ഹജ്ജ്​ തീർഥാടകരെ പരിചരിച്ച് ശ്രദ്ധേയായി സൗദി ഡോക്ടർ; പ്രശംസയുമായി ആരോഗ്യമന്ത്രി

മക്ക: അതിരുകളില്ലാത്ത കാരുണ്യം പെയ്തിറങ്ങിയ ഹജ്ജ്​ വേളയിൽ പ്രായത്തെ മറന്നും തീർഥാടകരെ പരിചരിക്കാനിറങ്ങിയ വയോധികയായ സ്വദേശി ഡോക്ടർക്ക്​ സൗദി ആരോഗ്യ മന്ത്രിയുടെ പ്രശംസ. 'മദർ ഓഫ്​ ദ വളന്‍റിയർ' പദവി നൽകിയാണ്​ മന്ത്രി ഫഹദ് അൽജലാജിൽ ആദരവ് അർപ്പിച്ചത്​. പ്രത്യേക അനുമോദന പത്രം സമ്മാനിക്കുമെന്നും മന്ത്രി പറഞ്ഞു.

ഹജ്ജ് വേളയിൽ പുണ്യസ്ഥലങ്ങളിൽ തീർഥാടകർക്ക് ആരോഗ്യപരിരക്ഷ നൽകുന്നതിൽ ഏർപ്പെട്ടിരിക്കുന്ന സന്നദ്ധ പ്രവർത്തകരുടെ പ്രവർത്തനങ്ങൾ പരിശോധിക്കുന്നതിനിടെയാണ് മന്ത്രി 65 കാരിയായ വനിതാ ഡോക്ടറെ കണ്ടത്. ജോലിയിൽനിന്ന്​ വരമിച്ചിട്ടും സന്നദ്ധ പ്രവർത്തനത്തിന്​ എത്തിയതായിരുന്നു ഡോക്​ടർ. അവരുടെ പ്രായം മറന്ന പരിശ്രമത്തേയും അർപ്പണ ബോധത്തേയും മന്ത്രി അഭിനന്ദിച്ചു.

ആയിരക്കണക്കിന്​ യുവ ആരോഗ്യ പ്രവർത്തകരാണ്​ ഹജ്ജ്​ തീർഥാടകർക്ക്​ സേവനം നൽകാൻ സന്നദ്ധരായി മുന്നോട്ട്​ വന്നത്​. ഇവരുടെ പ്രവർത്തനങ്ങൾ ഹജ്ജിന്‍റെ സുഗമമായ നടത്തിപ്പിന്​ ഏറെ പ്രയോജനപ്പെട്ടിരുന്നു. ഹജ്ജ്​ വേളയിൽ ഇക്കാര്യങ്ങൾ നേരിട്ടറിയാൻ എത്തിയ മന്ത്രി ഏറെസമയം അവർക്കൊപ്പം ചെലവഴിക്കുകയും വിശേഷങ്ങൾ ആരായുകയും ചെയ്തിരുന്നു.

ഏത്​ മേഖലയിൽ ജോലിചെയ്യുന്നവരായാലും വിരമിക്കുക എന്നത്​ കേവലം ജോലിയിലെ ഔപചാരിക കർമം മാത്രമാണെന്നും തങ്ങൾ ചെയ്തിരുന്ന മേഖലയിലെ സന്നദ്ധ പ്രവർത്തനത്തിൽ നിന്നവർ വിരമിക്കുന്നില്ലെന്നും മന്ത്രി അഭിപ്രായപ്പെട്ടു. മറ്റുള്ളവർക്കായി സേവനം ചെയ്യുക എന്നത്​ ജീവിതത്തിൽ ഊർജം നിലനിർത്തുന്നതിനും സഹായകരമാകും -മന്ത്രി കൂട്ടിച്ചേർത്തു.

യുവാക്കൾക്കിടയിൽ 41 വയസ്സുള്ള സന്നദ്ധ പ്രവർത്തകയെ ഞാൻ കണ്ടിരുന്നു. എന്നാൽ 65 വയസ്സുള്ള സ്ത്രീ ഡോക്ടർ എന്‍റെ അതിശയത്തെ മറികടന്നിരിക്കുന്നു. അതുകൊണ്ടാണ്​ വളന്റിയർമാരുടെ 'മാതാവ്' എന്ന പദവി അവർക്കായി നൽകുന്നതെന്നും മന്ത്രി വിശദീകരിച്ചു.

സൗദി ഭരണകൂടത്തിന്‍റെ വിശാലവും പഴുതടച്ചുള്ളതുമായ ആസൂത്രണമാണ്​ ഇത്തവണത്തെ ഹജ്ജിനെ ശാന്ത സുന്ദരമായ അനുഭവമാക്കി മാറ്റിയത്​. കോവിഡ്​ പ്രതിസന്ധിക്ക്​ ശേഷം വിശാല സംവിധാനത്തിൽ നടന്ന ഹജ്ജ്​ കർമം വിജയിപ്പിക്കാൻ രാജ്യത്തെ സംവിധാനങ്ങൾ മുഴുവൻ ജാഗ്രതയോടെ നിലകൊണ്ടു. അതിനുമപ്പുറത്ത്​ മാറുന്ന സൗദിയുടെ പ്രത്യേക മുഖവും ഇത്തവണ ഹജ്ജിൽ പ്രകടമായിരുന്നു. അതിന്റെ തെളിവായിരുന്നു സ്വദേശി വനിതാ വളന്റിയർമാരുടെ സാന്നിദ്ധ്യം​.