ന്യൂഡൽഹി: മലപ്പുറം ജില്ലയിലെ പ്ലസ് ടു സീറ്റുകളുടെ അപര്യാപ്തതക്ക് മൂന്നാഴ്ചക്കകം പരിഹാരം കാണാൻ സുപ്രീംകോടതി സംസ്ഥാന സർക്കാറിന് നിർദേശം നൽകി. എയ്ഡഡ് സ്കൂളുകൾക്ക് അധിക ബാച്ച് അനുവദിക്കണമെന്ന് സുപ്രീംകോടതിക്ക് നിർദേശം നൽകാനാവില്ലെന്നും വിദ്യാഭ്യാസ ആവശ്യം പഠിച്ച് മലപ്പുറം ജില്ലയിൽ അധികബാച്ചുകൾ അനുവദിക്കുന്ന കാര്യത്തിൽ സംസ്ഥാന സർക്കാറാണ് തീരുമാനം എടുക്കേണ്ടതെന്നും ജസ്റ്റിസുമാരായ സഞ്ജയ് കിഷൻ കൗൾ, എം.എം സുന്ദരേഷ് എന്നിവരടങ്ങുന്ന ബെഞ്ച് വ്യക്തമാക്കി.
സർക്കാറിന് സാമ്പത്തിക ബാധ്യത വരുത്താതെ അൺ എയ്ഡഡ് ബാച്ച് തുടങ്ങാൻ ഹരജിക്കാർക്ക് താൽപര്യമുണ്ടെങ്കിൽ അക്കാര്യം സംസ്ഥാന സർക്കാറിനെ അറിയിക്കണമെന്നും വിലവിലുള്ള നിയമപ്രകാരം സംസ്ഥാന സർക്കാർ അത് പരിഗണിക്കണമെന്നും ബെഞ്ച് വിധിച്ചു. മൂന്നാഴ്ചക്കകം പ്രശ്നപരിഹാരത്തിന് സംസ്ഥാന സർക്കാർ കൈകൊള്ളുന്ന തീരുമാനത്തിൽ എതിർപ്പ് ഉണ്ടെങ്കിൽ ഹരജിക്കാർക്ക് കേരള ഹൈകോടതിയെ സമീപിക്കാമെന്നും സുപ്രീംകോടതി കൂട്ടിച്ചേർത്തു. മലപ്പുറം ജില്ലയിലെ പാറക്കടവ് മൂന്നിയൂർ ഹയർ സെകൻഡറി സ്‌കൂൾ അധിക ബാച്ചിനായി സമർപ്പിച്ച ഹരജി തീർപ്പാക്കിയാണ് സുപ്രീം കോടതി ഉത്തരവ്.
ഈ അക്കാദമിക വർഷത്തിൽ തുടങ്ങിയ പ്രവേശന നടപടികൾ ഉടൻ അവസാനിക്കുമെന്നും സെപ്റ്റംബർ മാസത്തിൽ പ്ലസ് വൺ കാസുകൾ തുടങ്ങുമെന്നും മൂന്നിയൂർ ഹയർ സെകൻഡറി സ്കൂളിന് വേണ്ടി ഹാജരായ മുതിർന്ന സുപ്രീംകോടതി അഭിഭാഷകൻ ശ്യാം ദിവാൻ ബോധിപ്പിച്ചപ്പോഴാണ് മലപ്പുറം ജില്ലയിലെ പ്ലസ് ടു സീറ്റുകളുടെ കുറവ് പരിഹരിക്കാനുള്ള നടപടി മൂന്നാഴ്ചക്കകം എടുക്കാൻ സർക്കാറിനോട് ആവശ്യപ്പെട്ടത്. മൂന്നിയൂർ പഞ്ചായത്തിലും പ്ലസ് ടു സീറ്റുകളിലുള്ള എണ്ണക്കുറവുകൾ ശ്യാം ദിവാൻ ചൂണ്ടിക്കാട്ടി.
മലപ്പുറം ജില്ലയിൽ പൊതുവെയും മൂന്നിയുർ വില്ലേജിൽ വിശേഷിച്ചും പ്ലസ് ടു സീറ്റുകൾ അപര്യാപ്തമാണെന്നും സംസ്ഥാന സർക്കാറിന്‍റെ വിദഗ്ധ സമിതി റിപ്പോർട്ടുണ്ട് എന്ന് ഹരജി ഫയൽ ചെയ്ത സുപ്രീംകോടതി അഭിഭാഷകൻ അഡ്വ. സുൽഫിക്കർ അലി ബോധിപ്പിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.