സൗദിയിൽ പുതിയ സ്വർണ നിക്ഷേപ കേന്ദ്രങ്ങൾ കണ്ടെത്തി

ജിദ്ദ: സൗദിയിൽ പുതിയ സ്വ​ർണ നിക്ഷേപ കേന്ദ്രങ്ങൾ കണ്ടെത്തി. മക്ക മേഖലയിൽ നിലവിലുള്ള മൻസൂറ, മസാറ സ്വർണ ഖനികളോട്​ ചേർന്നാണ്​ സുപ്രധാന നിക്ഷേപമുണ്ടെന്ന്​​ കണ്ടെത്തിയതെന്ന്​ സൗദി മൈനിങ്​ കമ്പനി (മആദിൻ) അറിയിച്ചു. 2022ൽ ആരംഭിച്ച കമ്പനിയുടെ തീവ്ര പര്യവേക്ഷണ പരിപാടിയിലെ ആദ്യത്തെ കണ്ടെത്തലാണിത്. മൻസൂറക്കും മസാറക്കും ചുറ്റും കമ്പനിയുടെ പര്യവേക്ഷണം തുടരുകയാണ്​. അൽഉറുഖിന് തെക്ക് ഒന്നിലധികം സ്ഥലങ്ങളിലും മൻസൂറ, മസാറ ഖനികൾക്ക് തെക്ക് 100 കിലോമീറ്റർ നീളത്തിലും കമ്പനി പര്യവേക്ഷണം നടത്തി​.

125 കിലോമീറ്റർ നീളത്തിൽ നിക്ഷേപമുണ്ടെന്ന്​ തിരിച്ചറിഞ്ഞിട്ടുണ്ട്​. ഇതോടെ അന്താരാഷ്​ട്ര നിലവാരത്തിലുള്ള പ്രധാന സ്വർണ വലയമായി പ്രദേശം മാറുമെന്നാണ് പ്രതീക്ഷ​. വിഭവങ്ങൾ ആഴത്തിലും പരപ്പിലും ലഭ്യമാണ്. ഇത് ഖനിയിലെ സമ്പത്തി​െൻറ സമൃദ്ധിയെ സൂചിപ്പിക്കുന്നു. ഭൂഗർഭ വികസനത്തിലൂടെ ഖനിയുടെ ആയുസ്സ് നീട്ടാനാകുമെന്നും കമ്പനി പറഞ്ഞു.

2023 അവസാനത്തോടെ മൻസൂറയിലെയും മസാറയിലെയും സ്വർണ വിഭവങ്ങളുടെ അളവ് ഏകദേശം 70 ലക്ഷം ഔൺസ് ആണ്​. പ്രതിവർഷം രണ്ടര ലക്ഷം ഔൺസ് ആണ്​ ഉൽപാദന ശേഷി. രാജ്യത്തെ ഏറ്റവും പ്രധാന സ്വർണ ഖനന പദ്ധതികളിൽ ഒന്നാണിത്​. 2022ലാണ്​ മആദിൻ കമ്പനി ശക്തമായ പര്യവേക്ഷണ പരിപാടി ആരംഭിച്ചത്​. അതി​െൻറ ആദ്യത്തെ പ്രധാന കണ്ടെത്തലുകളാണ് ഈ ഫലങ്ങൾ. ധാതു ഉൽപാദന പാത നിർമിക്കുക, സൗദി അറേബ്യയുടെ വിഭവ അടിത്തറ വികസിപ്പിക്കുക, ഖനനത്തെ സൗദി സമ്പദ്‌ വ്യവസ്ഥയുടെ മൂന്നാം തൂണായി മാറ്റാനുള്ള കമ്പനിയുടെ അഭിലാഷത്തെ പിന്തുണക്കുക എന്നിവയാണ് ഇതിലുടെ മആദിൻ കമ്പനി ലക്ഷ്യമിടുന്നത്. സൗദി അറേബ്യൻ മൈനിങ്​ കമ്പനിയുടെ ഖനികളായ മൻസൂറ, മസാറ സൗദിയുടെ പടിഞ്ഞാറ് ജിദ്ദ നഗരത്തിന് 460 കിലോമീറ്റർ കിഴക്ക് മക്ക മേഖലയിലെ അൽഖുർമ ഗവർണറേറ്റ്​ ഭൂപരിധിയിലാണുള്ളത്​.