സുൽത്താൻ ബത്തേരി: ആത്മഹത്യക്കുമുമ്പ് വയനാട് ഡി.സി.സി ട്രഷറർ എൻ.എം. വിജയൻ എഴുതിയ കത്തുകൾ മക്കൾ കൈമാറിയിട്ടും നിസ്സംഗത തുടർന്ന കെ.പി.സി.സി നേതൃത്വത്തിന്റെ നടപടി അവർക്കുതന്നെ വിനയായി. കത്ത് മാധ്യമങ്ങളിലൂടെ പുറത്തുവന്നതോടെ നേതാക്കൾക്ക് പ്രതികരിക്കാതിരിക്കാൻ കഴിയാതെയായി. കെ.പി.സി.സി പ്രസിഡന്റ് കെ. സുധാകരൻ പറഞ്ഞത് കത്ത് വായിച്ചിട്ടില്ലെന്നാണ്. പ്രതിപക്ഷനേതാവ് വി.ഡി. സതീശനും ഇതേ രീതിയിലാണ് പ്രതികരിച്ചത്. എന്നാൽ, എൻ.എം. വിജയന്റെ മൂത്ത മകൻ വിജേഷ് പറയുന്നത് ഇവർക്ക് രണ്ടുപേർക്കും കത്ത് നേരിട്ട് കൊണ്ടുപോയി ഏൽപ്പിക്കുകയും അവർ വായിക്കുകയും ചെയ്തെന്നാണ്.
കത്ത് തങ്ങൾ നേരിട്ടുകൈമാറിയിരുന്നെന്ന് വിജേഷും ഭാര്യ പത്മജയും മണിച്ചിറയിലെ വീട്ടിൽ വെച്ച് പറഞ്ഞു. കത്ത് പൂർണമായി വായിച്ച മറ്റുള്ളവരുമായി ചർച്ച ചെയ്യട്ടെ എന്നാണ് കെ. സുധാകരൻ പറഞ്ഞത്. പ്രതിപക്ഷ നേതാവ് വി.ഡി. സതീശൻ ഓടിച്ചുവായിച്ചശേഷം പറഞ്ഞത്, ഇതൊക്കെ വ്യക്തിപരമായ കാര്യങ്ങൾ ആണല്ലോ എന്നാണ്. പിതാവിന്റെ മരണത്തിനുശേഷം നേതാക്കൾ വിളിക്കുകയോ കുടുംബത്തെ സാന്ത്വനിപ്പിക്കുകയോ ചെയ്തിട്ടില്ലെന്നും ഇരുവരും പറഞ്ഞു.
കത്ത് നേതാക്കൾക്ക് എത്തിച്ചശേഷം 10 ദിവസം കാത്തിരിക്കണമെന്നും എന്നിട്ടും പ്രതികരണം ഉണ്ടായില്ലെങ്കിൽ മാത്രം മാധ്യമങ്ങൾക്ക് കൊടുത്താൽ മതിയെന്നും വിജയൻ ആത്മഹത്യക്കുറിപ്പിൽ ആവശ്യപ്പെട്ടിരുന്നു. മരിച്ചതിനുശേഷം 10 ദിവസം വരെ കത്ത് പുറത്തുവരാത്തതിന് കാരണം ഇതാണ്. കത്ത് പുറത്തായതോടെ ഐ.സി. ബാലകൃഷ്ണൻ എം.എൽ.എ ഉൾപ്പെടെ കോൺഗ്രസ് നേതാക്കൾ കൂടുതൽ പ്രതിരോധത്തിലാണ്. സുൽത്താൻ ബത്തേരി അർബൻ ബാങ്കിലെ നിയമനങ്ങൾക്ക് ആരോടും പണം വാങ്ങിയിട്ടില്ലെന്നും ഏത് അന്വേഷണത്തേയും നേരിടാൻ തയാറാണെന്നും ഐ.സി. ബാലകൃഷ്ണൻ ആവർത്തിക്കുന്നുണ്ട്. എന്നാൽ, അർബൻ ബാങ്കിൽ തന്റെ ഇളയ മകന്റെ ജോലി നഷ്ടപ്പെടുത്തിയത് ഐ.