ശമ്പളം കിട്ടാതെ യു.പി സ്വദേശി ദുരിതത്തിൽ

റിയാദ്: 20 മാസം കഴിഞ്ഞിട്ടും ശമ്പളം കിട്ടാതെ സൗദി അറേബ്യയിൽ ദുരിതത്തിലായി ഇന്ത്യക്കാരൻ. സന്തോഷ് കുമാർ എന്ന ഉത്തർ പ്രദേശ് സ്വദേശിയായ 48 കാരനാണ്​ റിയാദിന്​ സമീപം ദവാദ്മി പട്ടണത്തിൽ നിന്ന് 150 കിലോമീറ്റർ അകലെ അബു ജലാൽ എന്ന പ്രദേശത്ത്​ കൃഷിയിടത്തിൽ പണിയെടുക്കുന്നത്. ഹൗസ് ഡ്രൈവർ വിസയിലാണ് ഇദ്ദേഹം സൗദിയിൽ എത്തിയത്. എന്നാൽ വിമാനത്താവളത്തിൽ നിന്ന് സ്പോൺസർ കൂട്ടിക്കൊണ്ടുപോയത്​ മരുഭൂമിയിലെ കൃഷിയിടത്തിലേക്കാണ്. ശമ്പളം ലഭിക്കാതെ വരികയും നിത്യവൃത്തിക്കുപോലും മറ്റുള്ളവരുടെ മുന്നിൽ കൈ നീട്ടേണ്ട അവസ്ഥയിലാവുകയും ചെയ്​തു.

പലതവണ ഇന്ത്യൻ എംബസിയുടെ സഹായത്തിനായി ശ്രമിച്ചു. ഒടുവിൽ സാമൂഹിക പ്രവർത്തകനായ ഹുസൈൻ ദവാദ്മിയെ സന്തോഷ് കുമാറി​െൻറ വിഷയം എംബസി ഏൽപ്പിക്കുകയുമായിരുന്നു. സ്പോൺസർ സഹകരിക്കാതെ വന്നപ്പോൾ കോടതിയെ സമീപിച്ചിരിക്കുകയാണ് ഹുസൈനും സന്തോഷ് കുമാറും. പാസ്​പോർട്ടും മറ്റു രേഖകളും സ്‌പോൺസറുടെ കൈവശമായത്​ യാത്രക്ക് തടസ്സമാകും എന്ന ഭയത്തിലുമാണ്. ആരോഗ്യ പ്രശ്നങ്ങൾ അലട്ടുന്ന സന്തോഷ് കുമാർ ഹുസൈൻ ദവാദ്മിയുടെ സംരക്ഷത്തിലാണ് ഇപ്പോൾ. ശമ്പളം കോടതി ഇടപെട്ട്​ സ്പോൺസറിൽ നിന്ന് ലഭ്യമാക്കുമെന്നും ഉടൻ നാട്ടിലേക്ക് മടങ്ങാനാകുമെന്നുമുള്ള പ്രതീക്ഷയിലാണ് ഇപ്പോൾ സന്തോഷ് കുമാർ.