റിയാദ്: സൗദി കപ്പ് നേടിയ കുതിര പരിശീലകൻ ഹമദ് അൽ റാഷിദിന്റെ സന്തോഷ പ്രകടനം വൈറൽ. റിയാദിൽ നടന്ന അന്താരാഷ്ട്ര കുതിരയോട്ട മത്സരത്തിൽ താൻ പരിശീലിപ്പിച്ച സീനോർ പെസ്കഡോർ എന്ന കുതിരക്ക് ഒന്നാം സ്ഥാനം ലഭിച്ചപ്പോൾ അടക്കാനാവാത്തവിധം ഹമദ് അൽറാഷിദ് ആഹ്ലാദം പ്രകടിപ്പിക്കുന്ന രംഗമാണ് ആളുകളുടെ മനംകവർന്നത്. സൗദി കപ്പ് ഫൈനലിന് ശേഷം നടന്ന ചടങ്ങിൽ കിരീടാവകാശി അമീർ മുഹമ്മദ് ബിൻ സൽമാനിൽനിന്ന് ട്രോഫി സ്വീകരിക്കാനെത്തുന്ന ഹമദ് അൽറാഷിദിന്റെ വീഡിയോ ദൃശ്യമാണ് വൈറലായത്. വെളുത്ത താടിക്കാരനായ അദ്ദേഹം ആഹ്ലാദം കൊണ്ട് തുള്ളിച്ചാടുന്ന വിഡിയോ ആരുടെയും ഹൃദയം കവരുന്നതാണ്. വിഡിയോ ക്ലിപ്പ് സമൂഹ മാധ്യമങ്ങളിൽ സ്വദേശി പൗരന്മാർ ഏറ്റെടുക്കുകയായിരുന്നു. കിങ് അബ്ദുൽ അസീസ് ഇക്വസ്ട്രിയൻ സ്റ്റേഡിയത്തിൽ ഹമദ് അൽറാഷിദിനെ അമീർ മുഹമ്മദ് ബിൻ സൽമാൻ കിരീടമണിയിക്കുന്നതിന്റെ വീഡിയോയും ചിത്രങ്ങളും സൗദി പൗരന്മാർക്കിടയിൽ വ്യാപകമായി പ്രചരിച്ചു.
കുതിരപരിശീലകനായ ഹമദ് അൽറാഷിദിന് കുതിരകളോടുള്ള ഇഷ്ടം പതിനെട്ടാം വയസ്സിലാണ് തുടങ്ങിയത്. വർഷങ്ങളായി വിവിധ മത്സരങ്ങളിൽ വിജയം നേടുന്ന നിരവധി കുതിരകളെ അദ്ദേഹം പരിശീലിപ്പിച്ചിട്ടുണ്ട്. 20 വർഷത്തിലേറെയായി കുതിര പരിശീലന മേഖലയിൽ അദ്ദേഹത്തിന് വിപുലമായ അനുഭവമുണ്ട്. പ്രാദേശിക, അന്തർദേശീയ മത്സരങ്ങളിൽ വിജയിച്ചതുൾപ്പെടെ നിരവധി നേട്ടങ്ങളും തന്റെ കരിയറിൽ അദ്ദേഹം നേടിയിട്ടുണ്ട്. അബ്ദുല്ല രാജാവിന്റെ മക്കളുടെയും അമീർ ഫൈസൽ ബിൻ ഖാലിദിന്റെയും അമീർ മുഹമ്മദ് ബിൻ സുൽത്താന്റെയും കുതിരകൾക്കും പരിശീലകനായിട്ടുണ്ട്. കുതിര പരിശീലന രംഗത്തെ ഹമദ് അൽറാഷിദിന്റെ നിരവധി നേട്ടങ്ങൾ കുതിരസവാരി സമൂഹത്തിന് അടുത്തറിയാം.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.