ലക്ഷദ്വീപ് എം.പി മുഹമ്മദ് ഫൈസൽ റിയാദിൽ വാർത്ത സമ്മേളനത്തിൽ
റിയാദ്: ലക്ഷദ്വീപിലെ ഉദ്യോഗാർഥികൾക്ക് സൗദി അറേബ്യ ഉൾപ്പെടെയുള്ള ജി.സി.സി രാജ്യങ്ങളിൽ തൊഴിൽ അവസരം തേടി പാർലമെന്റ് അംഗം മുഹമ്മദ് ഫൈസൽ. ലക്ഷദ്വീപിൽ മുൻകാലങ്ങളെ അപേക്ഷിച്ച് തൊഴിലില്ലായ്മ രൂക്ഷമാണെന്ന് റിയാദിലെത്തിയ അദ്ദേഹം പറഞ്ഞു. ഈ തൊഴിൽ പ്രതിസന്ധിക്ക് അടിയന്തര പരിഹാരം ആവശ്യമാണ്. പ്രായോഗികമായ സാധ്യത എന്ന നിലയിൽ വിദേശരാജ്യങ്ങളിലെ മലയാളി സംരംഭകരെ കണ്ട് ദ്വീപിൽനിന്നുള്ളവരെ കൂടി പരിഗണിക്കണമെന്ന് ആവശ്യപ്പെടുകയാണ് ഈ വിഷയത്തിലുള്ള പ്രാഥമിക ചുവടുവെപ്പെന്നും അദ്ദേഹം സൂചിപ്പിച്ചു.
സംരംഭകരുമായി നടത്തിയ കൂടിക്കാഴ്ചയിൽ അനുകൂല നിലപാടാണ് ഉണ്ടായത്. പുതിയ വിസകൾ വരുമ്പോൾ ഇന്റർവ്യൂവിന് ലക്ഷദ്വീപുകാരെയും ക്ഷണിക്കാമെന്ന് സഹൃദയരായ വ്യവസായികൾ വാക്കു തന്നിട്ടുണ്ട്. ഇത് വലിയ ഊർജം പകരുന്നതാണ്. ലക്ഷദ്വീപിലെ യുവതലമുറക്ക് വലിയ സാധ്യതകൾക്ക് ഇത് വഴിതുറക്കുമെന്നുമാണ് തന്റെ പ്രതീക്ഷയെന്നും അദ്ദേഹം കൂട്ടിച്ചേർത്തു.
മുൻകാലങ്ങളിൽ ദ്വീപിൽ തന്നെ തൊഴിലവസരങ്ങളുണ്ടായിരുന്നു. അതുകൊണ്ടുതന്നെ ലക്ഷദ്വീപിൽനിന്ന് തൊഴിൽതേടി വിദേശത്തേക്കു പോയവരുടെ എണ്ണം വളരെ കുറവായിരുന്നു. നിലവിൽ ദ്വീപിൽ തൊഴിലവസരങ്ങൾ ഗണ്യമായി കുറഞ്ഞതാണ് പുതിയ പ്രതിസന്ധിക്ക് കാരണമെന്നും എം.പി റിയാദിൽ മാധ്യമപ്രവർത്തകരോട് പറഞ്ഞു. വാർത്തസമ്മേളനത്തിൽ റിയാദ് കെ.എം.സി.സി സെൻട്രൽ കമ്മിറ്റി സെക്രട്ടറി മുജീബ് ഉപ്പട, ഡൽഹി കെ.എം.സി.സി ജനറൽ സെക്രട്ടറി മുഹമ്മദ് ഹലീം എന്നിവർ എം.പിക്കൊപ്പം പങ്കെടുത്തു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.