ദിലീപ്​ കുറ്റാരോപിതൻ ആണെന്ന്​ അറിഞ്ഞതുമുതൽ സഹകരിച്ചിട്ടില്ല -വിമർശനങ്ങൾക്ക്​ മറുപടിയുമായി ജോയ്​ മാത്യു

നടിയെ ആക്രമിച്ച കേസുമായി ബന്ധപ്പെട്ട്​ കഴിഞ്ഞ അഞ്ചുവർഷത്തെ അതിജീവനയാത്ര​യെക്കുറിച്ച്​ നടി വ്യക്തമാക്കി രംഗത്തെത്തിയതോടെ നിരവധി താരങ്ങൾ പിന്തുണ അറിയിച്ച്​ രംഗത്തെത്തിയിരുന്നു. യുവ താരങ്ങൾക്ക്​ പുറമെ മമ്മൂട്ടി, മോഹൻലാൽ ഉൾപ്പെടെ മുതിർന്ന താരങ്ങളും നടിക്ക്​ ഐക്യദാർഢ്യം പ്രഖ്യാപിച്ച്​ രംഗത്തെത്തിയിരുന്നു.

ഇതിനുപിന്നാലെ 'ഇരക്കൊപ്പം എന്ന് പറയാനെളുപ്പമാണ്. എന്നാല്‍ കുറ്റവാളിയുമായി സഹകരിക്കില്ല എന്ന് പറയുവാന്‍ ആരുമില്ല' എന്ന പരാമർശവുമായി നടൻ ജോയ്​ മാത്യു രംഗത്തെത്തിയിരുന്നു. ജോയ് മാത്യുവിന്‍റെ പ്രസ്​താവനയെ പിന്തുണച്ചും വിമർശിച്ചും നിരവധി പേർ രംഗത്തെത്തിയിരുന്നു. കുറ്റവാളികളുമായി സഹകരിക്കില്ല എന്ന നിലപാട്​ ആദ്യം സ്വയം സ്വീകരിക്കണം എന്നായിരുന്നു ജോയ്​ മാത്യുവിനെതിരായ പരാമർശം. ഇതിനുപിന്നാലെ മറുപടിയുമായി രംഗത്തെത്തിയിരിക്കുകയാണ്​ ജോയ്​ മാത്യു വീണ്ടും.

ദിലീപ്​ കുറ്റാരോപിതൻ ആണെന്ന്​ അറിഞ്ഞതുമുതൽ അയാളുമായി സഹകരിച്ചിട്ടില്ലെന്നും ദിലീപുമായി അടുപ്പമുള്ളവരുടെ സിനിമകളിൽനിന്നുപോലും മാറ്റിയിട്ടുണ്ടെന്നും ജോയ്​ മാത്യു പറഞ്ഞു. കൂടാതെ സത്യസന്ധമായ നിലപാടുകളെ അംഗീകരിക്കുന്ന ഒരു കൂട്ടം ചലച്ചിത്ര പ്രവർത്തകരും വിവേകമുള്ള പ്രേക്ഷകരുമുള്ള കാലത്തോളം അന്നം മുട്ടിക്കാൻ ഒരു കുറ്റവാളിക്കും കഴിയില്ലെന്നും ​ജോയ്​ മാത്യു ഫേസ്​ബുക്കിൽ കുറിച്ചു.

'ഇന്നലെ ഞാനിട്ട പോസ്റ്റിന്​ കീഴിൽ പത്രം വായിച്ചു പരിചയമില്ലാത്തവരും ഫേസ്ബുക്കിൽ മാത്രം നിരങ്ങുന്നവരുമായ കുറച്ചുപേർ 'താങ്കൾ ആദ്യം തുടങ്ങൂ' എന്നൊക്കെ ഉപദേശിക്കുന്നത് കണ്ടു. ദിലീപ് കുറ്റാരോപിതൻ ആണെന്നറിഞ്ഞത് മുതൽ ഞാൻ അയാളുമായി സഹകരിച്ചിട്ടില്ല . കൂടാതെ അയാളുമായി അടുപ്പമുള്ളവരുടെ സിനിമകളിൽ നിന്നും എന്നെ മാറ്റിയിട്ടുമുണ്ട്. പക്ഷെ അതൊന്നും എന്നെ ബാധിച്ചിട്ടില്ല. കാരണം സത്യസന്ധമായ നിലപാടുകളെ അംഗീകരിക്കുന്ന ഒരു കൂട്ടം ചലച്ചിത്ര പ്രവർത്തകരും ആരാധകവങ്കന്മാരല്ലാത്ത, വിവേകമുള്ള പ്രേക്ഷകരും ഉള്ള കാലത്തോളം എന്‍റെ അന്നം മുട്ടിക്കാൻ ഒരു കുറ്റവാളിക്കും കഴിയില്ല' -എന്നാണ്​ ജോയ്​ മാത്യുവിന്‍റെ പോസ്റ്റ്​.

ഇതിനൊപ്പം 2017ൽ ദിലീപിന്‍റെ അറസ്റ്റിന്​ പിന്നാലെ ദിലീപുമായി സഹകരിക്കില്ല എന്ന ജോയ്​ മാത്യുവിന്‍റെ പ്രതികരണം സംബന്ധിച്ച ദേശീയ മാധ്യമത്തിൽ വന്ന വാർത്തയും അദ്ദേഹം പങ്കുവെച്ചു.