പഞ്ചാബിൽ ലഹരിമരുന്ന് അമിതമായി ഉപയോഗിച്ച ഇരുപതുകാരൻ മരിച്ചു

അമൃത്‌സർ (പഞ്ചാബ്): ലഹരിമരുന്നിന്റെ അമിത ഉപയോഗത്തെ തുടർന്ന് ഇരുപതുകാരൻ മരിച്ചു. പഞ്ചാബിലെ അമൃത്സറിനടുത്തുള്ള ടാൻ തരൺ റോഡിലെ കോട് മിത് സിംഗ് പ്രദേശത്തെ താമസക്കാരനായ സജൻ സിങ് എന്ന യുവാവാണ് മരിച്ചത്. ഇയാളുടെ മൂത്ത സഹോദരൻ കരൺ സിംഗ് (25) ഏതാനും വർഷങ്ങൾക്ക് മുമ്പ് ലഹരിമരുന്ന് ഉപയോഗം മൂലം മരിച്ചിരുന്നു. പ്രദേശത്ത് വ്യാപകമായ ലഹരി കച്ചവടം നടക്കുന്നതായി പരാതിയുണ്ട്.

ലഹരിമരുന്ന് കച്ചവടക്കാരന്റെ പേര് പറഞ്ഞാൽ അവർ കൊല്ലുമെന്ന് സജൻ സിങ്ങിന്റെ പിതാവ് സർവാൻ സിങ് പറഞ്ഞു. തന്റെ രണ്ട് മക്കളെയും ലഹരിമരുന്ന് കാരണം നഷ്ടപ്പെട്ടു. മറ്റൊരു കുട്ടിയും ഇനി ലഹരിക്ക് അടിമയായി മരിക്കരുതെന്ന് ഗ്രഹിക്കുന്നു. ഈ വിപത്തിനെതിരെ പോരാടുമെന്നും അദ്ദേഹം പറഞ്ഞു.

അതിനിടെ അജ്‌നാലയിൽ രഞ്ജിത് മസിഹ് എന്ന യുവാവ് അമിതമായി ലഹരിമരുന്ന് ഉപയോഗിച്ച് മരിച്ചതിനെ തുടർന്ന് രണ്ടുപേരെ പൊലീസ് അറസ്റ്റ് ചെയ്തു. അജ്‌നാലയിലെ ആദർശ് നഗറിലെ താമസക്കാരായ ഹാപ്പി, സാഹിൽ എന്നിവരാണ് അറസ്റ്റിലായതെന്ന് അന്വേഷണ ഉദ്യോഗസ്ഥനായ എ.എസ്.ഐ മേജർ സിങ് പറഞ്ഞു.