡൻ വരാൻ മണിക്കൂറുകൾ ബാക്കിനിൽക്കെ ശുഭസൂചനയായി പുതിയ നിയമനം. ഇന്ത്യൻ വംശജ സമീറ ഫാസിലിക്ക് ദേശീയ സാമ്പത്തിക കൗൺസിൽ ഡെപ്യൂട്ടി ഡയറക്ടർ പദവി നൽകിയാണ് ബൈഡൻ പ്രതീക്ഷ പകരുന്നത്.
വൈറ്റ്ഹൗസ് ആസ്ഥാനമായുള്ള ദേശീയ സാമ്പത്തിക കൗൺസിലിനാണ് ഭരണകൂടത്തിന്റെ സാമ്പത്തിക നയ രൂപവത്കരണ ചുമതല. യു.എസ് പ്രസിഡന്റിന് സാമ്പത്തിക ഉപദേശം നൽകുന്നതും കൗൺസിലാണ്.
ബൈഡൻ- ഹാരിസ് കൂട്ടുകെട്ടിന്റെ എക്കണോമിക് ഏജൻസി മേധാവിയാണ് നിലവിൽ ഫാസിലി. നേരത്തെ, അറ്റ്ലാന്റ ഫെഡറൽ റിസർവ് ബാങ്കിലും ഇവർ മുതിർന്ന ഉദ്യോഗസ്ഥയായിരുന്നു.
വരാനിരിക്കുന്ന ബൈഡൻ ഭരണകൂടത്തിൽ ചുമതല ലഭിക്കുന്ന കശ്മീരി വേരുകളുള്ള രണ്ടാമത്തെ ഇന്ത്യൻ വംശജയാണ് ഫാസിലി. ഡിജിറ്റൽ സ്ട്രാറ്റജി വൈറ്റ്ഹൗസ് ഓഫീസ് പാർട്ണർഷിപ് മാനേജറായി കഴിഞ്ഞ ഡിസംബറിൽ ആയിശ ഷായെയും നിയമിച്ചിരുന്നു.
നേരത്തെ, ഒബാമ- ബൈഡൻ ഭരണകൂടത്തിൽ ഫാസിലി ഇതേ കൗൺസിലിൽ സീനിയർ പോളിസി ഉപദേഷ്ടാവായി ഫാസിലി സേവനമനുഷ്ഠിച്ചിട്ടുണ്ട്. അതിന് മുമ്പ് യേൽ ലോ സ്കൂൾ ക്ലിനിക്കൽ ലക്ചററായിരുന്നു.
യേൽ ലോ സ്കൂൾ, ഹാർവാർഡ് കോളജ് എന്നിവിടങ്ങളിൽ വിദ്യാഭ്യാസം പൂർത്തിയാക്കിയ ഫാസിലി ഭർത്താവിനും മൂന്ന് മക്കൾക്കുമൊപ്പം ജോർജിയയിലാണ് താമസം.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.