മദ്യം കഴിക്കാത്തവർക്ക് കരൾരോഗങ്ങൾ പ്രത്യേകിച്ച് മാരകരോഗമായ ലിവര്‍ സിറോസിസ് (liver cirrhosis) വരുമോ...? സാധ്യതയില്ല എന്നായിരിക്കും പലരും പറയുന്ന ഉത്തരം. എന്നാൽ, യാഥാർഥ്യം മറ്റൊന്നാണ്. ഈ അടുത്തകാലത്തായി മദ്യപാനികളിൽ കാണുന്ന അത്രയും തോതിൽ കരൾരോഗങ്ങൾ മദ്യപിക്കാത്തവരിലും കാണുന്നുണ്ട്. ഇതിനെ നോണ്‍ആല്‍ക്കഹോളിക് ഫാറ്റി ലിവര്‍ ഡിസീസ് (NAFLD) എന്നാണ് വിളിക്കുന്നത്.
ജീവിതശൈലീരോഗങ്ങളുടെ ആധിക്യംമൂലം ഈ രോഗം സാധാരണമായിട്ടുണ്ടെങ്കിലും സ്ഥിരമായി മദ്യപിക്കുന്നവരില്‍ മാത്രം കണ്ടുവരുന്ന രോഗമാണ് ഇതെന്ന തെറ്റിദ്ധാരണ സമൂഹത്തിൽ ശക്തമായിട്ടുണ്ട്. അതുകൊണ്ടുതന്നെ പൊതുവെ മാന്യമായി ജീവിച്ചുവരുന്നവരെ ലിവര്‍ സിറോസിസ് ബാധിച്ചാൽ അവരെ ബന്ധുക്കളും ചുറ്റിലുമുള്ളവരും സംശയത്തോടെയാണ് നോക്കുന്നത്. രോഗിക്ക് ആരും അറിയാതെ അതിരഹസ്യമായി മദ്യപിക്കുന്ന സ്വഭാവം ഉണ്ടെന്ന് സമൂഹം കരുതുകയും ചെയ്യുന്നു.
പോഷകാഹാരങ്ങൾക്ക് പ്രാധാന്യം നൽകാതെയുള്ള ഫാസ്റ്റ് ഫുഡ്, ബേക്കറി ഭക്ഷണങ്ങളുടെ അമിതമായ ഉപയോഗം, വ്യായാമമില്ലായ്മ, മാനസിക സമ്മർദം തുടങ്ങി ജീവിതശൈലി സൃഷ്ടിക്കുന്ന പ്രമേഹം, അമിതവണ്ണം, കുടവയര്‍, രക്തത്തില്‍ അധികമായി കൊഴുപ്പിെൻറ അംശം കാണപ്പെടുന്ന ഹൈപ്പര്‍ലിപിഡേമിയ (hyperlipidemia) അല്ലെങ്കിൽ അമിത കൊളസ്ട്രോൾ തുടങ്ങിയ രോഗങ്ങൾ അപകടകരമായ തോതിൽ വർധിച്ചുവരുന്നതിെൻറ ഭാഗമായാണ് ഭൂരിഭാഗം പേരിലും കരൾവീക്കം (Fatty liver disease) കണ്ടുവരുന്നത്.
ഇത്തരം ജീവിതശൈലി രോഗങ്ങൾ മൂലം കരളിലെ കോശങ്ങളില്‍ കൊഴുപ്പ് അടിയുന്നതുമൂലമാണ് കരൾവീക്കം സംഭവിക്കുന്നത്. സമീപകാലത്തായി നല്ലൊരു ശതമാനം പേരിലും കരൾവീക്കം കണ്ടുവരുന്നുണ്ടെങ്കിലും അത് വലിയ തോതിൽ ആരോഗ്യപ്രശ്നങ്ങൾ സൃഷ്ടിക്കാറില്ല. അതേസമയം, വളരെ കുറച്ച് ശതമാനം പേരില്‍ ഇത് കരളില്‍ വ്രണങ്ങളുണ്ടാകുന്നതിനും തുടർന്ന് ചികിത്സ വൈകിയാൽ ലിവർ സിറോസിസിനും കാരണമാകുന്നു.
ഇതിനുപുറമെ വൈറസ് രോഗമായ ഹെപ്പറ്റൈറ്റിസ്-ബി, ഹെപ്പറ്റൈറ്റിസ്-സി, സ്വയം പ്രതിരോധസംവിധാനങ്ങളിലെ തകരാറ്, ശരീരത്തിലെ ഉപാപചയ (Metabolism) പ്രവര്‍ത്തനങ്ങളിലെ താളപ്പിഴകൾ മൂലം അമിതതോതിൽ രാസവസ്തുക്കള്‍ കരളിൽ അടിഞ്ഞുകൂടൽ തുടങ്ങിയവയും ലിവര്‍ സിറോസിസിന് കാരണമാകാറുണ്ട്.
തുടക്കത്തിൽ രോഗലക്ഷണങ്ങള്‍ പുറത്തുകാണാത്തതിനാൽ രോഗം പെട്ടെന്ന് തിരിച്ചറിയാനാവില്ല. കരളിെൻറ 70 ശതമാനവും പ്രവർത്തനരഹിതമാകുന്നതോടെയാണ് നേരിയതോതിലെങ്കിലും ലക്ഷണങ്ങൾ പ്രത്യക്ഷപ്പെടുക. അടിവയറ്റില്‍ വേദന, തലചുറ്റല്‍, ക്ഷീണം, ഭക്ഷണത്തോട് വിമുഖത, അസ്വസ്ഥത, ഭാരക്കുറവ് എന്നീ ലക്ഷണങ്ങളാണ് ആദ്യഘട്ടത്തിൽ കാണാനാവുക.