സി. ബാലകൃഷ്ണൻ ആണെന്നും മറ്റൊരാളെ നിയമിക്കാനാണ് ഇങ്ങനെ ചെയ്തതെന്നും കത്തിൽ ആരോപിക്കുന്നു. ഐ.സി. ബാലകൃഷ്ണൻ എം.എൽ.എ, ഡി.സി.സി പ്രസിഡന്റ് എൻ.ഡി. അപ്പച്ചൻ, മുൻ ഡി.സി.സി ട്രഷറർ കെ.കെ ഗോപിനാഥൻ, അന്തരിച്ച മുൻ ഡി.സി.സി പ്രസിഡന്റ് പി.വി. ബാലചന്ദ്രൻ എന്നിവർക്കെതിരെ ഗുരുതര ആരോപണങ്ങളാണ് കത്തിലുള്ളത്. താൻ മരിക്കുകയാണെങ്കിൽ ഉത്തരവാദികൾ കത്തിൽ പേരുള്ള നേതാക്കളാണെന്നും അതിലുണ്ട്. എം.എൽ.എയെ വിടാതെ പിന്തുടരുന്ന സി.പി.എമ്മിന് കത്ത് വലിയ അടിയാണ് നൽകിയത്. തിങ്കളാഴ്ച വൈകീട്ട് ഡി.വൈ.എഫ്.ഐ വർധിത ഊർജത്തിൽ എം.എൽ.എയുടെ ഓഫിസിലേക്ക് തള്ളിക്കയറിയതും കത്തിന്റെ പിൻബലത്തിലാണ്. ബുധനാഴ്ച രാത്രി ബത്തേരി നഗരത്തിൽ നൈറ്റ് മാർച്ച് നടത്താൻ സി.പി.എം തീരുമാനിച്ചിട്ടുണ്ട്. എം.എൽ.എ രാജിവെക്കണമെന്നാണ് ആവശ്യം.
അതേസമയം, പൊലീസിന്റെ പ്രത്യേക അന്വേഷണസംഘത്തിന്റേയും വിജിലൻസിന്റേയും അന്വേഷണം പുരോഗമിക്കുകയാണ്. എൻ.എം. വിജയന്റെ കുടുംബം നൽകിയ കത്തുകൾ പൊലീസ് കസ്റ്റഡിയിൽ വാങ്ങിയിട്ടുണ്ട്. കത്തുകളിൽ പരാമർശിക്കുന്നവരുടെ മൊഴിയെടുക്കും.
അന്വേഷണ സമിതി ഇന്നെത്തും
കൽപറ്റ: വയനാട് ഡി.സി.സി ട്രഷറര്‍ എന്‍.എം.വിജയന്റെയും മകന്റെയും മരണവുമായി ബന്ധപ്പെട്ട ആരോപണങ്ങൾ അന്വേഷിച്ച് റിപ്പോര്‍ട്ട് സമര്‍പ്പിക്കാന്‍ കെ.പി.സി.സി നിയോഗിച്ച സമിതി ബുധനാഴ്ച കൽപറ്റയിൽ എത്തും. രാവിലെ 10ന് കൽപറ്റ ഡി.സി.സി ഓഫിസിലെത്തുന്ന സമിതി അംഗങ്ങൾ തുടർന്ന് സുൽത്താൻ ബത്തേരിയിലേക്ക് പോകും. കെ.പി.സി.സി അച്ചടക്ക സമിതി ചെയര്‍മാന്‍ തിരുവഞ്ചൂര്‍ രാധാകൃഷ്ണന്‍, കെ.പി.സി.സി വര്‍ക്കിങ് പ്രസിഡന്റ് ടി.എന്‍. പ്രതാപന്‍, രാഷ്ട്രീയകാര്യസമിതി അംഗം സണ്ണി ജോസഫ്, കെ.പി.സി.സി ജനറല്‍ സെക്രട്ടറി കെ. ജയന്ത് എന്നിവരാണ് സമിതിയിലുള്ളത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.