ലൂവ്ർ അബൂദബി ചിൽഡ്രൻസ് മ്യൂസിയം ഇന്ന്​ തുറക്കും

അബൂദബി: കുട്ടികളുടെയും മുതിർന്നവരുടെയും ഇഷ്​ടകേന്ദ്രമായ ലൂവ്​ർ അബൂദബി ചിൽ​ഡ്രൻസ്​ മ്യൂസിയം ഇടവേളക്ക്​ ശേഷം വെള്ളിയാഴ്​ച തുറക്കും. വിനോദവും വിജ്​ഞാനവും വിദ്യാഭ്യാസവും സമന്വയിപ്പിക്കുന്ന മ്യൂസിയത്തിൽ 18​ വയസിൽ താഴെയുള്ള കുട്ടികൾക്ക്​ പ്രവേശനം സൗജന്യമായിരിക്കും. വിവിധ കായിക വിനോദ പ്രവർത്തനങ്ങളിലൂടെ പോയിൻറുകൾ ശേഖരിക്കുന്നതിന് മ്യൂസിയത്തിൽ ഒട്ടേറെ അവസരമുണ്ട്. ഡ്രോയിങ്, കൊളാഷ്, ത്രിമാന ആർട്ട് പോലെ വ്യത്യസ്ത കലാ പ്രവർത്തനങ്ങളിലൂടെ വിനോദങ്ങളിലേർപ്പെടാനുള്ള അവസരവും ഒരുക്കിയിരിക്കുന്നു.

നാലു മുതൽ പത്തുവരെ പ്രായക്കാരായ കുട്ടികളുടെ മാനസിക വികസനത്തിന് സഹായകമായ ഗെയിമുകൾ ഇവിടെയുണ്ട്​. കുടുംബ സമേതം ആസ്വദിക്കാൻ ഒ​ട്ടേറെ കൗതുകങ്ങൾ മ്യൂസിയത്തിലുണ്ട്​.കോവിഡിൽ നിന്ന്​ സുരക്ഷ ഉറപ്പാക്കുന്നതിനായി ടച്ച്​ലെസ്​ സംവിധാനങ്ങൾ കൂടുതലായി ഉൾപെടുത്തിയിരിക്കുന്നു. സാമൂഹിക അകലം ഉറപ്പുവരുത്താൻ നിശ്​ചിത എണ്ണം കുട്ടികളെ മാത്രമെ പ്രവേശിപ്പിക്കൂ.

ലൂവ്ർ അബൂദബി ചിൽഡ്രൻസ് മ്യൂസിയം കണ്ടെത്തലി​െൻറയും പഠനത്തി​െൻറയും ഉത്തേജനത്തി​െൻറയും സങ്കേതമാണെന്ന് അബൂദബി സാംസ്‌കാരിക ടൂറിസം വകുപ്പ് ചെയർമാൻ മുഹമ്മദ് ഖലീഫ അൽ മുബാറക് പറഞ്ഞു. കുട്ടികൾക്കും കുടുംബാംഗങ്ങൾക്കുമായി മ്യൂസിയം വീണ്ടും തുറന്നുകൊടുക്കുന്നതിൽ ഏറെ സന്തോഷമുണ്ട്. കുട്ടികൾക്ക് സൃഷ്​ടിപരമായ കഴിവുകളുടെ വാതായനം തുറക്കാനുള്ള അവസരമാണിതെന്നും​ അദ്ദേഹം പറഞ്ഞു.