ഷാർജ എക്സ്പോ സെന്‍ററിലെ ബാൾ റൂമിൽ ഇളയരാജ സദസ്യരുമായി
സംവദിക്കുന്നു
ഷാർജ: മലയാളത്തിൽ സംഗീത സംവിധാനം നിർവഹിക്കാത്തത് ആരും വിളിക്കാത്തത് കൊണ്ടാണെന്ന് സംഗീത ഇതിഹാസം ഇളയരാജ. പുതുതലമുറ സംവിധായകർക്ക് തന്നെ വിളിക്കാൻ പേടിയുള്ളത് പോലെയാണ് തോന്നുന്നതെന്നും അദ്ദേഹം പറഞ്ഞു. ഷാർജ രാജ്യാന്തര പുസ്തകോത്സവത്തിൽ പങ്കെടുക്കാനെത്തിയ അദ്ദേഹം മാധ്യമങ്ങളോട് പ്രതികരിക്കുകയായിരുന്നു.
‘‘സംഗീതമെനിക്ക് ഉയിരാണ്. കാരണം, സംഗീതം അനന്തമാണ്. എന്നാൽ, യാത്ര അങ്ങനെയല്ല. അതിന് തുടക്കവും ഒടുക്കവുമുണ്ട്. സംഗീതമെന്നും അനശ്വരമായി നിലനിൽക്കും’’.
ഷാർജ എക്സ്പോ സെന്‍ററിലെ ബാൾ റൂമിൽ തിങ്ങിനിറഞ്ഞ സംഗീതപ്രേമികളുടെ കരഘോഷം അവിടെ തുടങ്ങുകയായിരുന്നു. ‘ഇളയരാജയുടെ സംഗീത യാത്ര’ എന്ന തലക്കെട്ടിന് മറുപടി പറഞ്ഞാണ് ഇന്ത്യൻ ഇതിഹാസം സദസ്സിനെ ആദ്യം കൈയിലെടുത്തത്. രാത്രി എട്ടരയോടെ ആരംഭിച്ച സംഗീത സംസാരവും വിശേഷങ്ങളും മണിക്കൂറുകൾ നീണ്ടു.
പ്രായത്തിന്‍റേതായ ഒരു പ്രയാസവുമില്ലാതെയാണ് ഷാർജ രാജ്യാന്തര പുസ്തകമേളയിൽ ആസ്വാദകരുമായി സംവദിക്കാൻ ഇതിഹാസം മണിക്കൂറുകൾ ചെലവഴിച്ചത്. പരിപാടിയിൽ അമ്പതാണ്ട് പിന്നിടുന്ന തന്‍റെ സംഗീത സപര്യയെക്കുറിച്ച് ഇളയരാജ മനസ്സ് തുറന്ന് സംസാരിച്ചു. ഈ വർഷത്തെ പുസ്തകമേളയിൽ ആസ്വാദകരുടെ പങ്കാളിത്തം കൊണ്ടും അതിഥിയുടെ വിസ്മയകരമായ പ്രതിഭ കൊണ്ടും സമാനതകളില്ലാത്ത അനുഭവമാണ് ഇളയരാജക്കൊപ്പമുള്ള സംഗീത സാന്ദ്രമായ രണ്ട് മണിക്കൂർ നീണ്ട പരിപാടിയിൽ പങ്കെടുത്തവർക്ക് ലഭിച്ചത്.
സംഗീതജീവിതത്തിലെ ക്രിയാത്മക തലങ്ങൾ, സംഗീതത്തിലൂടെയുള്ള വളർച്ച, ഇന്ത്യൻ സംഗീതലോകത്ത് സൃഷ്ടിച്ച മാസ്മരികത എന്നിവയെക്കുറിച്ച് അദ്ദേഹം ശ്രോതാക്കളോട് സംവദിച്ചു. ശ്രോതാക്കൾക്ക് ഇളയരാജയോട് ചോദ്യങ്ങൾ ചോദിക്കാനും അവസരം നൽകിയിരുന്നു.
പരിപാടിക്ക് ശേഷം ഇളയരാജ എഴുതിയ പുസ്തകം വാങ്ങാനുള്ള സൗകര്യവും അധികൃതർ ഒരുക്കിയിരുന്നു.
ഒമ്പത് ഭാഷകളിലായി 1428 സിനിമകൾക്ക് സംഗീതം പകർന്ന ഏക സംഗീതജ്ഞൻ എന്ന ലോക റെക്കോഡ് ഇളയരാജക്ക് സ്വന്തമാണ്. 8500 ഗാനങ്ങൾക്ക് ഈണം പകർന്ന ഇളയരാജ 20,000ത്തിലധികം കച്ചേരികൾ ഇതുവരെ നടത്തിയിട്ടുണ്ട്. മികച്ച സംഗീത സംവിധായകനുള്ള നിരവധി കേന്ദ്ര -സംസ്ഥാന അവാർഡുകൾ നേടിയ ഇളയരാജയെ 2018ൽ രാഷ്ട്രം പദ്മവിഭൂഷൺ നൽകി ആദരിച്ചു.
ശാസ്ത്രീയ സംഗീതത്തിന് പുതിയ ഭാവുകത്വം നൽകിയ കർണാടിക് സംഗീതജ്ഞൻ സഞ്ജയ് സുബ്രഹ്മണ്യനാണ് സംവാദത്തിന് നേതൃത്വം നൽകിയത്. 2015ൽ മദ്രാസ് സംഗീത അക്കാദമിയുടെ ‘സംഗീത കലാനിധി പട്ടം’ നേടിയ സംഗീതപ്രതിഭയാണ് സഞ്ജയ് സുബ്രഹ്മണ്യം.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.