കൊച്ചി: മുഖ്യമന്ത്രിക്കെതിരെ കരിങ്കൊടികാട്ടി പ്രതിഷേധിക്കുന്നതിനിടെ നടന്ന പൊലീസ് നടപടിക്ക് ഇരയായവർക്ക് നഷ്ടപരിഹാരം നൽകണമെന്നതടക്കം ആവശ്യപ്പെടുന്ന ഹരജി ഹൈകോടതി തള്ളി. പ്രതിഷേധക്കാർക്കെതിരെ സ്വീകരിച്ച നടപടികൾ നിയമവിരുദ്ധമാണെന്ന് പ്രഖ്യാപിക്കണമെന്നുൾപ്പെടെ ചൂണ്ടിക്കാട്ടി പെരുമ്പാവൂർ സ്വദേശി സാം ജോസഫ് നൽകിയ ഹരജിയാണ് ചീഫ് ജസ്റ്റിസ് എസ്. മണികുമാർ, ജസ്റ്റിസ് മുരളി പുരുഷോത്തമൻ എന്നിവരടങ്ങുന്ന ഡിവിഷൻ ബെഞ്ച് തള്ളിയത്.
കഴിഞ്ഞ വർഷം കൊച്ചി മെട്രോയിലെ പരിപാടിയിൽ മുഖ്യമന്ത്രി പങ്കെടുക്കാനെത്തിയപ്പോൾ കറുത്ത വേഷം ധരിച്ച് വേദിക്ക് സമീപത്ത് കണ്ടതിനെ തുടർന്ന് ട്രാൻസ്‌ജെൻഡറിനെ കസ്റ്റഡിയിലെടുത്തിരുന്നു. ഈ സംഭവത്തെ തുടർന്നാണ് ഹരജി നൽകിയത്.
പൊലീസിനെതിരെ അച്ചടക്ക നടപടി സ്വീകരിക്കണമെന്നും മൂന്നു വർഷത്തിനിടെ രജിസ്റ്റർ ചെയ്ത സമാന കേസുകളുടെ വിവരങ്ങൾ ഹാജരാക്കാൻ നിർദേശിക്കണമെന്നുമുള്ള ആവശ്യങ്ങളും ഉന്നയിച്ചിരുന്നു. സർക്കാറിനെയും ഡി.ജി.പിയെയും എതിർ കക്ഷികളാക്കിയാണ് ഹരജി നൽകിയിരുന്നത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.