പലപ്പോഴും മറ്റു ശാരീരിക അസുഖങ്ങളുടെ ഭാഗമായോ ഹെൽത്ത് ചെക്കപ്പിെൻറ ഭാഗമായോ നടത്തുന്ന അള്‍ട്രാസൗണ്ട് സ്‌കാനിങ്, ലിവര്‍ ഫങ്ഷന്‍ ടെസ്റ്റ്, രക്തപരിശോധന എന്നിവ നടത്തുേമ്പാഴാണ് രോഗം കണ്ടെത്തുക. ഇത്തരം പരിശോധനകൾക്ക് വിധേയമാകാത്തവരിൽ പ്രകടമായ ലക്ഷണങ്ങളില്ലാതെ വളരെ സാവധാനത്തിലാണ് കരളിൽ സിറോസിസ് വ്യാപിക്കുന്നത്.
മാരകമാവുേമ്പാൾ
ആന്തരികാവയവങ്ങളായ വന്‍കുടല്‍, പ്ലീഹ എന്നിവയില്‍നിന്നുള്ള രക്തം കരളിലെത്തിക്കുന്നത് നേരിയ ധമനികളിലൂടെയാണ്. ഈ ധമനികളിൽനിന്ന് എത്തുന്ന രക്തത്തെ സിറോസിസ് ബാധിച്ച കരൾ കടത്തിവിടാതെ തടയുന്നു. ഇതിെൻറ ഫലമായി ധമനികളിൽ രക്തത്തിെൻറ സമ്മർദം കൂടുകയും രക്തക്കുഴലുകള്‍ വീർത്ത് പൊട്ടുകയും ചെയ്യുന്നു. ഇങ്ങനെ ധമനികൾ പൊട്ടിയാല്‍ രോഗിയിൽ ആന്തരിക രക്തസ്രാവം ഉണ്ടാവുകയും തുടർന്ന് രക്തം ഛർദിച്ച് മാരകാവസ്ഥയിലാവുകയും ചെയ്യുന്നു. സിറോസിസ് ബാധ രൂക്ഷമാകുന്നതോടെ കരളിലെ കൊഴുപ്പിെൻറ സംശ്ലേഷണം നടക്കാതെ വരുകയും അത് ശരീരത്തിലെ ഫ്ലൂയിഡ് സന്തുലിതാവസ്ഥയെ തകിടം മറിച്ച് കോശങ്ങളിൽ നീരുവന്ന് കൈകാലുകളും അടിവയറും വീർക്കാൻ തുടങ്ങുകയും ചെയ്യുന്നു.
ആഹാരം, മരുന്നുകൾ തുടങ്ങിയവിലൂടെ ശരീരത്തിൽ എത്തുന്ന വിഷാംശങ്ങള്‍ നീക്കംചെയ്യുന്നത് കരളാണ്. കരളിെൻറ പ്രവർത്തനം മന്ദീഭവിക്കുന്നതോടെ അത് രോഗിയുടെ ഓർമയെ ബാധിക്കുകയും തലച്ചോറില്‍ വിഷാംശം (Toxins) കെട്ടിക്കിടക്കുന്ന ഗൗരവമാര്‍ന്ന ഹെപാറ്റിക് എന്‍സെഫലോപതി (hepatic encephalopathy)എന്ന അവസ്ഥയിലെത്തുകയും ചെയ്യുന്നു.
ചികിത്സ
എല്ലാ നോണ്‍ ആല്‍ക്കഹോളിക് ഫാറ്റി ലിവര്‍ ഡിസീസും മാരകമായ ലിവർ സിറോസിസ് ആകാറില്ലെങ്കിലും കരൾവീക്കം കണ്ടെത്തിയാൽ അത് മാരകമായി മാറാതിരിക്കാനുള്ള മുൻകരുതലുകൾ സ്വീകരിക്കേണ്ടതാണ്. ഇതിൽ ഏറ്റവും പ്രധാനം ജീവിതശൈലിയിൽ ആവശ്യമായ മാറ്റങ്ങൾ വരുത്തുകയും ഇടവിട്ട കാലയളവുകളിൽ കരളിെൻറ പ്രവർത്തനം പരിശോധനകളിലൂടെ നിരീക്ഷിക്കുകയും ചെയ്യണം.
തുടക്കത്തിൽ മരുന്നുകൾ ഉപയോഗിച്ചുള്ള ചികിത്സയും ഗരുതരാവസ്ഥയിൽ കരൾ മാറ്റിവെക്കലുമാണ് പരിഹാരം. ചികിത്സയോടൊപ്പം പതിവായി വ്യായാമം ചെയ്യുക, സമീകൃത ഭക്ഷണക്രമം പാലിക്കുക, സിഗരറ്റ്, മദ്യം എന്നിവ ഒഴിവാക്കുക തുടങ്ങിയ ജീവിതശൈലിയിലെ മാറ്റങ്ങൾ നടപ്പാക്കുകയും വേണം.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.