രതീഷ്
ചവറ: കെ.എസ്.ആര്‍.ടി.സി ബസില്‍ വനിത കണ്ടക്ടറോടും യാത്രക്കാരോടും അപമര്യാദയായി പെരുമാറുകയും കസ്റ്റഡിയിലെടുക്കാനെത്തിയ പൊലീസിനെ ആക്രമിക്കുകയുംചെയ്ത യുവാവ് പിടിയില്‍. കൊട്ടുക്കല്‍ വയല ചരുവിള പുത്തന്‍ വീട്ടില്‍ രതീഷ് ആണ് (33) തെക്കുംഭാഗം പൊലീസിന്റെ പിടിയിലായത്.
കഴിഞ്ഞദിവസം വൈകീട്ട് കരുനാഗപ്പളളി സ്റ്റാൻഡില്‍നിന്ന് സർവിസ് നടത്തിയ കെ.എസ്.ആര്‍.ടി.സി ബസില്‍ യാത്രചെയ്ത രതീഷ് വനിതാ കണ്ടക്ടറോടും യാത്രക്കാരോടും അപമര്യാദയായി പെരുമാറിയിരുന്നു. ഈ വിവരം തെക്കുംഭാഗം പൊലീസില്‍ അറിയിച്ചു. തുടര്‍ന്ന് സ്‌റ്റേഷന് സമീപം പുല്ലിക്കാട്ട് ജങ്ഷനില്‍ പൊലീസ് ബസ് തടഞ്ഞ് ഇയാളെ കസ്റ്റഡിയില്‍ എടുക്കാന്‍ ശ്രമിച്ചപ്പോഴാണ് രതീഷ് പൊലീസ് സംഘത്തെ ആക്രമിച്ചത്.
പൊലീസ് ഉദ്യോഗസ്ഥരെ അസഭ്യം വിളിച്ചുകൊണ്ട് ആക്രമിച്ച ഇയാളെ പിന്നീട് കൂടുതല്‍ പൊലീസെത്തി കസ്റ്റഡിയിലെടുക്കുകയായിരുന്നു. ഇയാളുടെ ആക്രമണത്തില്‍ നിരവധി പൊലീസുകാര്‍ക്ക് പരിക്കേല്‍ക്കുകയും സ്‌റ്റേഷനിലെ കതകിനും മറ്റും കേടുപാടുകള്‍ സംഭവിക്കുകയും ചെയ്തു. പൊതുമുതല്‍ നശിപ്പിച്ചതിനും ഉദ്യോഗസ്ഥരുടെ ജോലി തടസ്സപ്പെടുത്തി ദേഹോപദ്രവമേല്‍പിച്ചതിനും ഇയാള്‍ക്കെതിരെ തെക്കുംഭാഗം പൊലീസ് കേസ് രജിസ്റ്റര്‍ ചെയ്തിട്ടുണ്ട്.
തെക്കുംഭാഗം പൊലീസ് ഇന്‍സ്‌പെക്ടര്‍ ദിനേശ്കുമാറിന്റെ നേതൃത്വത്തില്‍ എസ്.ഐമാരായ ശങ്കരനാരായണന്‍, ഓമനക്കുട്ടന്‍, എ.എസ്.ഐ രാജീവ്, സി.പി.ഒമാരായ അഫ്‌സല്‍, രതീഷ് എന്നിവരടങ്ങിയ പൊലീസ് സംഘമാണ് ഇയാളെ പിടികൂടിയത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.