ചെന്നൈ: കോവിഡ് വ്യാപനത്തിന്റെ പശ്ചാത്തലത്തിൽ കേരളത്തിൽ നിന്നുള്ളവർക്ക് കൂടുതൽ സംസ്ഥാനങ്ങൾ നിയന്ത്രണം ഏർപ്പെടുത്തുന്നു. തമിഴ്നാടും പശ്ചിമബംഗാളുമാണ്‌ പുതുതായി നിയന്ത്രണം ഏർപ്പെടുത്തിയിട്ടുള്ളത്.
കോവിഡ് വ്യാപനം വീണ്ടും ശക്തിപ്പെടുന്നതിനാൽ മഹാരാഷ്ട്ര, കേരളം എന്നീ സംസ്ഥാനങ്ങളിൽനിന്നുള്ള യാത്രക്കാർക്കാണ് തമിഴ്നാടും നിയന്ത്രണം കർക്കശമാക്കുന്നത്. ഇവിടെ നിന്നെത്തുന്നവർ നിർബന്ധമായും ഏഴ് ദിവസം ക്വാറന്‍റീനിൽ കഴിയണം. ഒരാഴ്ചക്കാലം സ്വയം നിരീക്ഷണവിധേയമാക്കണം. ഇൗ കാലയളവിൽ പനി, ജലദോഷം, ശ്വാസതടസ്സം എന്നിവ ഉണ്ടായാൽ ഉടൻ ആശുപത്രികളിൽ പരിശോധന നടത്തണം.
വിമാനത്താവളങ്ങളിൽ യാത്രക്കാരെ കോവിഡ് പരിശോധനക്ക് വിധേയമാക്കും. നെഗറ്റീവായാൽ മാത്രമെ വിമാനത്താവളത്തിൽനിന്ന് പുറത്തുപോകാൻ കഴിയൂ. അല്ലാത്തവരെ ചികിൽസാ കേന്ദ്രങ്ങളിലേക്ക് മാറ്റും. പ്രത്യേക സാഹചര്യത്തിൽ തമിഴ്നാടതിർത്തി ചെക്പോസ്റ്റുകളിൽ പരിശോധന ഉൗർജിതപ്പെടുത്തിയിട്ടുണ്ട്. വിനോദസഞ്ചാര കേന്ദ്രമായ ഉൗട്ടിയിലെത്തുന്നവരും ഇ-പാസും കോവിഡ് നെഗറ്റീവ് പരിശോധന സർട്ടിഫിക്കറ്റും ചെക്പോസ്റ്റുകളിൽ ഹാജരാക്കണം. ഇതറിയാതെ വാഹനങ്ങളിലെത്തുന്ന നിരവധി പേർ നീലഗിരി ജില്ലാതിർത്തികളിൽനിന്ന് മടങ്ങുന്നുണ്ട്.
പശ്ചിമ ബംഗാൾ കേരളമടക്കം നാല് സംസ്ഥാനങ്ങൾക്കാണ് നിയന്ത്രണമേർപ്പെടുത്തിയിട്ടുള്ളത്. കേരളം, തെലങ്കാന, കർണാടക, മഹാരാഷ്ട്ര എന്നിവിടങ്ങളിൽ നിന്ന് ബംഗാളിലെത്തുന്നവർ കോവിഡ് നെഗറ്റീവ് ആർടി-പിസിആർ പരിശോധ ഫലം ഹാജരാക്കണമെന്നാണ് നിർദേശം.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.