സഹോദരിക്ക് ടി.വിയും സ്വർണ മോതിരവും വിവാഹസമ്മാനം നൽകി; ഭർത്താവിനെ ഭാര്യയും ബന്ധുക്കളും ചേർന്ന് അടിച്ചുകൊന്നു

ബരാബങ്കി (ഉത്തർപ്രദേശ്): സ്വന്തം സഹോദരിക്ക് സ്വർണ മോതിരവും ടി.വിയും വിവാഹസമ്മാനം നൽകിയതിന് യുവാവിനെ ഭാര്യയും ബന്ധുക്കളും ചേർന്ന് മർദിച്ച് കൊന്നു. ഉത്തർപ്രദേശിലെ ബരാബങ്ക് സ്വദേശി ചന്ദ്രപ്രകാശ് മിശ്രയാണ് (35) കൊല്ലപ്പെട്ടത്.

ഏപ്രിൽ 26നാണ് സഹോദരിയുടെ വിവാഹം നിശ്ചയിച്ചിരുന്നത്. വിവാഹത്തിന് എൽ.സി.ഡി ടി.വിയും സ്വർണ മോതിരവുമാണ് മിശ്ര സമ്മാനമായി നൽകിയത്. സഹോദരിക്ക് വിവാഹസമ്മാനം നൽകുന്നതിൽ ചന്ദ്രപ്രകാശ് മിശ്രയുടെ ഭാര്യ ചാബി അസ്വസ്ഥയായിരുന്നു. ഇക്കാര്യത്തിൽ ഇവർ വഴക്കിടുകയും തുടർന്ന് ചാബി സഹോദരന്മാരെ വീട്ടിൽ വിളിച്ച് വരുത്തുകയും ചെയ്തു. ചാബിയും സഹോദരന്മാരും ചേർന്ന് ചന്ദ്രപ്രകാശിനെ ഒരുമണിക്കൂറോളം വടികൊണ്ടടിക്കുകയും ഇഷ്ടികകൊണ്ട് തലക്കടിക്കുകയും ചെയ്തതായി പൊലീസ് പറഞ്ഞു.

പരിക്കേറ്റ ഇയാളെ വീട്ടുകാർ ചേർന്ന് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. സംഭവത്തിൽ ചാബിയും സഹോദരന്മാരുമുൾപ്പെടെ അഞ്ചുപേരെ പൊലീസ് അറസ്റ്റ് ചെയ്തു