തിരുവനന്തപുരം: സ്ഥലംമാറ്റം കോടതി കയറിയതോടെ അധ്യയന വർഷാരംഭത്തിൽ എവിടെ നിൽപ്പുറപ്പിക്കണമെന്നറിയാതെ ഹയർ സെക്കൻഡറി അധ്യാപകർ. നേരത്തെ ഇറക്കിയ ഉത്തരവ് പ്രകാരം ഭൂരിഭാഗം അധ്യാപകരും പുതിയ സ്കൂളുകളിൽ എത്തിയതിന് പിന്നാലെ സ്ഥലംമാറ്റ പട്ടിക കേരള അഡ്മിനിസ്ട്രേറ്റിവ് ട്രൈബ്യൂണൽ റദ്ദാക്കിയിരുന്നു. പകരം ഔട്ട് സ്റ്റേഷൻ സർവിസ് ഡ്യൂട്ടിയിലെ സീനിയോറിറ്റി മാതൃജില്ലക്ക് പുറമെ സമീപ ജില്ലകളിലേക്ക് കൂടി പരിഗണിച്ചുള്ള പട്ടിക തയാറാക്കാനും അതുപ്രകരമുള്ള സ്ഥലംമാറ്റം അധ്യയന വർഷം തുടങ്ങുംമുമ്പ് പൂർത്തിയാക്കാനും ട്രൈബ്യൂണൽ ഉത്തരവിട്ടിരുന്നു.
എന്നാൽ, ട്രൈബ്യൂണൽ ഉത്തരവിനെതിരെ ചില അധ്യാപകർ ഹൈകോടതിയെ സമീപിച്ചതോടെ തൽസ്ഥിതി തുടരാൻ നിർദേശിച്ചിരിക്കുകയാണ്. ട്രൈബ്യൂണൽ ഉത്തരവ് സ്റ്റേ ചെയ്യണമെന്ന ആവശ്യത്തിലാണ് ഹൈകോടതി നടപടി. തിങ്കളാഴ്ച സ്കൂളുകൾ തുറക്കുമ്പോഴും ഹയർ സെക്കൻഡറി അധ്യാപകർക്ക് ഏത് സ്കൂളിൽ ജോലി ചെയ്യണ്ടിവരുമെന്ന കാര്യത്തിൽ അനിശ്ചിതത്വമാണ്. സ്ഥലംമാറ്റത്തിന് അനുസരിച്ച് കുടുംബത്തോടെ താമസം മാറുന്നതും മക്കൾക്ക് വിദ്യാഭ്യാസ സൗകര്യം ഒരുക്കുന്നതിലും തീരുമാനമെടുക്കാനാകാത്ത സാഹചര്യം. സ്ഥലംമാറ്റത്തിൽ ഇനി ഹൈകോടതി വിധി വരട്ടെ എന്ന നിലപാടിലാണ് വിദ്യാഭ്യാസ വകുപ്പ്. അതിനാൽ ട്രൈബ്യൂണൽ ഉത്തരവ് പ്രകാരമുള്ള സ്ഥലംമാറ്റത്തിലേക്ക് സർക്കാർ പോകില്ല.
8007 അധ്യാപകരാണ് സ്ഥലംമാറ്റ പട്ടികയിലുണ്ടായിരുന്നത്. 7,618 പേർ ഇതുവരെ സ്ഥലംമാറി. പട്ടിക റദ്ദാക്കിയതോടെ 389 പേരുടെ സ്ഥലംമാറ്റം തടയപ്പെടുകയും ചെയ്തു. പട്ടിക റദ്ദാക്കിയത് ഇതിനകം സ്ഥലംമാറിയവരെയും ബാധിക്കും.
പട്ടിക റദ്ദാക്കിയ ട്രൈബ്യൂണൽ നടപടി ഹൈകോടതി ശരിവെച്ചാൽ പുതിയ പട്ടിക തയാറാക്കി അടിയന്തരമായി വീണ്ടും സ്ഥലംമാറ്റം നടത്തേണ്ടിവരും. സ്ഥലംമാറ്റവുമായി ബന്ധപ്പെട്ട് പൊതുവിദ്യാഭ്യാസ ഡയറക്ടർക്കെതിരെ രണ്ട് കോടതിയലക്ഷ്യ ഹരജികൾ ട്രൈബ്യൂണലിന്‍റെ പരിഗണനയിലുമാണ്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.