ഓക്സിമീറ്ററിന്​ കൊള്ളവില; കൃ​ത്രിമ ക്ഷാമമുണ്ടാക്കുന്നു

കൊല്ലം: കോവിഡ് ബാധിച്ച് വീട്ടിൽ കഴിയുന്നവർക്ക് ഓക്സിജ​െൻറ അളവ് സ്വയം പരിശോധിക്കുന്നതിനുള്ള ഓക്സിമീറ്ററിന്​ കൊള്ളവില. വിപണിയിൽ യഥേഷ്​ടമുണ്ടായിരുന്ന ഓക്സിമീറ്റർ പൂഴ്ത്തിവെച്ച് അമിതവില ഇൗടാക്കു​െന്നന്ന പരാതി വ്യാപകമാണ്. വീട്ടിൽ ചികിത്സയിൽ കഴിയുന്നവർ ശരീരത്തിലെ ഓക്സിജൻറ അളവ് നിരന്തരം പരിശോധിക്കണമെന്നാണ് ഡോക്ടർമാർ നൽകുന്ന പ്രധാന നിർദേശം. കൃത്രിമായി ഓക്സിജന്‍ ലെവല്‍ നിരീക്ഷിക്കുന്നതിനുള്ള ഉപകരണമാണ് പൾസ് ഓക്സിമീറ്റർ. താരതമ്യേന ചെലവ് കുറഞ്ഞ ഉപകരണത്തിനാണ്​ ഇപ്പോൾ മൂന്നിരട്ടി വില ഇൗടാക്കുന്നത്.

രോഗിയുടെ വിരലുകളിലൊന്ന് ഉപകരണത്തിനുള്ളിൽ ഘടിപ്പിച്ചാല്‍ നിമിഷങ്ങൾക്കുള്ളിൽ ശരീരത്തിലെ ഓക്സിജൻ ലെവല്‍ കൃത്രിമായി കാണിക്കും. ശരീരത്തിലെ ഓക്സിജൻറ അളവ് കുറയുന്നതാണ് കോവിഡി​െൻറ ലക്ഷണങ്ങളിലൊന്ന്. രോഗികൾ കൂട്ടത്തോടെ ഓക്സി മീറ്ററുകൾ വാങ്ങിത്തുടങ്ങിയപ്പോഴാണ് കൊള്ള തുടങ്ങിയത്. പൾസ് മീറ്ററും കൂടി ചേർന്ന ഓക്സിമീറ്റർ നേരത്തെ മെഡിക്കൽ സ്​റ്റോറുകൾ വഴി 750 മുതൽ 900 രൂപക്ക് ലഭിക്കുമായിരുന്നു.

ഇപ്പോൾ 1500 മുതൽ രണ്ടായിരത്തിന്​ മുകളിലേക്കാണ് വില ഉയർന്നത്. ഓൺലൈൻ സ്​റ്റോറുകളിൽ 500 രൂപക്ക് വരെ കിട്ടിയിരുന്ന ഓക്സിമീറ്ററുകൾ ഇപ്പോൾ 1900 രൂപക്ക് മുകളിലാണ് വില. ഇതുംകൂടി മുതലെടുത്തുള്ള വിലയാണ്​ ഇൗടാക്കുന്നതെന്നാണ് ആക്ഷേപം. മൊത്ത വിതരണക്കാർ വില കൂട്ടിയതോടെ മിക്ക മെഡിക്കൽ സ്​റ്റോറുകളും ഓക്സിമീറ്റർ വാങ്ങുന്നില്ല.

സാധാരണക്കാരിൽനിന്ന് എതിർപ്പ് ഉയരുമെന്നതിനാൽ വില കൂടിയത് സംബന്ധിച്ച് അവരോട് കാര്യങ്ങൾ ബോധ്യപ്പെടുത്തുകയാണ് മെഡിക്കൽ സ്​റ്റോർ ഉടമകൾ ചെയ്യുന്നത്.

നേരത്തെ 700-800 രൂപക്ക് വിൽപന നടത്തുമ്പോഴും ഓക്സിമീറ്റർ പാക്കറ്റിൽ എം.ആർ.പി 2000-2400 ആണ് രേഖപ്പെടുത്തിയിരുന്നത്. അതേ പാക്കറ്റുകൾ തന്നെയാണ് നിലവിൽ വിപണിയിൽ എത്തുന്നത്. ചില്ലറ കച്ചവടക്കാർക്ക് ഇഷ്​ടമുള്ള വില ഇൗടാക്കി വിൽക്കാൻ വേണ്ടിയാണ് ഇത്തരത്തിൽ മൊത്തവില രേഖപ്പെടുത്തിയിരിക്കുന്നത്. 1400-1500 രൂപക്കാണ് ചില്ലറ വിൽപനക്കാർക്ക് ഇപ്പോൾ ഓക്സിമീറ്റർ ലഭിക്കുന്നത്. ജില്ല ഭരണകൂടം ഇടപെട്ട് ഓക്സിമീറ്ററുകളുടെ ഗുണനിലവാരം ഉറപ്പാക്കുന്നതിലും വില നിയന്ത്രിക്കുന്നതിലും ഇടപെടണമെന്ന ആവശ്യം ശക്തമായി.