ആറുവയസുകാരിയെ ബലാത്സംഗം ചെയ്​ത്​ കൊന്ന പ്രതിയുടെ മരണം; ജുഡീഷ്യൽ അന്വേഷണത്തിന്​ ഉത്തരവിട്ട്​​ തെലങ്കാന ഹൈകോടതി

ഹൈദരാബാദ്​: തെലങ്കാന സെയ്​ദാബാദിൽ ആറുവയസുകാരിയെ ബലാത്സംഗം ചെയ്​ത്​ കൊലപ്പെടുത്തിയ പ്രതിയെ റെയിൽവേ ട്രാക്കിൽ മരിച്ച നിലയിൽ കണ്ടെത്തിയ സംഭവത്തിൽ ജുഡീഷ്യൽ അ​​ന്വേഷണം. പല്ലാക്കൊണ്ട രാജു​വിന്‍റെ മരണത്തിൽ ജുഡീഷ്യൽ അന്വേഷണം നടത്താനാണ്​ തെലങ്കാന ഹൈകോടതിയുടെ നിർദേശം.

വാറങ്കൽ ജില്ലയിലെ ഖാൻപൂരിലെ റെയിൽവേ ട്രാക്കിൽ തിരിച്ചറിയാൻ കഴിയാത്ത തരത്തിലായിരുന്നു മൃതദേഹം. പ്രതി റെയിൽവേ ട്രാക്കിൽ ചാടി ആത്മഹത്യ ചെയ്യുകയായിരുന്നുവെന്നായിരുന്നു വ്യാഴാഴ്ച പൊലീസ്​ നൽകിയ വിശദീകരണം.

വെളിയാഴ്​ച കോടതിയുടെ പരിഗണനയിലെത്തിയ വിഷയത്തിൽ വ്യാഴാഴ്ച രാത്രി തന്നെ മൃതദേഹം സംസ്​കരിച്ചതിൽ ആക്​ടിങ്​ ചീഫ്​ ജസ്റ്റിസ്​ ആശ്ചര്യം രേഖപ്പെടുത്തി.

രാജുവിന്‍റെ മരണം ആസൂത്രിതമെന്ന്​ കാട്ടി സിവിൽ ലിബർട്ടീസ്​ കമ്മിറ്റി പ്രസിഡന്‍റ്​ പ്രഫ. ലക്ഷ്​മൺ സമർപ്പിച്ച ഹരജി പരിഗണിക്കുകയായിരുന്നു കോടതി. നാലാഴ്ചക്കകം അന്വേഷണ റ​ിപ്പോർട്ട്​ സമർപ്പിക്കാനാണ്​ നിർദേശം.

സെപ്​റ്റംബർ ഒന്നിനായിരുന്നു നാടിനെ നടുക്കിയ ആറു വയസുകാരിയുടെ കൊല​പാതകം. 27കാരനായ പ്രതി അയൽവാസിയായ പെൺകുട്ടിയെ ബലാത്സംഗം ചെയ്​ത്​ കൊലപ്പെടുത്തുകയായിരുന്നു. കുഞ്ഞിന്‍റെ മൃതദേഹം ബെഡ്​ഷീറ്റിൽ പൊതിഞ്ഞ നിലയിൽ രാജുവിന്‍റെ വീട്ടിൽനിന്ന്​ ക​െണ്ടത്തുകയായിരുന്നു. പ്രതിയുടെ ഫോ​ട്ടോ പൊലീസ്​ പുറത്തുവിട്ടിരുന്നു.

കുഞ്ഞിനെ ബലാത്സംഗം ചെയ്​ത്​ കൊലപ്പെടുത്തിയ പ്രതിയെ എൻകൗണ്ടറിലൂടെ കൊലപ്പെടുത്തണമെന്ന്​ തെലങ്കാന തൊഴിൽ മന്ത്രി മല്ലം റെഡ്ഡി പറഞ്ഞിരുന്നു. കൂടാതെ മൽക്കാജ്​ഗിരി എം.പിയും തെലങ്കാന പ്രദേശ്​ കോൺഗ്രസ്​ കമ്മിറ്റി പ്രസിഡന്‍റുമായ രേവന്ത്​ റെഡ്ഡിയും എൻകൗണ്ടറുകൾ നടക്കുമെന്ന രീതിയിൽ പരാമർശം നടത്തിയിരുന്നു. ഇതിനുപിന്നാലെയാണ്​ രാജുവിന്‍റെ മൃതദേഹം റെയിൽവേ ട്രാക്കിൽ കണ്ടെത്തിയത്​. ഇതോടെ രാജുവിന്‍റെ മരണം ആത്മഹത്യ​യാണോ അതോ എൻകൗണ്ടറിലൂടെ വധിച്ചതാണോ എന്ന തരത്തിൽ പ്രചാരണങ്ങളും ആരംഭിക്കുകയായിരുന്നു.

സെപ്​റ്റംബർ പത്തിന്​ രാജു​വിന്‍റെ മാതാവിനെയും ഭാര്യയെയും സ്​റ്റേഷനിൽ തടഞ്ഞുവെച്ചിരുന്നു. എന്നാൽ ബുധനാഴ്ച രാത്രി രാജുവിനെ മരിച്ചനിലയിൽ കണ്ടെത്തുന്നതിന്​ മണിക്കൂറുകൾക്ക്​ മുമ്പ്​ ഇരുവരെയും വിട്ടയച്ചിരുന്നു. പൊലീസ്​ രാജുവിനെ കൊന്നതാണെന്നാണ്​ മാതാവും ഭാര്യയും ഉന്നയിക്കുന്ന ആരോപണം.