യുവതിയുടെ ഏഴാമത്തെ ഭർത്താവിനെ കൊന്നത്​ എട്ടാമത്തെ കാമുകൻ; രണ്ടുപേരും അറസ്റ്റിൽ

ആഗ്ര: ആക്രിക്കച്ചവടക്കാരനായ ആഗ്രയിലെ രാജേന്ദ്ര യാദവിനെ കൊലപ്പെടുത്തിയത്​ ഭാര്യ ജെമാവിന്‍റെ എട്ടാമത്തെ കാമുകനെന്ന്​ പൊലീസ്​. രാജു എന്ന സുഖ്​ദേവാണ്​ യുവതിയുടെ ഏഴാമത്തെ ഭർത്താവായ രാജേന്ദ്രയെ കൊലപ്പെടുത്തിയതെന്നാണ്​ കണ്ടെത്തൽ. എട്ടാമത്തെ വിവാഹം കഴിക്കാനുള്ള ശ്രമത്തിന്‍റെ ഭാഗമാണ്​ ​കൊലപാതകമെന്നും പൊലീസ്​ പറഞ്ഞു.

ജൂൺ 26 നാണ് രാജേന്ദ്രയെ നടപ്പാതയിൽ മർദനമേറ്റ്​ മരിച്ച നിലയിൽ കണ്ടെത്തിയത്​. ഫിറോസാബാദിലെ ജസ്രാന നിവാസിയാണ്​ രാജേന്ദ്ര യാദവ്. ആഗ്ര കോട്ടയ്ക്ക് മുന്നിലുള്ള കുടിലിലായിരുന്നു താമസം. കൊല്ലപ്പെടുമ്പോൾ ഭാര്യയും മൂന്ന് മക്കളും അദ്ദേഹത്തോടൊപ്പം ഉണ്ടായിരുന്നു. നാലുപേർ വന്ന്​ ഭർത്താവിനെ കൊലപ്പെട​ുത്തി ഓടിപ്പോയെന്നായിരുന്നു ഭാര്യ ജെമാവ്​ പൊലീസിന്​ നൽകിയ മൊഴി. എന്നാൽ, മൊഴിയിൽ പൊരുത്തക്കേട്​ തോന്നിയ പൊലീസ്​ നടത്തിയ വിശദമായ അന്വേഷണത്തിലാണ്​ രാജേന്ദ്ര ഇവരുടെ ഏഴാമത്തെ ഭർത്താവാണെന്നും കൊന്നത് എട്ടാമത്തെ കാമുകനാണെന്നും കണ്ടെത്തിയത്​. കൊലപാതകത്തിന്‍റെ തെളിവുകൾ നശിപ്പിച്ചുവെന്ന കുറ്റത്തിനാണ്​ ഭാര്യ ജെമാവിനെ അറസ്റ്റ്​ ചെയ്​തത്​.

പ്രദേശത്തെ 70ഓളം സിസിടിവി ക്യാമറകൾ അരിച്ചുപെറുക്കിയാണ്​ പൊലീസ്​ പ്രതിയെ തിരിച്ചറിഞ്ഞത്​. കൊലപാതക ശേഷം രാജു ഓടിപ്പോകുന്ന ദൃശ്യം ഇതിൽനിന്ന്​ ലഭിച്ചിരുന്നു. ഇത്​ രാജേന്ദ്ര യാദവിന്‍റെ മകൾക്ക് പൊലീസ് കാണിച്ചപ്പോഴാണ്​ അമ്മയുടെ സുഹൃത്തായ രാജുവാണെന്ന്​ തിരിച്ചറിഞ്ഞത്​. അയാൾ വീട്ടിൽ വരുമായിരുന്നുവെന്നും മകൾ പറഞ്ഞു. റായ്ബറേലി സ്വദേശിയായ പ്രതി പാനിപത്തിലെ ഒരു ആക്രിക്കടയിൽ ജോലി ചെയ്തിരുന്നു. തുടർന്നാണ്​ പൊലീസ് ഇയാളെ അറസ്റ്റ് ചെയ്തത്​.

താനും ജെമാവും പ്രണയത്തിലാണെന്ന് രാജു പോലീസിനോട് പറഞ്ഞു. ഒരുമിച്ച്​ താമസിക്കാൻ അവരുടെ ഭർത്താവ് രാജേന്ദ്ര തടസ്സമായതിനാലാണ്​ കൊലപ്പെടുത്തിയത്​. ''ഭർത്താവിനെ ഉപേക്ഷിക്കാൻ ജെമാവ്​ വിസമ്മതിച്ചു. അന്ന് രാത്രി അവിടെയെത്തിയ താൻ രാജേന്ദ്രയെ ചെറിയ ഗ്യാസ് സിലിണ്ടർ കൊണ്ടടിച്ച് കൊലപ്പെടുത്തി അവിടെ നിന്ന് ഓടി രക്ഷപ്പെട്ടു. കൊലപാതക വിവരം ജെമാവും അറിഞ്ഞിരുന്നു'' -രാജു പൊലീസിന്​ നൽകിയ മൊഴിയിൽ പറഞ്ഞു. കൊലപാതകത്തിന്‍റെ തെളിവ്​ നശിപ്പിക്കാൻ കൊലക്കുപയോഗിച്ച ഗ്യാസ് സിലിണ്ടറും രക്തം പുരണ്ട വസ്ത്രങ്ങളും ജെമാവ്​ ഒളിപ്പിച്ചതായും പൊലീസ്​ കണ്ടെത്തി.