കൊച്ചി: വിവാഹ മേക്കപ്പിനിടെ ലൈംഗികാതിക്രമം നടത്തിയ മേക്കപ്പ് ആർട്ടിസ്റ്റിനെതിരെ വീണ്ടും പരാതി. ആസ്ട്രേലിയയില്‍ താമസിക്കുന്ന മലയാളി യുവതിയാണ് കൊച്ചിയിലെ പ്രശസ്ത ബ്രൈഡൽ മേക്കപ്പ് ആർട്ടിസ്റ്റ് അനീസ് അൻസാരിക്കെതിരെ കമീഷണർക്ക് പരാതി നല്‍കിയത്. 2015ൽ വിവാഹത്തിനായി മേക്കപ്പ് ചെയ്യാൻ എത്തിയ തന്നെ ലൈംഗിക ചൂഷണത്തിന് ഇരയാക്കിയെന്നാണ് യുവതിയുടെ പരാതി.
എറണാകുളം ചക്കരപ്പറമ്പ് സ്വദേശിയായ അനീസ് അൻസാരിക്കെതിരെ പാലാരിവട്ടം പൊലീസില്‍ മൂന്ന് കേസുകളാണ് രജിസ്റ്റർ ചെയ്തിരിക്കുന്നത്. അതേസമയം അനീസ് അൻസാരി വിദേശത്തേക്ക് കടന്നതായാണ് സൂചന. സ്റ്റുഡിയോയിൽ വെച്ച്‌ പീഡിപ്പിച്ചെന്ന് വെളിപ്പെടുത്തി ഒരാഴ്ച മുമ്പ് യുവതികൾ സമൂഹമാധ്യമത്തിൽ മീ ടൂ പോസ്റ്റ് ഇട്ടിരുന്നു. ഇതിന് പിന്നാലെയാണ് പ്രതി ദുബൈയിലേക്ക് കടന്നതെന്ന് സംശയിക്കുന്നു.
വിവാഹ മേക്കപ്പിനിടെ ലൈംഗികാതിക്രമം നടത്തിയ മേക്കപ്പ്മാനെതിരെ യുവതികളുടെ പരാതിയിൽ കേസെടുത്തിട്ടുണ്ട്. കേരളത്തിന് പുറത്ത് താമസിക്കുന്ന മൂന്ന് യുവതികളാണ് സിറ്റി പൊലീസ് കമീഷണർ സി.എച്ച്. നാഗരാജുവിന് പരാതി നൽകിയത്.
വിവാഹത്തിന് ഒരാഴ്ച മുമ്പ് സ്റ്റുഡിയോയിൽ എത്തിയപ്പോൾ പ്രതി വസ്ത്രങ്ങൾ അഴിച്ചുമാറ്റുകയും അപമര്യാദയോടെ പെരുമാറുകയും ചെയ്തെന്നാണ് അനുഭവം പങ്കുവെച്ച ആദ്യ യുവതിയുടെ പരാതി. ഇതോടെ മേക്കപ്പ് ചെയ്യുന്നത് നിർത്താൻ ആവശ്യപ്പെട്ടെന്നും ബുക്കിങ് റദ്ദാക്കിയെന്നും മേക്കപ്പ്മാന്‍റെ പ്രവൃത്തി കടുത്ത മാനസികപ്രശ്നങ്ങൾക്ക് വഴിവെച്ചെന്നും യുവതി വെളിപ്പെടുത്തിയിരുന്നു. ആദ്യം പരാതി നൽകിയ യുവതി മറ്റ് യുവതികൾ നേരിട്ട അനുഭവങ്ങൾ കൂടി സ്വന്തം സമൂഹമാധ്യമത്തിൽ പോസ്റ്റ് ചെയ്തിരുന്നു.
സമൂഹമാധ്യമത്തിൽ മീ ടൂ പോസ്റ്റ് ഇട്ടത് ശ്രദ്ധയിൽപെട്ട ഉടനെ സ്വമേധയ അന്വേഷണം ആരംഭിച്ചതായി സി.എച്ച്. നാഗരാജു പറഞ്ഞു. പ്രതിയുടെ മൊബൈൽ ഫോൺ ഓഫാണെന്നും അന്വേഷണം ഊർജിതമാക്കിയിട്ടുണ്ടെന്നും കമീഷണർ വ്യക്തമാക്കി.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.