കോട്ടയം: കോടിമത ആധുനിക അറവുശാലയിൽ നിർമിക്കുന്ന മലിനജല ശുദ്ധീകരണ പ്ലാന്‍റിന്‍റെ (ഇ.ടി.പി) പുതിയ വിശദ പദ്ധതി രേഖക്ക് (ഡി.പി.ആർ) ശുചിത്വമിഷന്‍റെ സാങ്കേതിക അനുമതി വൈകുന്നു. ജൂൺ 15നാണ് ഡി.പി.ആർ ശുചിത്വമിഷന് സമർപ്പിച്ചത്.
സാങ്കേതിക അനുമതി ലഭിച്ചാൽ ഡി.പി.ആർ അനുസരിച്ചുള്ള പദ്ധതിച്ചെലവിന് ഭരണാനുമതി നേടണം. പ്ലാന്‍റ് നിർമാണം ആരംഭിച്ചാൽ ഏഴുമാസംകൊണ്ട് പൂർത്തിയാക്കാനാകുമെന്ന് മുനിസിപ്പൽ സെക്രട്ടറി ഹൈകോടതിയിൽ സത്യവാങ്മൂലം നൽകി. നഗരസഭയുടെ അറവുശാല തുറന്നു പ്രവര്‍ത്തിക്കാത്തതിനെതിരെ ഓള്‍ ഇന്ത്യ മീറ്റ് ഇന്‍ഡസ്ട്രീസ് വെല്‍ഫെയര്‍ അസോസിയേഷനാണ് കോടതിയെ സമീപിച്ചത്.
അറവുശാല എന്നു തുറന്നു പ്രവര്‍ത്തിക്കുമെന്ന് നാലിനുമുമ്പ് വ്യക്തമായ മറുപടി നല്‍കാന്‍ നഗരസഭ സെക്രട്ടറിക്കു ഹൈകോടതി നിര്‍ദേശം നൽകിയിരുന്നു. ഉദ്ഘാടനം കഴിഞ്ഞ് നാലു വര്‍ഷം പിന്നിടാറായ അറവുശാലയിൽ പ്ലാന്‍റ് സ്ഥാപിക്കാത്തതിനാൽ മലിനീകരണ നിയന്ത്രണബോർഡ് അനുമതി നൽകിയിട്ടില്ല. ബോർഡിന്‍റെ ചട്ടങ്ങൾ പാലിക്കുന്ന രീതിയിൽ പ്ലാന്‍റ് സ്ഥാപിച്ചാലേ അറവുശാല തുറക്കാനാവൂ.
30 കെ.എൽ.ഡി ശേഷിയുള്ള മലിന ജല ശുദ്ധീകരണ പ്ലാന്‍റാണ് നിർമിക്കുക. 2.50 കോടിയിലേറെയാണ് ചെലവ് പ്രതീക്ഷിക്കുന്നത്. പ്ലാന്‍റിന്‍റെ മൂന്നുമാസത്തെ പ്രവർത്തനച്ചെലവും ഇതിൽ ഉൾപ്പെടും. മൂന്നുമാസത്തെ ട്രയൽ റണ്ണിനുശേഷം 10 വർഷത്തേക്ക് അറ്റകുറ്റപ്പണി നടത്താമെന്നതു സംബന്ധിച്ചും കരാറിലേർപ്പെടും.
സിവിൽ ജോലികൾക്ക് അഞ്ചുവർഷത്തെയും മെക്കാനിക്കൽ, ഇലക്ട്രിക്കൽ ഉപകരണങ്ങൾക്ക് മൂന്നുവർഷത്തെയും വാറന്‍റി ഉണ്ടാവും. അറവുശാലയിലെ എല്ലാ തരം മലിനജലവും പ്ലാന്‍റിൽ ശുദ്ധീകരിക്കപ്പെടും. ഈ ജലം അറവുശാല വൃത്തിയാക്കാനോ ഗ്രൗണ്ട് വാട്ടർ റീചാർജിങ്ങിനോ ഉപയോഗിക്കാനാകും. ഇ.ടി.പി നിർമാണത്തിന് 2017-18 സാമ്പത്തിക വർഷം 40 ലക്ഷം രൂപ നഗരസഭ വകയിരുത്തിയിരുന്നു.
ആദ്യം താൽപര്യമറിയിച്ചുവന്നത് ശുചിത്വമിഷന്‍റെ അംഗീകൃത ഏജൻസിയായ സെന്‍റർ ഫോർ മാനേജ്മെന്‍റ് ഡെവലപ്മെന്‍റ് ആയിരുന്നു. എന്നാൽ, സിംഗിൾ ടെൻഡർ ആയതിനാൽ ഒഴിവാക്കി മാന്വൽ ടെൻഡർ ക്ഷണിച്ചു. ഹൈടെക് ബയോ ഫെർട്ടിലൈസേഴ്സാണ് ടെൻഡർ നേടിയത്. എന്നാൽ, ഇവർ സമർപ്പിച്ച ഡി.പി.ആറിൽ അപാകത കണ്ടെത്തിയതിനാൽ ഇത് ഒഴിവാക്കി. പുതിയ ഡി.പി.ആർ. സമർപ്പിക്കാൻ ആവശ്യപ്പെടുകയും കാലാവധി നീട്ടിനൽകുകയും ചെയ്തു.
എന്നാൽ, പിന്നീട് സ്ഥാപനം ഇ.ടി.പി സ്ഥാപിക്കാൻ താൽപര്യമില്ല എന്ന് അറിയിച്ചു. തുടർന്നാണ് സർക്കാർ അംഗീകൃത ഏജൻസിയായ പാലക്കാട് ഇന്‍റഗ്രേറ്റഡ് റൂറൽ ടെക്നോളജി സെന്‍ററിനെ (ഐ.ആർ.ടി.സി) നിയോഗിക്കുന്നത്. ഇവർ നൽകിയ ആദ്യ ഡി.പി.ആറിലും അപാകതകളുണ്ടായിരുന്നു. ഡി.പി.ആർ ശുചിത്വമിഷൻ മടക്കിയതിനെതുടർന്ന് തുടർന്ന് വീണ്ടും ഭേദഗതി വരുത്തി തയാറാക്കുകയായിരുന്നു. ലാൻഡ് വാല്യൂ സർട്ടിഫിക്കറ്റ് കൂടി കിട്ടിയാലേ മലിനീകരണ നിയന്ത്രണ ബോർഡിന്‍റെ എൻ.ഒ.സി ലഭ്യമാവൂ. ഇതിനായി താലൂക്കിൽ കത്ത് നൽകിയിട്ടുണ്ട്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.