ദോഹ: ലോകത്തെ സർവകലാശാലകളുടെ റാങ്കിങ്ങിൽ തിളങ്ങി ഖത്തർ സർവകലാശാലയും.2020ലെ മികവിനെ അടിസ്ഥാനമാക്കി ഷാങ്ഹായ് റാങ്കിങ് കൺസൽട്ടൻസി പുറത്തിറക്കിയ 'അക്കാദമിക് റാങ്കിങ് ഓഫ് വേൾഡ് യൂനിവേഴ്സിറ്റീസ്' പട്ടികയിൽ 601-700 റാങ്ക് കാറ്റഗറിയിലാണ് ഖത്തർ സർവകലാശാല ഇടംനേടിയത്.
ലോകത്തെ രണ്ടായിരത്തോളം സർവകലാശാലകളുടെ അക്കാദമിക മികവ് വിലയിരുത്തിയാണ് മികച്ച 1000 സർവകലാശാലകളുടെ പട്ടിക പ്രസിദ്ധീകരിക്കുന്നത്.
2018ൽ 901 കാറ്റഗറിയിലായിരുന്ന ഖത്തർ വാഴ്സിറ്റി മികച്ച പ്രകടനവുമായാണ് ഇൗ വർഷം റാങ്കിങ്ങിൽ കാര്യമായ മുന്നേറ്റം നടത്തിയത്.
''മേഖലയിലെ മുൻനിര സർവകലാശാലയായി ഇടംപിടിച്ചതിൽ അഭിമാനമുണ്ട്. ലോകത്തെ മികച്ച സർവകലാശാലകൾ തമ്മിലെ അക്കാദമിക് മത്സരത്തിനിടയിൽ പ്രധാന സ്ഥാനം നിലനിർത്താനായത് വലിയ അംഗീകാരമാണ്.
കരുത്തരായ അധ്യാപകരുടെയും ഗവേഷകരുടെയും വൈവിധ്യങ്ങളായ പ്രോഗ്രാമുകളുടെയുംകൂടി നേട്ടമാണിത്'' -ഖത്തർ യൂനിവേഴ്സിറ്റി പ്രസിഡൻറ് ഡോ. ഹസ്സൻ റാഷിദ് അൽ ദർഹാം പറഞ്ഞു. അക്കാദമിക് റിസർച്, രാജ്യാന്തര പ്രശസ്ത ജേണലുകളിൽ പ്രസിദ്ധീകരിച്ച പ്രബന്ധങ്ങൾ, നൊബേൽ പുരസ്കാര ജേതാക്കൾ, രാജ്യാന്തര നേട്ടങ്ങൾ കൊയ്ത പൂർവവിദ്യാർഥികൾ, സ്റ്റാഫുകൾ എന്നിവകൂടി പരിഗണിച്ചാണ് സർവകലാശാല റാങ്കിങ് കണക്കാക്കുന്നത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.