ന്യൂഡൽഹി: സഹോദരിയെ ശല്യംചെയ്യുന്നത് ചോദ്യംചെയ്ത യുവാവിനെ കുത്തിക്കൊന്നു. ഡൽഹി പട്ടേൽ നഗർ മേഖലയിൽ വെള്ളിയാഴ്ച രാത്രിയാണ് സംഭവം. ഐ.ടി.ഐ വിദ്യാർഥിയായ മനോജ് നേഗി എന്നയാളാണ് കൊല്ലപ്പെട്ടത്. ഇയാൾ കുത്തേറ്റ് വീഴുന്നതിന്‍റെയും ആളുകൾ സഹായിക്കാതെ മാറുന്നതിന്‍റെയും സിസിടിവി ദൃശ്യങ്ങൾ പുറത്തുവന്നു.
കോളജിൽ നിന്ന് വീട്ടിലേക്ക് മടങ്ങിവരുന്ന വഴിയാണ് മനോജ് നേഗിക്ക് കുത്തേറ്റത്. വയറ്റിൽ കുത്തേറ്റ നിലയിൽ നിലത്തുകിടക്കുന്ന യുവാവ് സഹായത്തിന് അഭ്യർഥിക്കുന്ന ദൃശ്യങ്ങളാണ് പുറത്തുവന്നത്. എന്നാൽ ആരും സഹായിക്കാൻ തയാറായി വരുന്നില്ല.
കുത്തേറ്റ നിലയിൽ സമീപത്തെ ഒരു കടയിലേക്ക് ചെന്ന് നേഗി സഹായം ചോദിക്കുന്നുണ്ടെങ്കിലും കടക്കാരൻ ചെവികൊള്ളുന്നില്ല. പിന്നീട് ഒരു വീടിന്‍റെ ഗേറ്റിന് മുന്നിൽ വീഴുന്ന ഇയാളെ വീട്ടുകാർ വന്ന് നോക്കുന്നുണ്ടെങ്കിലും ഇവരും ആശുപത്രിയിലെത്തിക്കാൻ തയാറായില്ല.
പ്രായപൂർത്തിയാകാത്ത രണ്ട് പേരാണ് ഇയാളെ കുത്തിയത്. നേരത്തെ, സഹോദരിയെ ശല്യംചെയ്തതിന് കൊല്ലപ്പെട്ട നേഗി ഇവരെ ചോദ്യംചെയ്തിരുന്നു. പ്രതികളെ പിടികൂടിയതായി പൊലീസ് പറഞ്ഞു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.