മസ്കത്ത്: ഖത്തറിൽ നടക്കുന്ന പ്രഥമ ഗൾഫ് ട്വന്‍റി20 ഇന്റർനാഷനൽ (ട്വന്‍റി 20 ഐ) ക്രിക്കറ്റ് ചാമ്പ്യൻഷിപ്പിലെ ആദ്യ മത്സരത്തിൽ ഒമാന് തോൽവി. ദോഹയിലെ വെസ്റ്റ് എൻഡ് പാർക്ക് ഇന്റർനാഷനൽ ക്രിക്കറ്റ് സ്റ്റേഡിയത്തിൽ നടന്ന കളിയിൽ യു.എ.ഇ 22 റൺസിനാണ് സുൽത്താനേറ്റിനെ പരാജയപ്പെടുത്തിയത്. ആദ്യം ബാറ്റ് ചെയ്ത് യു.എ.ഇ നിശ്ചിത 20 ഓവറിൽ നാല് വിക്കറ്റ് നഷ്ടത്തിൽ 191 റൺസാണെടുത്തത്. മറുപടി ബാറ്റിങ്ങിനിറങ്ങിയ ഒമാന് ഏഴ് വിക്കറ്റ് നഷ്ടത്തിൽ 169 റൺസെടുക്കാനേ കഴിഞ്ഞുള്ളൂ.
ക്യാപ്റ്റൻ ആഖിബ് ഇല്യാസ്(52 ബാളിൽ 90), മെഹ്റാൻ ഖാൻ (22), അയാൻ ഖാൻ (21) എന്നിവരൊഴികെയുള്ള ബാറ്റർമാർ കളി മറന്നതാണ് ഒമാന് തിരിച്ചടിയായത്. നാല് ഓവറിൽ 31 റൺസ് വഴങ്ങി മൂന്ന് വിക്കറ്റെടുത്ത അലീ നസീറാണ് ഒമാന്‍റെ ബാറ്റിങ് നിരയുടെ നട്ടെല്ലൊടിച്ചത്.
നേരത്തെ, ടോസ് നേടിയ ഒമാൻ യു.എ.ഇയെ ബാറ്റിങ്ങിനയക്കുകയായിരുന്നു. ഓപണർമാരായ ആര്യാൻഷ് ശർമ (51 ബാളിൽ 52*), മുഹമ്മദ് വസീം (38 ബാളിൽ 80) എന്നിവരുടെ തകർപ്പൻ പ്രകടനമാണ് യു.എ.ഇക്ക് മികച്ച സ്കോർ സമ്മാനിച്ചത്. ആസിഫ് ഖാൻ 35 റൺസുമെടുത്തു. ഒമാന് വേണ്ടി ബിലാൽ ഖാൻ, ഫയാസ് ഭട്ട്, മെഹ്റാൻ ഖാൻ, ആഖിബ് ഇല്യാസ് എന്നിവർ ഓരോ വിക്കറ്റ് വീതവും വീഴ്ത്തി.
ടൂർണമെന്‍റിലെ രണ്ടാം മത്സരത്തിൽ ഒമാൻ ഞായറാഴ്ച ആതിഥേയരായ ഖത്തറിനെ നേരിടും. ഒമാൻ സമയം അഞ്ചിനാണ് മത്സരം.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.