മാഹി പൊലീസും ബോംബ് സ്ക്വാഡും പൊലീസ് നായ് ലക്സിയുടെ സഹായത്തോടെ മാഹിയുടെ വിവിധ ഭാഗങ്ങളിൽ റെയ്ഡ് നടത്തുന്നു
മാഹി: മേഖലയിലെ വിവിധ പ്രദേശങ്ങളിൽ ബോംബ് സ്ക്വാഡിന്റെ സഹായത്തോടെ മാഹി പൊലീസ് പരിശോധന നടത്തി.
എരഞ്ഞോളിയിൽ നടന്ന ബോംബ് സ്ഫോടനങ്ങളുടെ പശ്ചാത്തലത്തിലാണ് പരിശോധന.
ചെറുകല്ലായി, ചാലക്കര പള്ളൂർ, ഇരട്ടപിലാക്കൂൽ, ഈസ്റ്റ് പള്ളൂർ, ചെമ്പ്ര, വെസ്റ്റ് പള്ളൂർ പ്രദേശങ്ങളിലാണ് വ്യാപക പരിശോധന നടത്തിയത്.
എസ്.ഐ ജിയാസിന്റെ നേതൃത്വത്തിലുള്ള കണ്ണൂരിലെ ബോംബ് സ്ക്വാഡും സ്ഫോടക വസ്തുക്കൾ തിരിച്ചറിയുന്നതിൽ പരിശീലനം സിദ്ധിച്ച ലക്സി എന്ന പൊലീസ് നായ് ഉൾപ്പെടെയുള്ള ശ്വാന സേനയും മാഹി പൊലീസിനെ സഹായിക്കാനെത്തിയിരുന്നു.
മാഹി പൊലീസ് സൂപ്രണ്ട് ജി. ശരവണന്റെ നേതൃത്വത്തിൽ നടന്ന റെയ്ഡിൽ സി.ഐ ആർ. ഷൺമുഖം, മാഹി എസ്.ഐ കെ.സി. അജയകുമാർ, പള്ളൂർ എസ്.ഐ സി.വി. റെനിൽകുമാർ, സ്പെഷൽ ബ്രാഞ്ച് എസ്.ഐ പി. പ്രദീപ് എന്നിവരും പങ്കെടുത്തു. ആൾതാമസമില്ലാത്ത വീടുകൾ, നിർമാണം നിലച്ച കെട്ടിടങ്ങൾ, കുറ്റിക്കാടുകൾ എന്നിങ്ങനെ സാമൂഹിക വിരുദ്ധർ സ്ഥിരമായി തമ്പടിക്കുന്ന പ്രദേശങ്ങൾ കേന്ദ്രീകരിച്ചാണ് പരിശോധന നടന്നത്. ഇത്തരം പരിശോധനകൾ വരും ദിവസങ്ങളിലും തുടരുമെന്നും വാഹന പരിശോധന കർശനമാക്കിയിട്ടുണ്ടെന്നും പൊലീസ് സൂപ്രണ്ട് ജി. ശരവണൻ അറിയിച്ചു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.