യു.എ.ഇയിലെ പച്ചക്കറി ഉൽപാദനം വർധിച്ചു

അബൂദബി: യു.എ.ഇയിൽ ചിലയിനം പച്ചക്കറികളുടെ ഉൽപാദനം വിപണിയുടെ ആവശ്യത്തിന്​ അനുസരിച്ച്​ വർധിച്ചതായി കാലാവസ്​ഥ വ്യതിയാന-പരിസ്​ഥിതി മന്ത്രാലയം. വഴുതന ഉൽപാദനം 18,55 ടണ്ണും മാരോപ്പഴം 18,500 ടണ്ണും  കവിഞ്ഞു. 11,320 ടണ്ണിൽ കൂടുതൽ കോളി ഫ്ലവറും 13,420 ടണ്ണിൽ കൂടുതൽ കാബേജും ഉൽപാദിപ്പിക്കുന്നുണ്ട്​. കുരുമുളക്​ ഉൽപാദനം 4,000 ടണ്ണാണ്​. 

ചില രാജ്യങ്ങളിൽനിന്നുള്ള പഴം^പച്ചക്കറി ഇറക്കുമതി നിരോധിച്ചത്​ വിപണിയെ കാര്യമായ രീതിയിൽ ബാധിച്ചിട്ടില്ലെന്ന്​ മന്ത്രാലയം അസിസ്​റ്റൻറ്​ അണ്ടർ സെക്രട്ടറി സുൽത്താൻ ബിൻ അൽവാൻ ആൽ ഹബ്​സി പറഞ്ഞു. ജനങ്ങൾ ആശങ്കപ്പെടേണ്ട ഒരു കാര്യവുമില്ല. നിരോധനം ഏർപ്പെടുത്തിയത്​ മൂലമുള്ള പഴങ്ങളുടെയും പച്ചക്കറികളുടെയും കുറവ്​ സൗദി അറേബ്യ, ഇന്ത്യ, പാകിസതാൻ, മൊറോക്കോ, തുനീഷ്യ, ദക്ഷിണാഫ്രിക്ക, നെതർലാൻഡ്​സ്​, മലേഷ്യ, ന്യുസിലാൻഡ്​, അമേരിക്ക, ബംഗ്ലാദേശ്, ഇറാൻ, തുർക്കി, ഫ്രാൻസ്​, ഇറ്റലി, സ്​പെയിൻ തുടങ്ങിയ രാജ്യങ്ങളിൽനിന്നുള്ള ഇറക്കുമതിയിലൂടെ പരിഹരിക്കുന്നുണ്ട്​. 
രാജ്യത്തെ വിപണിയിൽനിന്ന്​ ലഭിക്കുന്ന ഉൽപന്നങ്ങൾ സുരക്ഷിതവും ഉ​പഭോക്​താക്കളുടെ ആരോഗ്യത്തിന്​ ഒരുവിധ ഹാനിയും ഉണ്ടാക്കാത്തതുമാണ്​. കീടനാശിനി അവശിഷ്​ടങ്ങൾ പഴങ്ങളിലും പച്ചക്കറികളിലും കൂടുതൽ സമയം നിലനിൽക്കുന്നില്ലെങ്കിൽ അവ കൊണ്ട്​ പ്രശ്​നമില്ല. ചില രാജ്യങ്ങളിൽനിന്നുള്ള പഴങ്ങളും പച്ചക്കറികളും നിരോധിക്കാൻ തീരുമാനിച്ചത്​ അവയുടെ ലഭ്യതയെയും വിലയെയും ബാധിക്കാത്ത തരത്തിൽ ഉപഭോക്​താക്കളുടെ ആരോഗ്യത്തിന്​ ഭാവിയിലുണ്ടായേക്കാവുന്ന ഭീഷണി ഒഴിവാക്കാനാണ്​.

മാനദണ്ഡങ്ങൾ പാലിക്കുന്നത്​ വരെ ഇൗ രാജ്യങ്ങളിലെ ഉൽപന്നങ്ങൾക്കുള്ള നിരോധം തുടരുമെന്നും സുൽത്താൻ ബിൻ അൽവാൻ ആൽ ഹബ്​സി അറിയിച്ചു. അനുവദനീയമായ അളവിൽ കൂടുതൽ കീടനാശിനി കണ്ടെത്തിയതിനാൽ ഏപ്രിൽ 24നാണ്​ അഞ്ച്​ രാജ്യങ്ങളിൽനിന്നുള്ള ചിലയിനം പഴങ്ങളുടെയും പച്ചക്കറികളുടെയും ഇറക്കുമതി യു.എ.ഇ കാലാവസ്​ഥ വ്യതിയാന^പരിസ്​ഥിതി മന്ത്രാലയം നിരോധിച്ചത്​. ഇൗജിപ്​ത്​, ഒമാൻ, ജോർദാൻ, ലെബനാൻ, യെമൻ രാജ്യങ്ങളിൽനിന്നുള്ള ഉൽപന്നങ്ങൾക്കാണ്​ നിരോധനം. ​മെയ്​ 15 മുതലാണ്​ നിരോധനം നിലവിൽ വരുന്നത്​. ഇൗജിപ്​തിലെ വിവിധയിനം കുരുമുളക്​, ജോർദാനിലെ കാബേജ്​, കോളിഫ്ലവർ, ലെറ്റ്യൂസ്​, സ്​ക്വാഷ്​, പയർ, ലെബനാനിലെ തണ്ണിമത്തൻ, കാരറ്റ്​, ഒമാനിലെ ചീര എന്നിവയുടെയും യെമനി​ലെ എല്ലാ ഇനം പഴങ്ങളു​ടെയും ഇറക്കുമതിയാണ്​ നിരോധിച്ചത്​.