റിയൽ എസ്​റ്റേറ്റ്​ മേഖല: പാട്ടക്കരാർ നിയമഭേദഗതിയുമായി ഖത്തർ

ദോഹ: നൂറുകണക്കിന്​ മലയാളികൾ സജീവമായ ഖത്തറിലെ റിയൽ എസ്​റ്റേറ്റ്​ മേഖലയിൽ സർക്കാർ പുതിയ നിയമഭേദഗതി കൊണ്ടുവരുന്നു. കെട്ടിടങ്ങളും മറ്റും പാട്ടത്തിന്​ കൊടുക്കുന്നതുമായി ബന്ധപ്പെട്ട നിയമം കൂടുതൽ കണിശമാക്കാനാണ്​ ഖത്തറി​​െൻറ തീരുമാനം. 2008ലെ റിയൽ എസ്​റ്റേറ്റ്​ പാട്ടവുമായി ബന്ധപ്പെട്ട നിയമത്തിലുള്ള ഭേദഗതിക്ക്​ അമീർ ശൈഖ്​ തമീം ബിൻ ഹമദ്​ ആൽഥാനി കഴിഞ്ഞ ദിവസം അംഗീകാരം നൽകി.

ഇത്​ പ്രകാരം പാട്ടക്കരാറുമായി ബന്ധപ്പെട്ട വാടക, കാലാവധി, ആവശ്യം തുടങ്ങി സകലകാര്യങ്ങളും രേഖകളിൽ എഴുതൽ നിർബന്ധമാകും. വസ്​തു പാട്ടത്തിന്​ കൊടുക്കുന്നയാളുടെ പേര്​, വാങ്ങുന്നയാളുടെ പേര്​, പൗരത്വം, പാട്ടക്കാലാവധി, പൂർണമായ വിലാസം, വക്കീൽ, പാട്ടത്തുക, ബാങ്ക്​ വഴിയാണോ അതോ മറ്റേതെങ്കിലും രൂപത്തിലാണോ പണം കൈമാറുക തുടങ്ങിയ വിവരങ്ങളും പുതിയ ഭേദഗതിയോടെ നിർബന്ധമാകും.

പാട്ടം നൽകുന്നയാൾ വസ്​തുസംബന്ധിച്ച കരാർ നിർബന്ധമായും രജിസ്​ട്രേഷൻ ഒാഫിസിൽ രജിസ്​റ്റർ ചെയ്യണം. 60 ദിവസത്തിനുള്ളിൽ ഇത്​ പൂർത്തിയാക്കണം. വർഷത്തിലുള്ള പാട്ടത്തുകയുടെ 0.5 ശതമാനം തുക രജിസ്​ട്രേഷൻ ഫീസായി നൽകണം. ഇത്​ 250 റിയാലിൽ കുറയുകയോ 2500 റിയാലിൽ കൂടുകയോ ചെയ്യില്ല. ഭേദഗതി നിയമമാകുന്ന ദിവസം മുതൽ മൂന്നുമാസം വരെ വസ്​തുഉടമക്ക്​ സാവകാശം നൽകും. കരാറുകളുമായി ബന്ധപ്പെട്ട പുതിയ മാനദണ്ഡങ്ങൾ ചേർക്കാനായാണിത്​. നഗരകാര്യ മന്ത്രാലയത്തിന്​ പ്രത്യേകസാഹചര്യങ്ങളിൽ ഇൗ കാലയളവ്​ നീട്ടുകയും ചെയ്യാം. പുതിയ ഭേദഗതി പ്രകാരം നിയമലംഘനം നടത്തുന്നയാൾക്ക്​​​ 10,000 ഖത്തർ റിയാൽ (1.74 ലക്ഷം രൂപ) ആണ്​ പിഴ.

നിരവധി മലയാളികളാണ്​ ഖത്തറിൽ റിയൽ എസ്​റ്റേറ്റ്​ മേഖലയിൽ പ്രവർത്തിക്കുന്നത്​. സ്വദേശികളുടെ ഉടമസ്​ഥതയിലുള്ള വീടുകളടക്കമുള്ള കെട്ടിടങ്ങൾ മൊത്തത്തിൽ നിശ്​ചിത കാലയളവിലേക്ക്​ വിദേശികൾ പാട്ടത്തിനെടുക്കുകയാണ്​ ചെയ്യുന്നത്​. പിന്നീട്​ ഇത്​ പലതായി വിഭജിച്ച്​ മറ്റുള്ളവർക്ക്​ മാസവാടകക്ക്​ മറിച്ചുനൽകും. പലപ്പോഴും കരാറിൽ പറയുന്ന കാര്യങ്ങൾക്കല്ല പിന്നീട്​ കെട്ടിടം ഉപയോഗിക്കുന്നത്​. പുതിയ നിയമഭേദഗതി വരുന്നതോടെ കെട്ടിട ഉടമകൾ പാട്ടക്കരാറുകളിൽ കൂടുതൽ കണിശത പുലർത്തും. എന്തൊക്കെ കാര്യങ്ങൾക്കാണ്​ കെട്ടിടം പിന്നീട്​ ഉപയോഗിക്കുകയെന്നതും വ്യക്​തമാ​േക്കണ്ടി വരും. പാട്ടത്തുക വൻതോതിൽ വർധിക്കാൻ ഇത്​ കാരണമാകും.