പുസ്​തകമാകാനാണ്​ ആധുനിക സാ​ങ്കേതിക വിദ്യയും ശ്രമിക്കുന്നത്​ -രവി ഡി.സി

റിയാദ്​: പുസ്​തകമാകാനാണ്​ ആധുനിക സാ​ങ്കേതിക വിദ്യയും ശ്രമിക്കുന്നതെന്നും, ഓഡിയോ ബുക്കായും മറ്റും അത്​ അനുവാചകരിലേക്ക്​ പടരുകയാണെന്നും പ്രമുഖ പ്രസാധകഗ്രൂപ്പായ ഡി.സി ബുക്​സി​െൻറ മാനേജിങ്​ ഡയറക്​ടർ രവി ഡി.സി. പുതിയ സാ​ങ്കേതിക രൂപങ്ങളിൽ പുസ്​തകവും വായനയും സജീവത നിലനിർത്തുകയാണ്​. വായന മരിക്കുന്നില്ല. അടുത്ത രണ്ട് പതിറ്റാണ്ട് കൂടി പുസ്തക വായനക്ക് യാതൊരു ഇളക്കവും സംഭവിക്കില്ല. എന്നാൽ സാങ്കേതിക വിദ്യയോടൊപ്പം ജനിച്ചുവീഴുന്ന അടുത്ത തലമുറയിൽ എന്ത് മാറ്റം സംഭവിക്കുമെന്ന് ഇപ്പോൾ പറയാനാവില്ലെന്നും അ​ദ്ദേഹം പറഞ്ഞു.

റിയാദ്​ അന്താരാഷ്​ട്ര പുസ്​തകമേളയിൽ പ​ങ്കെടുക്കാനെത്തിയ അദ്ദേഹം റിയാദ്​ ഇന്ത്യൻ മീഡിയ ഫോറം (റിംഫ്) സംഘടിപ്പിച്ച മീറ്റ്​ ദ പ്രസിൽ സംസാരിക്കുകയായിരുന്നു. കോവിഡ്​ കാലത്തോടെയാണ്​ ഓൺലൈൻ വായനക്ക്​ കൂടുതൽ പ്രചാരം ലഭിച്ചത്​. കോവിഡാനന്തരം മലയാളികളുടെ വായന ശക്തമായി തിരിച്ചെത്തി. ഓൺലൈൻ വായന തുടരുകയും ചെയ്യുന്നു. ചുരുക്കിപ്പറഞ്ഞാൽ കോവിഡ്​ കാലം വായനക്ക്​ വലിയ ഗുണമാണ്​ നൽകിയത്​. രണ്ട്​ രീതിയിലും വായന സജീവമായി. മുമ്പ്​ വായിച്ചു മടക്കിയതൊക്കെ ഒന്നുകൂടി വായിക്കാൻ ലോക്​ഡൗൺ അവസരം ഒരുക്കുകയാണ്​ ചെയ്​തത്​. ക്ലാസിക് എഴുത്തുകാരുടെ പുസ്തകങ്ങൾ വീണ്ടും വായിക്കാനാണ്​ പുസ്തക പ്രേമികൾ ആ അവസരം ഉപയോഗിച്ചത്​. അതുകഴിഞ്ഞപ്പോൾ പുതിയ എ​​ഴുത്തുകളിലേക്കും വായനക്കാർ തിരിഞ്ഞു.

പ്രവാസി വായനയും എഴുത്തും നല്ല രീതിയിൽ തന്നെയാണ് മുന്നോട്ടു പോകുന്നത്. ബെന്യാമിനും ഷീല ടോമിയും പ്രവാസത്തിന്റെ സംഭാവനകളാണ്​. ഇന്ത്യൻ വായനയിൽ മലയാളം മുന്നിലാണ്​. ഇന്ത്യയിലെ ഏറ്റവും വലിയ തുക സമ്മാനമായി നൽകുന്ന ജെ.സി.ബി സാഹിത്യ പുരസ്‌കാരം കഴിഞ്ഞ നാലു വർഷത്തിനിടെ മൂന്ന്​ തവണയും മലയാളത്തിൽനിന്ന് വിവർത്തനം ചെയ്യപ്പെട്ട കൃതികൾക്കായിരുന്നു. അത്​ ചെറിയ നേട്ടമല്ല.

കവിതയുടെ ആസ്വാദനം കുറഞ്ഞു വരികയാണ്. പെൻഗിൻ ബുക്​സൊക്കെ ഒരു വർഷം രണ്ടോ മൂന്നോ കവിതാ പുസ്​തകങ്ങൾ പ്രസിദ്ധീകരിക്കു​േമ്പാൾ ഡി.സി ബുക്​സ്​ മാത്രം വർഷത്തിൽ 20 കവിതാസമാഹാരങ്ങളെങ്കിലും പ്രസിദ്ധീകരിക്കുന്നുണ്ട്​. നോവലുകളോടും കഥകളോടുമാണ്​ വായനക്കാർക്ക് ഇപ്പോൾ​ പ്രിയം. വൈജ്ഞാനിക സാഹിത്യത്തോടും യാത്ര വിവരണത്തോടും വായനക്കാർക്ക്​ താൽപര്യം കൂടി വരുന്നുണ്ട്​.​ മലയാള പ്രസാധനരംഗം അത്ര ലാഭകരമെന്ന്​ പറയാനാവില്ല.

ഷാർജ പുസ്​തകോത്സവത്തിന്റെ തലത്തിലേക്ക് റിയാദ് പുസ്തക മേളയിലെ ഇന്ത്യൻ സാന്നിദ്ധ്യം ശക്തിപ്പെടാൻ അൽപ സമയം വേണ്ടിവരും. സൗദിയിലെ പ്രവാസി മലയാളികൾക്കിടയിൽ ഒരു പുസ്തകോത്സവ സംസ്​കാരം രൂപപ്പെട്ടുവരേണ്ടതുണ്ട്​.​ അതിനുവേണ്ടിയുള്ള ശ്രമങ്ങൾ എല്ലാ കോണുകളിൽനിന്നുമുണ്ടാവണം. പ്രസാധകർ മാത്രം വിചാരിച്ചാൽ നടക്കില്ല. പ്രവാസി സംഘടനകളുടെയും വായനാപ്രിയരുടെയും ഭാഗത്തുനിന്നുമെല്ലാം സഹകരണം ഉണ്ടാവണമെന്നും അദ്ദേഹം പറഞ്ഞു. മീറ്റ് ദ പ്രസിൽ റിംഫ് പ്രസിഡന്റ് ഷംനാദ് കരുനാഗപ്പള്ളി അധ്യക്ഷത വഹിച്ചു. ട്രഷർ ജലീൽ ആലപ്പുഴ നന്ദി പറഞ്ഞു.