ദുബൈ: നഗരത്തിൽ റോഡ് ഗതാഗത അതോറിറ്റി (ആർ.ടി.എ) മിനിബസ് സർവിസ് ആരംഭിക്കുന്നു. മൊബൈൽ ആപ്ലിക്കേഷൻ ഉപയോഗിച്ച് യാത്രക്കാർക്ക് സീറ്റ് ബുക്ക് ചെയ്യാവുന്ന ബസ് പൂളിങ് സംവിധാനത്തിനാണ് തുടക്കമിടുന്നത്. ഇതിനായി മൂന്ന് പ്രാദേശികവും അന്താരാഷ്ട്രവുമായ കമ്പനികൾക്ക് ആർ.ടി.എ അംഗീകാരം നൽകി.
സിറ്റിലിങ്ക് ഷട്ടിൽ, ഡ്രിവൻബസ്, ഫ്ലക്സ് ഡെയിലി എന്നീ കമ്പനികളുടെ ആപ് വഴിയാണ് മിനിബസുകളിൽ സീറ്റ് ബുക്ക് ചെയ്യാൻ സാധിക്കുക. മറ്റ് പൊതുബസ് സർവിസുകളിൽ നിന്ന് വ്യത്യസ്തമായി ഈ ബസുകൾക്ക് നിശ്ചിത റൂട്ടുകളുണ്ടാവില്ല. ഓൺ ഡിമാൻഡ് അടിസ്ഥാനത്തിൽ യാത്രക്കാർ സഞ്ചരിക്കുന്ന ദൂരത്തിനനുസരിച്ചായിരിക്കും ഈ ബസിലെ നിരക്ക്.
തുടക്കത്തിൽ ദേരയിൽ നിന്ന് ബിസിനസ് ബേ, ദുബൈ മാൾ, മിർദിഫ്, ദുബൈ ഫെസ്റ്റിവെൽ സിറ്റി തുടങ്ങിയ സെൻട്രൽ ഡിസ്ട്രിക്ട് മേഖലയിലേക്കാണ് യാത്രക്കാരെ എത്തിക്കുക. പതിമൂന്ന് മുതൽ 30 വരെ യാത്രക്കാർക്ക് കയറാവുന്ന മിനിബസുകളാണ് ആർ.ടി.എ ഈ സർവിസിനായി രംഗത്തിറക്കുന്നത്.
ആദ്യഘട്ടത്തിൽ 20 മിനിബസുകൾ ഇതിനായി നിരത്തിലിറക്കും. ഒരു യാത്രക്ക് മാത്രമല്ല, സ്ഥിരം യാത്രക്ക് ആഴ്ച അടിസ്ഥാനത്തിലും മാസാടിസ്ഥാനത്തിലും ഈ ബസുകൾ ആപ് വഴി ബുക്ക് ചെയ്യാൻ സാധിക്കും. ആർ.ടി.എ നേരത്തേ ബസ് ഓൺ ഡിമാൻഡ് എന്ന പേരിൽ ചില റൂട്ടുകളിൽ മിനിബസ് സർവിസ് നടത്തുന്നുണ്ട്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.