ഭക്ഷ്യ പാക്കറ്റിൽ കടത്താൻ ശ്രമിച്ച കഞ്ചാവ്​ പിടികൂടി

ദുബൈ: ഭക്ഷ്യ പാക്കറ്റിൽ കടത്താൻ ശ്രമിച്ച 54 കിലോ കഞ്ചാവ്​ പിടികൂടി ദുബൈ കസ്റ്റംസ്​ ഡിപ്പാർട്ട്​മെന്‍റ്​. വാക്വം സീൽ ചെയ്ത പ്ലാസ്റ്റിക്​ ബാഗുകളിൽ ഒളിപ്പിച്ച നിലയിലായിരുന്നു കഞ്ചാവ്​.

ഇതിന്‍റെ മണം പുറത്തറിയാതിരിക്കാൻ പ്രത്യേക രീതിയിലായിരുന്നു പാക്കിങ്​. കസ്റ്റംസ്​ ഡിപ്പാർട്ട്​മെന്‍റിന്‍റെ സൂക്ഷ്മ നിരീക്ഷണത്തിന്‍റെയും അത്യാധുനിക ഉപകരണങ്ങളുടെ സഹായത്തോടെയുമാണ്​ കഞ്ചാവ്​ കണ്ടെത്താനായത്​. ഏഷ്യൻ വംശജരാണ്​ കഞ്ചാവ്​ കടത്തിന്​ പിന്നിലെന്ന്​ പൊലീസ്​ അറിയിച്ചു.

വാക്വം സീൽ ചെയ്ത പാക്കറ്റുകളിൽ കൂടുതൽ അളവിൽ കഞ്ചാവ്​ കടത്താനാകുമെന്നതിനാലാണ്​ ഈ രീതി ഉപയോഗിക്കുന്നത്​. വാക്വം ചെയ്ത പാക്കറ്റുകൾ കാർഡ്​ ബോർഡ്​, ഭക്ഷ്യ വസ്തുക്കൾ കൊണ്ടുപോകാൻ ഉപയോഗിക്കുന്ന പ്ലാസ്റ്റിക് ബോക്സ്​ എന്നിവയിൽ പാക്ക്​ ചെയ്താണ്​ കടത്തിയിരുന്നത്.

ഈ രീതിയിൽ 13 തവണ കഞ്ചാവ്​ കടത്താനാണ്​ ശ്രമിച്ചിരുന്നതെന്നും മൊത്തം 54 കിലോ കഞ്ചാവ്​ പിടികൂടിയതായും ദുബൈ കസ്റ്റംസ്​ അധികൃതർ വ്യക്​തമാക്കി. ​കസ്റ്റംസിനെ തെറ്റിദ്ധരിപ്പിക്കാനായി പല രൂപത്തിലാണ്​ മയക്കുമരുന്ന്​ കടത്തുന്നതെന്നും മികച്ച പരിശീലനം നേടിയ ഉദ്യോഗസ്ഥരുടെ നിരന്തര ശ്രമങ്ങളാണ്​ ഇതിനെ തടയുന്നതെന്നും ദുബൈ കസ്റ്റംസിലെ പാസഞ്ചർ ഓപറേഷൻസ് ഡയറക്ടർ ഇബ്രാഹിം അൽ കമാലി പറഞ്ഞു.